«Կլուժի» ճամբարում գերադասում են լռել ակումբում տիրող ֆինանսական կոլապսի մասին. Կոնֆերենցիաների լիգայի որակավորման երկրորդ փուլի «Ալաշկերտի» դեմ խաղից առաջ կայացած մամուլի ասուլիսի ժամանակ թիմի գլխավոր մարզիչ Անտոնիո Ֆոլյան և կիսապաշտպան Կառլո Մուխարը շրջանցեցին սկանդալային թեմաները՝ կենտրոնանալով բացառապես երևանյան հանդիպման վրա, այս մասին գրում է gsp.ro-ն։
Ուշագրավ է, որ ասուլիսին ներկա էր հենց այն ֆուտբոլիստը՝ Կառլո Մուխարը, ով օրերս պաշտոնական ծանուցում է ուղարկել ակումբի իրավաբանական բաժին՝ պահանջելով մարել իր չվճարված աշխատավարձերը։ Չնայած «Կլուժում» տիրող ծանրագույն ֆինանսական ճգնաժամին, մարզիչ Անտոնիո Ֆոլյան ամեն կերպ խուսափեց մեկնաբանել ստեղծված իրավիճակը, իսկ Մուխարը նույնպես ոչ մի բառ չասաց ակումբի խնդիրների մասին՝ խոսելով միայն հուլիսի 23-ին կայանալիք հանդիպման մասին։
Անդրադառնալով ակումբի ֆինանսական դժվարություններին և նոր խաղացողների գրանցման հետ կապված խնդիրներին՝ Անտոնիո Ֆոլյան կարճ կապեց.
«Միակ բանը, որ կարող եմ ասել այն է, որ մենք այստեղ ենք ողջ թիմով՝ անելու առավելագույնը: Սա միակ բանն է, ինչի վրա ես կենտրոնացած եմ՝ դաշտում անել մեր ուժերի ներածին չափով հնարավոր ամեն ինչ»։
Խոսելով «Ալաշկերտի» մասին՝ պորտուգալացի մասնագետը նշեց.
«Իհարկե, հնարավորություն ունեցել եմ վերլուծելու մրցակցին: Նրանք բարդ թիմ են, որը մեզ համար դժվարություններ կստեղծի։ Եթե խաղանք մեր հնարավորությունների առավելագույն չափով, լավ հանդիպում կանցկացնենք: Ի դեպ, սա իմ առաջին այցը չէ Հայաստան: Որպես պրոֆեսիոնալ ֆուտբոլիստ՝ ես ժամանակին ազգային հավաքականիս կազմում խաղացել եմ Հայաստանի դեմ:
( Հանդիպումը կայացել է 1996 թվականի օգոստոսի 31-ին, «Հրազդան» մարզադաշտում։ Հանդիպումն ավարտվել է գոլազուրկ ոչ-ոքիով: Ֆոլյան խաղացել է մեկ խաղակես և փոխարինվել երկրորդում )
Բայց այսօր նոր ենք ժամանել և շատ բան չենք հասցրել տեսնել ավտոբուսի պատուհանից բացի: Կենտրոնացած ենք միայն խաղի վրա։
«Իմ կարծիքով, փլեյ-օֆֆ խաղերում ֆավորիտներ չկան: Ես հիանալի կոլեկտիվ ունեմ, հիանալի տղաներ, ովքեր ինձ վստահություն են ներշնչում, որ վաղը կարող ենք շատ լավ խաղալ: Որպես մարզիչ, չեմ սիրում առանձնացնել ոչ իմ ֆուտբոլիստներին, ոչ էլ մրցակցի: Բայց վաղվա մրցակցի մասով, անշուշտ, կարող եմ առանձնացնել նրանց ավագին, հարձակվողական ոճի կիսապաշտպանին և առջևի գծի եռյակին: Հարձակվողները մեծ որակներ ունեն և, եթե թույլ տանք, շատ խնդիրներ կստեղծեն մեզ համար: Մենք պատրաստ կլինենք կանգնեցնել նրանց», — եզրափակել է Ֆոլյան:
Իր հերթին, կիսապաշտպան Կառլո Մուխարը նշեց, որ ծանոթ է հայկական ֆուտբոլին իր ընկերոջ միջոցով.
«Անձամբ ես չեմ կենտրոնացել որևէ առանձին ֆուտբոլիստի վրա, բայց լսել եմ, որ նրանք հիանալի թիմ ունեն: Զրուցել եմ Հայաստանում խաղացող իմ ընկերներից մեկի հետ: Նա ասաց, որ «Ալաշկերտը» գերազանց կոլեկտիվ ունի, իսկական մարտիկներ են: Նրանք պայքարում են յուրաքանչյուր գնդակի համար, ունեն ճիշտ մենթալիտետ մենապայքարներում և երկրորդ հարկում: Ակնկալում եմ, որ վաղը էներգիայով լի հանդիպում է լինելու, և մենք պայքարելու ենք ամեն գնդակի համար»։
Մինչ թիմը Երևանում փորձում է կենտրոնանալ ֆուտբոլի վրա, Ռումինիայում ակումբը իսկական աղետի մեջ է։ Այն բանից հետո, երբ ակումբը երեքշաբթի օրը հազիվհազ լուծեց տրանսֆերային մի արգելք, անմիջապես ստացավ նորը՝ այս անգամ առաջիկա 3 տրանսֆերային պատուհանների համար: Մինչ այս որոշման ուժի մեջ մտնելը, ակումբը հասցրել է գրանցել 4 նորեկների՝ Ռենատո Պանտալոնին, Յուվալ Սադեին, Անդրե Մորեյրային և Բրունո Կոստային:
Իրավիճակն ավելի է սրվում ներքին դժգոհություններով. թիմի առանցքային խաղացողներ Կառլո Մուխարն ու Անդրեյ Կորդեան դիմել են ակումբի իրավաբանական բաժին՝ պահանջելով վճարել իրենց աշխատավարձերը, իսկ ակումբի նախագահ Յուլիու Մուրեշանը արդեն իսկ հրաժարականի դիմում է ներկայացրել:
