Ինչպես արդեն տեղեկացրել էինք, իսպանական «Խետաֆեն» պաշտոնապես հայտարարել է Մադրիդի «Ռեալի» լեգենդար պաշտպան Դանիել Կարվախալի տեղափոխության մասին։ 34-ամյա ֆուտբոլիստի հետ կնքվել է պայմանագիր, որը նախատեսված է մինչև 2027 թվականի հունիսի 30-ը։
Իր շնորհանդեսի ժամանակ Կարվախալը հանդես է եկել մեծ մամուլի ասուլիսով՝ պատասխանելով լրագրողների բոլոր հարցերին։
— Ի՞նչը Ձեզ գրավեց «Խետաֆեում»՝ հաշվի առնելով, որ կարիերայի ընթացքում հաղթել եք ամեն ինչ։ Եվ արդյո՞ք պայմանագրում կա կետ, որը թույլ կտա հեռանալ ձմռանը։
— Նախ ուզում եմ ասել, որ շատ երջանիկ եմ այստեղ գտնվելու համար։ Շնորհակալ եմ տնօրենների խորհրդին և նախագահին առաջարկի համար. կարծում եմ՝ ոգևորությունը փոխադարձ էր։ Երբ ավարտվեց պայմանագիրս «Ռեալի» հետ, ցանկանում էի փոխել միջավայրը՝ մեկնել էկզոտիկ երկիր կամ այլ առաջնություն՝ նոր փորձառություն ապրելու համար։ Սակայն հարմար պայմաններ չստեղծվեցին, իսկ իմ կյանքը ֆուտբոլն է։ Հատկապես վերջին երկու տարիների վնասվածքներից հետո, երբ չէի կարողանում ցուցադրել իմ ցանկալի կայունությունը, անհամբերությամբ սպասում էի խաղադաշտ վերադառնալուն։ «Խետաֆեի» առաջարկը լիովին համապատասխանում էր իմ և ընտանիքիս պահանջներին, ուստի որոշումն ընդունվեց շատ հեշտությամբ։ Ինչ վերաբերում է ձմռանը հեռանալու կետին՝ նման բան չկա։ Նպատակս ողջ մրցաշրջանն այստեղ անցկացնելն է. ես չեմ կարող հեռանալ ձմռանը, եթե միայն ինչ-որ մեկը չվճարի 50 միլիոն եվրո։
— Ինչպե՞ս անցան բանակցությունները և այն շաբաթը, երբ Լա Լիգան պետք է հաստատեր պայմանագիրը՝ աշխատավարձերի շեմի հետ կապված։
— Բարդ բանակցային շաբաթ էր, փնտրում էինք տրանսֆերն իրականացնելու ուղիներ։ Ամեն ինչ կախված չէր միայն ակումբից ու ինձնից. կար նաև Լա Լիգայի աշխատավարձերի սահմանաչափի հարցը, ինչը բարդացրեց իրավիճակը, բայց մենք լուծեցինք խնդիրը և շատ գոհ ենք։
— Ի՞նչ կասեք երկրպագուներին, որոնք գուցե կասկածում են Ձեր նվիրվածությանը, քանի որ «Խետաֆեն» Ձեր առաջին տարբերակը չէր։ Եվ ճի՞շտ է, որ մերժել եք եվրոպական թոփ ակումբների։
— Ով գոնե մի փոքր ճանաչում է ինձ, գիտի, որ իմ նվիրվածությունը առավելագույնն է՝ անկախ նրանից՝ խաղում եմ այստեղ, «Ռեալում», թե պարզապես տանը ձվածեղ եմ պատրաստում։ Ես ամեն ինչ անում եմ առավելագույն կրքով։ Պարզ է, որ այստեղ չեմ եկել իմ կյանքի ֆինանսական պայմանագրի համար, երկու կողմից էլ զիջումների ենք գնացել։ Այս ամառ առաջարկներ ունեի եվրոպական բարձրակարգ ակումբներից, կարող էի խաղալ Չեմպիոնների լիգայում։ Բայց այսօր՝ 34 տարեկանում, իմ առաջնահերթությունը կինս և երեխաներս են։ Ես տանն եմ՝ Մադրիդում, որտեղ մեծացել եմ, իսկ «Խետաֆեի» նախագիծը՝ եվրագավաթային մասնակցությամբ և մարզադաշտի վերակառուցմամբ, ինձ շատ է մոտիվացնում։
— 23 տարի «Ռեալում» անցկացնելուց հետո պատկերացնո՞ւմ եք պահը, երբ այլ մարզաշապիկով դուրս կգաք հարազատ թիմի դեմ՝ «Սանտյագո Բեռնաբեուում»։
— Անկեղծ ասած՝ միակ բանը, որ հիմա պատկերացնում եմ, այն է, թե ինչպես է մարզիչը երկուշաբթի օրը ինձ դաշտ դուրս բերում։ Հիմա միտքս զբաղված է միայն հաջորդ խաղով, չեմ ուզում առաջ ընկնել։ Գիտեմ, որ շաբլոն է հնչում, բայց դա ճշմարտությունն է, չեմ կարող ստել։ Իսկ «Ռեալից» հեռանալու էջը փակել ենք դեռ մայիսին՝ այն անհավանական հրաժեշտի ժամանակ։ Դա իմ կյանքի ամենաերջանիկ, այլ ոչ թե տխուր օրերից մեկն էր, քանի որ զգացի «Բեռնաբեուի» ողջ գնահատանքը։
— Ի՞նչ տպավորություն ունեք գլխավոր մարզիչ Խոսե Բորդալասից և թիմի ընդունելությունից։
— Առաջին իսկ օրը երկար զրուցել ենք։ Նա մեծ փորձ ունեցող մասնագետ է, որը շատ բան է պահանջում ֆուտբոլիստից և քամում է նրանից առավելագույնը։ Ինձ դա դուր է գալիս։ Ինչ վերաբերում է ընդունելությանը, ապա ճիշտ է, որ «Ռեալում» դու մի փոքր ապրում ես մեծ աստղերի ստվերում՝ թեև պատմության մեջ ակումբի երկրորդ ամենատիտղոսակիր խաղացողն եմ և ամենատիտղոսակիր սանը։ Այստեղ նման իրարանցում չէի սպասում։ Ինձ գրկաբաց ընդունեցին բոլորը՝ ղեկավարությունից մինչև հանդերձապահներ ու երկրպագուներ։ Տուն եմ վերադառնում լայն ժպիտով։
— Սա Ձեր առաջին ամառն էր առանց ակումբի։ Ինչպե՞ս եք հաղթահարել անորոշությունը և արդյո՞ք պատրաստ եք նորամուտը նշել հենց երկուշաբթի օրը։
— Շատ անսովոր ամառ էր։ Մարզվել եմ գրեթե ամեն օր՝ միայնակ, իսկ երբեմն էլ աներձագիս՝ Խոսելուի հետ, երբ նա Մադրիդում էր։ Կստեմ, եթե ասեմ, որ միայնակ մարզվելը հոգեբանորեն բարդ չէ։ Տանը խոսում էինք մի շաբաթով հանգստի մեկնելու մասին, բայց ես ասում էի՝ «ոչ, պետք է պատրաստ լինեմ», ու երկուշաբթիից ուրբաթ մարզվում էի։ Ֆիզիկապես ինձ լավ եմ զգում, թեև, բնականաբար, պակասում է թիմային ռիթմը։ Եթե մարզիչը որոշի, երկուշաբթի պատրաստ կլինեմ։
— Ինչպե՞ս վերապրեցիք Իսպանիայի հավաքականի հաղթանակն այս ամռանը և հավատո՞ւմ եք, որ Լուիս դե լա Ֆուենտեն կրկին կհրավիրի Ձեզ։
— Ապրեցի որպես շարքային երկրպագու, ոչ մի խաղ բաց չեմ թողել և տոնել եմ բոլորից շատ։ Կնոջս հետ հաճախ էինք քննարկում. «Իսկ եթե մնանք Եվրոպայում և բարձր մակարդակի վրա լինե՞ս»։ Ես երբեք չեմ հրաժարվի ազգային հավաքականի մարզաշապիկը կրելուց։
— Ո՞րն է Ձեր գլխավոր նպատակը «Խետաֆեում»։
— Օգնել երիտասարդներին իմ փորձով, ապահովել թիմի տեղը Լա Լիգայում, և, ինչո՞ւ ոչ, երազել Արքայական գավաթում ու Կոնֆերենցիաների լիգայում հաջողության հասնելու մասին։ Հաջողությունը չափվում է ոչ միայն վերջնական արդյունքով, այլև ամեն օր մինչև վերջ ներդրվելով։ Վստահ եմ, որ ճիշտ որոշում եմ կայացրել։
Ավելի վաղ մամուլում տեղեկություններ էին շրջանառվում, որ Լա Լիգայի տնտեսական կոմիտեն արգելափակել է գործարքը՝ կասկածելիորեն ցածր աշխատավարձի պատճառով՝ դա դիտարկելով որպես ֆինանսական արդար խաղի (FFP) կանոնների հնարավոր խախտում։ Այնուամենայնիվ, կողմերին հաջողվել է հարթել բոլոր տարաձայնությունները, և ակումբը ջերմորեն ողջունել է «Ռեալի» ու Իսպանիայի հավաքականի կազմում 29 տիտղոս (այդ թվում՝ ՉԼ-ի 6 գավաթ և Եվրո-2024-ի չեմպիոնություն) նվաճած վետերանին. «Բարի գալուստ «Կոլիզեում», Դանի՛»։
