Փարիզի Օլիմպիական խաղերի բրոնզե մեդալակիր, աշխարհի կրկնակի և Եվրոպայի քառակի չեմպիոն Մալխաս Ամոյանը վճռական է տրամադրված ապրիլի 20-26-ը Ալբանիայի մայրաքաղաք Տիրանայում կայանալիք ըմբշամարտի եվրոպայի առաջնությունից առաջ։
77 կգ քաշային կարգում Ամոյանը մրցավայր է մեկնում որպես գործող չեմպիոն՝ նպատակ ունենալով նվաճելու մայրցամաքային գլխավոր ստուգատեսի իր 5-րդ ոսկե մեդալը:
Լրագրողների հետ զրույցում 27-ամյա ըմբիշն նշել է, որ հերթական տիտղոսի նվաճումը բարդ փորձություն է լինելու, քանի որ գործող չեմպիոնի կարգավիճակն էլ ավելի է մեծացնում պատասխանատվությունը։
«Երբ որպես առաջատար ես գնում մրցաշարի, մրցակիցներդ քո դեմ կրկնակի մոտիվացված և ավելի լավ պատրաստված են գալիս։ Այդ իսկ պատճառով պայքարը բարդանում է։ Իմ քաշային կարգում կան 6-7 բարձրակարգ ըմբիշներ, որոնք լրջորեն հավակնում են չեմպիոնությանը։ Ամեն ինչ կախված կլինի տվյալ օրվանից՝ ով իրեն ավելի լավ կզգա և ճիշտ կդրսևորի իր մարզավիճակը, նա էլ կհաղթի»,- նշել է Ամոյանը՝ հավելելով, որ անելու է հնարավոր առավելագույնը 5-րդ ոսկին Հայաստան բերելու համար։
Հիշեցնենք, որ Տիրանայում կայանալիք առաջնությունում հունահռոմեական ոճի ըմբշամարտի Հայաստանի հավաքականը հանդես կգա ամբողջական կազմով․ Մանվել Խաչատրյան (55 կգ), Սուրեն Աղաջանյան (60 կգ), Կարեն Ասլանյան (63 կգ), Սլավիկ Գալստյան (67 կգ), Գասպար Տերտերյան (72 կգ), Մալխաս Ամոյան (77 կգ), Սամվել Գրիգորյան (82 կգ), Գևորգ Թադևոսյան (87 կգ), Հայկ Խլոյան (97 կգ), Ալբերտ Վարդանյան (130 կգ):
