Մադրիդի «Ռեալի» պաշտոնական հեռուստաալիքը ուղիղ եթերում լուսաբանել է «Ոսկե գնդակ-2026» մրցանակաբաշխությունը և արժանապատվորեն ընդունել Մյունխենի «Բավարիայի» անգլիացի հարձակվող Հարի Քեյնի հաղթանակը։
Քվեարկության արդյունքներով Քեյնը զբաղեցրեց առաջին հորիզոնականը՝ շրջանցելով «արքայական» ակումբի ֆրանսիացի ռմբարկու Կիլիան Մբապեին և կատալոնական «Բարսելոնայի» վինգեր Լամին Յամալին։ Իսպանական գրանդի հեռուստաալիքի եթերում ուղիղ միացմամբ հետևել են այն պահին, երբ լեգենդար բրազիլացի Ռոնալդոն հնչեցրել է հաղթողի անունը։
««Ռեալի» երկրպագուների հույսերը, բնականաբար, կապված էին Կիլիան Մբապեի հետ։ Ինչ արած, կանխատեսումներն իրականացան։ Ուստի, շնորհավորում ենք «Բավարիայի» և Անգլիայի հավաքականի ֆուտբոլիստին։
Ինչ վերաբերում է Կիլիան Մբապեին, ապա նա դեռ կունենա իր հնարավորությունը։ Շնորհավորում ենք Հարի Քեյնին։ Մբապեն մրցանակին հավակնելու շատ ծանրակշիռ հիմքեր ուներ, սակայն Քեյնի հաղթանակը, անկասկած, միանգամայն արժանի է։ Հարի Քեյնը ֆանտաստիկ ֆուտբոլիստ է՝ տպավորիչ կարիերայով։ Շնորհակալություն, որ մեզ հետ էիք»,- նշել է հեռուստաալիքի հաղորդավարը։
Հիշեցնենք, որ Հարի Քեյնի համար սա կարիերայի առաջին «Ոսկե գնդակն» է։ Նախորդ մրցաշրջանում անգլիացին մյունխենյան ակումբի կազմում նվաճել է Գերմանիայի չեմպիոնությունը, երկրի Գավաթն ու Սուպերգավաթը, իսկ Անգլիայի ազգային հավաքականի հետ դարձել է ԱԱ-2026-ի բրոնզե մեդալակիր։
