Ֆուտբոլի Հայաստանի Բարձրագույն խմբի առաջնությունում մեդալային տեղերի համար պայքարը ծայրաստիճան սրվել է: Այն ինչ սպասում էինք «Արարատ-Արմենայից», այս պահին իրականությունից բավական հեռու է: Ունենալով գրեթե 2 հավասարազոր ուժեղ կազմ ՝ Մինասյանի թիմը 2 տուր է չի կարողանում հաղթել: Վերջին տուրում «Լոռիի» դեմ խաղում Մինասյանը ինչ-որ ժամանակ մարտադաշտ նետեց ամբողջ հրետանին, բայց սկսենք սկզբից:
Այն, թե ինչպես է պետք 10 հոգով պաշտպանվել աստղային հարձակվողների դեմ
Այն, որ «Լոռին» ամեն ինչ անելու էր հաղթելու «Արարատ-Արմենիային», փաստ էր: Պատճառը պարզ էր. երբ թիմում տեղի է ունենում մարզչական փոփոխություն, չգրված օրենքի համաձայն այդ թիմը հենց առաջին խաղում դրական արդյունքի է հասնում, քանի որ խաղադաշտում գտնվող խաղացողները նորանշանակ մարզչին ապացուցելու բան են ունենում: «Լոռին» դաշտ դուրս եկավ Սանամյան-Նիգոյան-Խաշմանյան մարզչական եռյակի գլխավորությամբ: Դե յուրե, Խաշմանյանը Թովմաս Գրիգորյանի խորհրդականն է, բայց Խաշմանյանական ձեռագիրը վանաձորյան թիմի խաղում ակնհայտ էր: Նաև, խաղի ընթացքում Խաշմանյանը տրիբունայից անընդհատ խորհուրդներ-ցուցումներ էր տալիս Սանամյանին ու Նիգոյանին:
Առաջին կեսում գործող չեմպիոնը մի շարք պահեր ստեղծեց, բայց անընդմեջ փայլում էր «Լոռիի» երիտասարդ դարպասապահ Վարդան Շահատունին: «Լոռին» առաջին կեսում մեկ պահ ունեցավ, սակայն հարվածը շեղ էր: Երկրորդ խաղակեսի 14-րդ րոպեին Յեուլե Ալեքսանդրը, ստանալով երկրորդ դեղին քարտը, հեռացվեց խաղադաշտից՝ «Լոռիին» թողնելով ծայրահեղ ծանր իրավիճակում: «Արարատ-Արմենիան» մրցակցի կիսադաշտում սկսեց մեծ ճնշում կիրառել, իսկ «Լոռին» երբեմն անցնում էր հակագրոհների, սակայն Մինասյան-Դեսիրե զույգն առջևի գծում գնդակ պահելուց բացի, այլ արդյունավետ գործողությամբ չկարողացավ աչքի ընկնել: Մինասյանը դաշտ մտցրեց Օգանա-Գուֆրան-Սանոգո-Հարությունյան քառյակը, սակայն ապարդյուն: Շահատունին մնաց իր բարձության վրա, իսկ խաղն ավարտվեց գոլազուրկ ոչ-ոքի: Խաղից հետո Մինասյանը գոհ էր իր թիմի ցուցադրած խաղի որակից, սակայն դժգոհ էր պահերի իրացումից: Այս խաղը ևս մեկ անգամ ապացուցեց, որ չեմպիոնության հավակնորդ միայն «Արարատ-Արմենիան» չէ:
Սեփական հարկի տակ «Շիրակը» կրկին չհաղթելու իրավունք չուներ
Գյումրիում «Շիրակն» առանց լուրջ խոչընդոտի հաղթեց «Արարատին»: Երևանյան թիմը շարունակում է խաղալ մի շարք խաղացողների բացակայության պայմաններում: Հեռացավ նաև գլխավոր մարզիչ Կալիմանովը: Փոխարենը մեկուսացումից հետո վերադարձել էր թիմի մենեջեր Վալերի Հովհաննիսյանը, բայց նրա ներկայությունը ևս չօգնեց: Առաջին խաղակեսում պասիվ պայքար էր: Երկրորդ կեսի սկզբում Կոնեն շատ ալվ գործեց մրցակցի տուգանային հրապարակում՝ փոխանցելով գնդակը Մալաքյանին: Վերջինս ժլատություն չարեց, չհարվածեց, այլ փոխանցեց գնդակը Ուդոյին, որն էլ բիլիարդային հարվածով բացեց խաղի հաշիվը: «Շիրակը» տոտալ իշխում էր խաղադաշտում և խաղավարտին ևս մեկ գնդակ ուղարկեց մրցակցի դարպասը. այս անգամ աչքի ընկավ առաջնության լավագույն ռմբարկու Մորի Կոնեն: «Շիրակը» առաջնության վերսկումից հետո առաջին հաղթանակը տոնեց ու միացավ մեդալային պայքարին:
Դժվար է գնդակ ընդունել 89-րդ րոպեին
«Նաիրի» մարզադաշտում տանտիրոջ կարգավիճակով «Նոան» ընդունեց «Ալաշկերտին»: Եթե «Ալաշկերտը» հաղթեր, նրա ու «Արարատ-Արմենիայի» միջև միավորների տարբերությունը կհասներ մեկի: Օրեր առաջ այս թիմերը կրկին հանդիպել էին, և «Նոան» հաղթել էր 1-0 հաշվով: 2-րդ անընդմեջ խաղում Ադամյանի թիմի մեկնարկային կազմում բացակայում էր Արտակ Գրիգորյանը, սակայն արդեն առաջին խաղակեսի վերջնամասում գլխավոր մարզիչը ցանկանում էր Արտակին խաղադաշտ մտցնել, քանի որ կենտրոնում «Նոան» գերազանցում էր «Ալաշկերտին»: Զգացվում էր Գագիկ Դաղբաշյանի բացակայությունը, որն իր սուր եզրային միացումներով առջևում աշխուժություն է առաջացնում: Երկրորդ կեսում Գրիգորյանը կենտրոնում կարգավորեց խաղը: Մի քանի անգամ «Ալաշկերտին» վերահաս գոլից փրկեց Չանչարևիչը: Թվում էր, որ խաղն ավարտվելու է 0-0 հաշվով, սակայն այդ հաշվի հետ համաձայն չէր Վլադիմիր Ազարովը, որն 89-րդ րոպեին տուգանայից կատարած հարվածով չափազանց կարևոր հաղթանակ պարգևեց «Նոային»: Վերջում խաղադաշտ մտան Մանուչարյանն ու Գատիկոևը, սակայն ոչինչ անել չկարողացան:
Այսպիսով, 20 տուրից հետո 38 միավորով «Արարատ-Արմենիան» առաջատարն է: 34-ական միավոր ունի միանգամից 3 թիմ. «Լոռին», «Նոան» ու «Ալաշկերտը»: 5-րդ տեղում գտնվող «Շիրակն» ունի 32 միավոր, իսկ վեցնյակը 31 միավորով եզրափակում է «Արարատը»։
Արմեն Գարամյան
