Օրեր առաջ Հայաստանի ազգային հավաքականի գլխավոր մարզիչ Խոակին Կապառոսը հրապարակեց թիմի հայտացուցակը Ազգերի լիգայի առաջիկա խաղերի համար։ Թիմում 7 նորեկ կա։ Ազգային հավաքականի նախկին ֆուտբոլիստ Լևոն Պաչաջյանը կարծում է, որ նորեկները կարևոր համալրում են հավաքականում, որովհետև շատ կարևոր է նաև, որ կատարվող սերնդափոխության գործընթացը հավաքականում սահուն ընթանա, ու այն ֆուտբոլիստները, որոնք հավաքական հրավիրվելու պատվին են արժանացել, իրենց լավագույնս դրսևորեն։
Հրավիրված 7 նորեկներից երկուսն ազգությամբ հայ չեն։ Ինչպես ավելի վաղ տեղեկացրել էինք՝ առաջիկա խաղերին Հայաստանի հավաքականի մարզաշապիկը կհագնեն նաև «Շիրակի» կիսապաշտպան Սոլոմոն Իմե Ուդոն և «Գանձասար-Կապանի» կիսապաշտպան Վբեյմար Անգուլոն։ Այս խաղացողներն արդեն 5 տարի է` հանդես են գալիս Հայաստանի առաջնությունում ու իրավական առումով հավաքականում խաղալու բոլոր հիմքերն ունեն։ Հարցն այլ է, թե ինչ արձագանք առաջացրեց այդ փաստը ֆուտբոլային հանրության շրջանում՝ չնայած նրան, որ Մարկոս Պիզելիի օրինակը դեռ թարմ է բոլորիս հիշողության մեջ։
Լևոն Պաչաջյանը արտասահմանցի ֆուտբոլիստների՝ հավաքական հրավիրվելուն ևս դեմ է, բացատրում է․
-Նախկինում էլ շատ դեպքեր են եղել, երբ արտասահմանցիներ են հրավիրվել հավաքական, բայց մենք նրանցից միայն մի հոգու անուն կարող ենք տալ՝ Մարկոսինը։ Դա նաև մեծ խոչընդոտ է մեր երիտասարդ կադրերի համար, որոնք որպես ֆուտբոլիստ Հայաստանում են աճում։ Նրանց տեղերը արհեստականորեն սահմանափակվում են։ Հուսով եմ՝ հավաքականը երկու այլազգիով կբավարարվի։
Հարց է առաջանում՝ արդյոք նրանց որակապես փոխարինող հայ ֆուտբոլիստներ չունեի՞նք։ Պաչաջյանն այդ հարցի պատասխանը չունի։ Եթե Ուդոյի խաղին քիչ թե շատ ծանոթ է, ապա Վբեյմարին՝ առհասարակ ոչ։ Նախկին ֆուտբոլիստը, ամեն դեպքում, ենթադրում է, որ մարզիչների ընտրությունն ինչ-որ տրամաբանության մեջ տեղավորվում է, իսկ վերջնական պատասխանը կարելի է ստանալ միայն արդյունքներին հետևելուց հետո։
Վերջերս բուռն քննարկումներ էին ընթանում նաև MLS-ում հանդես եկող Լուկաս Սելարայանին հավաքական հրավիրելու ուղղությամբ, նրա անունը, սակայն, հայտացուցակում այդպես էլ չտեսանք։ Հավաքականի նախկին ֆուտբոլիստը ևս Սելարայանին էր առանձնացրել՝ որպես հավաքականի թեկնածու, թեև վստահ չէ, որ նա կարգավիճակով համապատասխանում է Հայաստանի հավաքական հրավիրվելուն։
Իսկ ներքին առաջնությունից, որտեղ 90%-ը լեգիոներներ են, նա դժվարանում է հայ ֆուտբոլիստի մտաբերել, որին կցանկանար տեսնել հավաքականի մարզաշապիկով․
«Դրա համար այս ամենը պիտի մի ձևով սահմանափակվի, որ հավաքականում նոր հայ անուններ ունենանք»։
Արդեն վաղը՝ սեպտեմբերի 5-ին, Հայաստանի ազգային հավաքականը Հյուսիսային Մակեդոնիայի հետ արտագնա խաղով կմեկնարկի Ազգերի լիգայում, իսկ 3 օր անց Երևանում կընդունի Էստոնիայի ընտրանուն։ Ինչպես հայտնի է՝ այս խաղերին թիմին չի օգնի հավաքականի ավագ Հենրիխ Մխիթարյանը, որը Խոակին Կապառոսի խոսքով՝ իր հետ հեռախոսազրույցում նշել էր, որ այս պահի դրությամբ չի կարող միանալ հավաքականին, քանի որ վերջին հանդիպումն («Սևիլյայի» դեմ) անցկացրել է օգոստոսի 6-ին, այժմ արձակուրդում է, չի մարզվել, լավ մարզավիճակում չէ: Հենրիխն ավելացրել էր, որ այսպիսի վիճակում չի կարող ցուցադրել իր ողջ կարողությունները և խոստացել հոկտեմբերին անպայման միանալ հավաքականին ու խաղալ 100 տոկոսանոց նվիրումով:
Չնայած նրան, որ ըստ Լևոն Պաչաջյանի, Մխիթարյանի բացակայությունն անպայման կզգացվի խաղադաշտում, բայց կարծում է, որ երկու թիմերի հետ խաղերում էլ մեր հավաքականը հաղթանակի հնարավորություն ունի, և նոր հրավիրված ֆուտբոլիստների համար էլ ստեղծվել է իրավիճակ՝ ապացուցելու, որ արժանի էին այդ հրավերին։
«Մխիթարյանն այնպիսի ֆուտբոլիստ է, որ նրա բացակայությունը ցանկացած մակարդակում միշտ էլ կզգացվի, որովհետև նա միջազգային մակարդակի բարձրակարգ խաղացող է։ Մանավանդ մեր հավաքականի համար նա վերջին տարիներին անփոխարինելի ֆուտբոլիստ է դարձել։
Մխիթարյանի բացակայությունը կզգացվի, բայց կարծում եմ՝ նա իր պատճառներն ունի այս պահին բացակայելու ու պետք է հասկանալով մոտենանք մեր ավագի որոշմանը։
Հուսանք, որ ապագայում նա կմասնակցի հավաքականի խաղերին ու իր բարձրակարգ որակներով կօգնի թիմին հաջողություններ գրանցել»,- կարծում է Պաչաջյանը ու նաև լավ կողմ տեսնում Մխիթարյանի բացակայության մեջ․
-Իր բացակայությունն ինչ-որ տեղ նաև դրական է այն առումով, որ երիտասարդների համար իրենց դրսևորելու լավ հնարավորություն է։ Այնպես որ, շատ նորմալ ֆուտբոլային պրոցես է։ Լինում են պահեր, երբ կարևոր ֆուտբոլիստները ինչ-ինչ պատճառներով բացակայում են հավաքականից։
Իսկ նոր գլխավոր մարզչի մասին Պաչաջյանը ոլորտի մասնագետներից միայն լավ բաներ է լսել ու հույս ունի, որ նա մեր հավաքականին այլ մակարդակի կբերի։ Մնացածը ցույց կտան առաջիկա խաղերը։
Ստելլա Բաբլոյան
