Արգենտինայի նախագահ Խավիեր Միլեյը Radio Mitre-ի յութուբյան ալիքին տված ծավալուն հարցազրույցում խոսել է ազգային հավաքականի ավագ Լիոնել Մեսսիի մասին՝ անդրադառնալով ինչպես ԱԱ-2026-ից հետո նրա հեռանալուն, այնպես էլ երկրի ներքին խնդիրների շուրջ արված աղմկահարույց մեկնաբանություններին։
ԱՄՆ-ում, Կանադայում և Մեքսիկայում կայացած աշխարհի 2026 թվականի առաջնության եզրափակիչում Արգենտինան 0:1 հաշվով ցավալի պարտություն կրեց Իսպանիայից՝ բավարարվելով արծաթե մեդալներով: Մրցաշարից հետո հայտնի դարձավ, որ Լիոնել Մեսսին ավարտում է կարիերան ազգային հավաքականում։
Խոսելով արգենտինացի լեգենդի մասին՝ երկրի նախագահը չի թաքցրել իր հիացմունքը.
«Միայն երախտագիտության զգացում ունեմ։ Մարդ, ով ավելի քան 20 տարի գտնվում է իր մարզաձևի բացարձակ գագաթնակետին, արժանի է միայն հիացմունքի։ Ճշմարտությունն այն է, որ նա հսկայական ուրախություն է պարգևել բոլոր արգենտինացիներին։ Ավելին, նա ուրախություն է սփռել ամենուր, որտեղ խաղացել է, և բոլոր նրանց, ովքեր գնահատում են գեղեցիկ ֆուտբոլը»,- նշել է Միլեյը։
Հիշեցնենք, որ ԱԱ-2026-ում Մեսսին դարձավ 8 գոլի և 4 արդյունավետ փոխանցման հեղինակ։ Մրցաշարի ընթացքում նա պատմության մեջ առաջինը հատեց հեղինակավոր միջազգային մրցաշարերում խփած 20 գոլի սահմանագիծը, ինչպես նաև դարձավ աշխարհի առաջնությունների պատմության լավագույն ասիստենտն ու ամենաշատ հանդիպումներ անցկացրած ֆուտբոլիստը։
Լրագրողն անդրադարձել է նաև վերջին շրջանում մամուլում շրջանառվող լուրերին, թե իբր նախագահն ու կառավարությունը դժգոհ են Արգենտինայում տիրող ծանր վիճակի մասին Մեսսիի քննադատական խոսքերից։
Խավիեր Միլեյը կտրականապես հերքել է այս լուրերը՝ մեղադրելով զանգվածային լրատվամիջոցներին մանիպուլյացիաների մեջ։ Նա հաստատել է, որ ոչ միայն չի վիրավորվել ֆուտբոլիստի խոսքերից, այլև ողջունում է անկեղծությունը։
«Բացարձակապես ոչ, ինձ դա չի վիրավորել։ Մենք միշտ ողջունում ենք անկեղծ մղումներով արված ցանկացած հայտարարություն։ Մենք չենք հերքում մեր երկրի առջև ծառացած խնդիրները։ Այո՛, աղքատության մակարդակն այսօր 30% է, և դա մեզ չի ուրախացնում։ Բայց եկեք չմոռանանք իրականությունը. երբ ես ստանձնեցի պաշտոնս, այդ ցուցանիշը 57% էր։ Եթե մենք չկանխեինք հիպերինֆլյացիան, մեզ սպասվում էր Վենեսուելայի սցենարը, ինչը կհանգեցներ 90% աղքատության»,- պարզաբանել է նախագահը։
Միլեյը ներկայացրել է նաև տպավորիչ վիճակագրություն՝ նշելով, որ ծայրահեղ աղքատության շեմին գտնվող բնակչության թիվը 20%-ից նվազել է մինչև 6%, իսկ մանկական աղքատությունը 70%-ից իջել է 42%-ի։ Նա ընդգծել է, որ մեկ դար կուտակված աղետների հետևանքները հնարավոր չէ վերացնել երկուսուկես տարում։
«Ինչո՞ւ պետք է բարկանամ, երբ ինչ-որ մեկը, հատկապես Մեսսին, մատնանշում է փաստերը։ Սա լրատվամիջոցների կողմից ուռճացված արշավ էր՝ ինձ վարկաբեկելու համար։ Նրանք օգտագործում են արհեստական բանականություն, մոնտաժում են իմ մասնակցությամբ տեսանյութերը և բառերը կտրում են համատեքստից՝ թշնամանք հրահրելու համար այնտեղ, որտեղ դրա հիմքերը չկան։ Բայց մենք արդեն գիտենք, թե ինչ է իրենից ներկայացնում այդ աղբը, որը կոչվում է «21-րդ դարի սոցիալիզմ»»,- եզրափակել է Միլեյը։
