Անսպասելի շրջադարձ. Ռեալի նախկին ֆուտբոլիստը կարող է տեղափոխվել Բարսելոնա

Կատալոնական «Բարսելոնան» ուշադրության կենտրոնում է պահում Մադրիդի «Ռեալի» նախկին պաշտպան Դավիդ Ալաբայի շուրջ ստեղծված իրավիճակը։ Քանի որ ակումբը հետաքրքրված է ազատ գործակալների շուկայով, 34-ամյա ավստրիացու թեկնածությունը բավականին գրավիչ է թվում կատալոնացիների համար։

Ըստ Sportowy պորտալի լրագրող Էքրեմ Քոնուրի՝ «կապտանռնագույնների» գլխավոր մարզիչ Հանս-Դիտեր Ֆլիկը Ալաբային շատ լավ է ճանաչում դեռևս Մյունխենի «Բավարիայում» համատեղ աշխատանքից։ «Բարսելոնայում» բարձր են գնահատում ֆուտբոլիստի ունիվերսալությունը. նա կարող է հուսալիորեն փակել ինչպես պաշտպանության կենտրոնը, այնպես էլ ձախ եզրը։ Այդուհանդերձ, տրանսֆերի հարցում դեռևս կոնկրետ որոշում չկա, և այս պահին Ալաբայի կարիերայի շարունակության ամենահավանական տարբերակն Իտալիան է, որտեղ նրա ծառայություններով ակտիվորեն հետաքրքրվում են Ա Սերիան ներկայացնող մայրաքաղաքային «Ռոման» ու «Լացիոն»։

Հիշեցնենք, որ Ալաբան «արքայական» ակումբի գույները պաշտպանել է 2021-ից 2026 թվականներին։ Մադրիդյան թիմի կազմում պաշտպանը բոլոր մրցաշարերում մասնակցել է 132 հանդիպման՝ դառնալով 5 գոլի և 9 արդյունավետ փոխանցման հեղինակ, ինչպես նաև նվաճելով Իսպանիայի չեմպիոնի տիտղոսն ու Չեմպիոնների լիգայի գավաթը։ Վնասվածքների պատճառով բարդացած վերջին շրջանից հետո՝ 2026 թվականի ամռանը, կողմերը դադարեցրել են համագործակցությունը, և ֆուտբոլիստը ստացել է ազատ գործակալի կարգավիճակ։