Չեմպիոնների լիգան վերադարձավ Հայաստան: Ճիշտ է, այս արտահայտությունը ոմանց մոտ կարող է ծիծաղ առաջացնել, սակայն իրականությունը դա է: Իրականում, մենք դեռ կիլոմետրերով հեռու ենք Չեմպիոնների լիգայի «հոտը շնչելուց», օրհներգը լսելուց, բայց, փոխարենը, նախորդ տարի ցույց տվեցինք, որ հաջող վիճակահանության դեպքում կարող ենք հայտնվել Եվրոպա լիգայի խմբային փուլում:
Իհարկե, հիմա շատերը կարող են նշել, որ մենք կրկին հույսը դնում ենք բախտի վրա, ոչ թե փորձում հույս կապել թիմերի հետ: Մեծ հաշվով, այո՛, այդպես է: Նախորդ տարի «Փյունիկը» հասավ ԵԼ-ի որակավորման երրորդ փուլ, որտեղ մրցակցի դերում ստացավ Վուլվզին: Իսկ ինչպե՞ս մեր ակումբը հաղթահարեր ԱՊԼ-ում հեղինակությունների ահ ու սարսափ համարվող թիմի արգելքը: Սա փաստում է, որ մեր թիմերի լավ խաղին զուգահեռ, պետք է վիճակահանությունն էլ բարեհաճ «գտնվի»: Ավարտելով թեման՝ կարող ենք բերել «Նոայի» օրինակը, որը ԵԼ-ի առաջին փուլը հաղթահարելու դեպքում կարող է հայտնվել «Միլանի» վանդակում: Այդ դեպքում, կլինե՞ն պնդողներ, որ մենք պետք է փորձենք հաղթահարել նրանց արգելքը: Այո՛, մենք պետք է պայքարենք, բայց միայն արժանապատիվ ֆուտբոլ խաղալու համար:
Ինչպես տեղյակ ենք, դիմակայության հաղթողը որոշվելու է մեկ խաղի արդյունքում՝ հայտնի պատճառներով: Այդ մեկ հանդիպման անցկացման վայրն ընտրվել է վիճակահանությամբ և, ի ուրախություն մեզ, խաղը կայանալու է Երևանում, սակայն դատարկ տրիբունաների ուղեկցությամբ:
Վերադառնանք բուն թեմային: Նախորդ տարվա «Արարատ-Արմենիայի» մրցակիցն ավելի զորեղ էր, քան «Օմոնիան»: Պետք է նաև փաստել, որ ակումբը անփորձ էր և ծովափ էր գնացել առանց համապատախան համազգեստի: «Արարատ-Արմենիայի» նախկին գլխավոր մարզիչ Վարդան Մինասյանը մեկ անգամ նշել է, որ շատ կարևոր էր, որ հենց առաջին փուլում նրանց բաժին հասավ հզոր ԱԻԿ-ը: Հենց նրանց դեմ խաղը դարձավ հաջորդած հաղթանակների անկյունաքարը: Դժվար է ասել, այս տարի արդյոք նո՞ւյնը կասեր Մինասյանը: Չէ՞ որ, թիմն արդեն մեծ փորձ ունի: Չնայած կան խաղացողներ, որ նոր են միացել ակումբին, բայց շատերը մնացել են նախորդ տարվանից և դաշտ են դուրս գալու՝ նախորդ տարվա սխալն ուղղելու և նոր սխալ թույլ չտալու ակնկալիքով: Աբակումովը, Մենեզեսը, Ալեքսը, Համբարձումյանը, Անտոնովը, Նարսինգը, Սանոգոն, Լիման ու Օգանան, և նաև մի քանիսը, բան ունեն ապացուցելու: Նրանց են միացել բազմափորձ Գուֆրանն ու կրակոտ Օտուբանջոն: Կարելի է ասել, որ նախորդ տարվա համեմատ «Արարատ-Արմենիան» կազմով ավելի զորեղ է: Միակ մտավախությունն այն է, որ մինչ խաղը նոր մարզչական շտաբը կարող է չհասցնել «ներարկել իր ֆուտբոլը» խաղացողների արյան մեջ: Չնայած, Կամպանյան այդ առումով հանգիստ է և վստահ իր ու իր խաղացողների ներուժին:
«Արարատ-Արմենիան» խաղային պրակտիկայի պակաս չունի, իսկ «Օմոնիան» 5 ամսից ավելի չի մասնակցել ոչ մի պաշտոնական խաղի: Ընկերական խաղեր եղել են, բայց պաշտոնականի ու ընկերականի միջև տարբերությունն ակնհայտ է:
Թիմի առջևի գծի առաջատար ֆուտբոլիստները հեռացել են, իսկ նրանց փոխարեն հայտացուցակում կա 3 նորեկ՝ ի դեմս 35-ամյա հարձակվող Պապուլիսի, 32-ամյա հարձակվող Միխալ Դուրիցի և պաշտպան Կիկոյի:
«Արարատ-Արմենիան» հիմնական կորիզը պահպանել է, սակայն թիմին միացել են նաև Սարգիս Շահինյանը, Ալեմաոն և Դավիդ Ումանեսը:
Այսօր կայացած նախախաղային մամուլի ասուլիսի ժամանակ Դավիդ Կամպանյան նշեց, որ հիմնական դարպասապահ Աբակումովի՝ վերջին խաղերին բացակայությունը կախված է նրա՝ ոտքի շրջանում պարբերաբար կրկնվող ցավերի հետ: Որոշակի խնդիրներ ունի նաև Ֆուրջել Նարսինգը:
Եթե Աբակումովին կարող է փոխարինել Չուպիչը, ապա անհրաժեշտության դեպքում, միանշանակ, Նարսինգին կտեսնենք խաղադաշտում:
Դավիդ Կամպանյան Առաջին Ալիքի հետ զրույցում նշել է, որ թիմի հնարավորություններն ավելի բարձր է գնահատում՝ հաշվի առնելով մի շարք գործոններ: Կամպանյան նշել է, որ թիմը շարժվելու է խաղից խաղ. այս պահին երկարաժամկետ ծրագրեր չկան: Նրանք պատրաստվում են Եվրագավաթներում պատմություն կերտել:
Դժվար է թիմերի հնարավորությունները գնահատել՝ հաշվի առնելով վերջին խաղերում նրանց գրանցած արդյունքները: Արդեն նշեցինք, որ «Օմոնիան» վաղուց պաշտոնական հանդիպման չի մասնակցել: Վերջին անգամ այդպիսի խաղ եղել է մարտի 7-ին: Հուլիսի 11-ից սկսած Կիպրոսի չեմպիոնը ընկերական խաղեր է անցկացնում՝ մրցելով տեղի ակումբների հետ: Անցկացրած 7 խաղում թիմը տարել է 4 հաղթանակ, կրել 2 պարտություն և գրանցել 1 ոչ-ոքի:
Մի բան փաստ է՝ որքան հնարավոր է պետք է հեռուն գնալ Չեմպիոնների լիգայի գավաթի խաղարկությունում, քանի որ ՉԼ-ի որակավորման որևէ փուլից դուրս մնալը կտա Եվրոպա լիգայի մեկ աստիճանով բարձր փուլի ուղեգիր:
Արմեն Գարամյան