«Լեսթեր Սիթին» չկարողացավ պահպանել իր տեղը Չեմպիոնշիփում։ Սեփական հարկի տակ «Հալ Սիթիի» հետ գրանցած ոչ-ոքիից (2-2) հետո թիմը կորցրեց վտանգավոր գոտուց դուրս գալու նույնիսկ տեսական շանսերը և հաջորդ մրցաշրջանը կանցկացնի Անգլիայի երրորդ դիվիզիոնում:
Չեմպիոնշիփի 44 հանդիպումներից հետո «աղվեսները» վաստակել են 42 միավոր և զբաղեցնում են նախավերջին՝ 23-րդ հորիզոնականը: Առաջնության ավարտին մնացել է ընդամենը երկու տուր, սակայն անվտանգության գոտին եզրափակող 21-րդ տեղում գտնվող «Բլեքբեռն Ռովերսն» իր ակտիվում ունի 49 միավոր։ Այսպիսով, 7 միավորի տարբերությունը մաթեմատիկորեն անհնար է դարձնում «Լեսթերի» փրկությունը: Նշենք նաև, որ իրավիճակը բարդացել էր փետրվարին, երբ 2023/24 մրցաշրջանում շահութաբերության և կայունության կանոնները խախտելու պատճառով ակումբից հանվել էր 6 միավոր:
Սա թիմի երկրորդ անընդմեջ ձախողումն է: Նախորդ մրցաշրջանում «Լեսթերը» հանդես էր գալիս Անգլիայի Պրեմիեր լիգայում, որտեղ վաստակեց 25 միավոր, գրավեց 18-րդ տեղը և դուրս մնաց առաջնությոնից: Վերջին անգամ «Լեսթերն» Անգլիայի երրորդ դիվիզիոնում հանդես է եկել 2008/09 մրցաշրջանում:
Այս անկումը տեղի է ունենում անգլիական ֆուտբոլի պատմության ամենահիշարժան հաղթանակներից մեկի՝ «Լեսթերի» չեմպիոնությունից ուղիղ 10 տարի անց: Հիշեցնենք, որ 2015/16 մրցաշրջանում Կլաուդիո Ռանիերիի գլխավորած թիմը 38 տուրում վաստակեց 81 միավոր՝ 10 միավորով գերազանցելով մոտակա հետապնդողին՝ «Արսենալին» և նվաճելով ԱՊԼ-ի չեմպիոնի պատմական տիտղոսը:
