Բրազիլական «Սանթոսի» վինգեր Նեյմարը կիսվել է վերջին խաղից հետո ունեցած հույզերով և մեկնաբանել իր հասցեին հնչած քննադատությունները։
Փետրվարի 27-ին «Սանթոսը» Բրազիլիայի Ա Սերիայի 4-րդ տուրում սեփական հարկի տակ 2:1 հաշվով հաղթել է «Վասկո դա Գամային»: Նեյմարը դարձել է դուբլի հեղինակ և ճանաչվել հանդիպման գլխավոր հերոս։
«Անցած շաբաթ ինձ անվանում էին աշխարհի վատագույն ֆուտբոլիստ: Կարծում եմ՝ այս խաղում ես շատ ավելի լավ տեսք ունեի: Ֆուտբոլն այսպիսին է. այսօր քեզ վրա խաչ են քաշում, իսկ վաղը դու կարող ես մեկնել աշխարհի առաջնության:
Ես փորձում եմ ապրել այսօրվանով, շարունակում եմ աշխատել և հավաքել օպտիմալ մարզավիճակ: Սա տարվա ընթացքում ընդամենը երկրորդ խաղն է, որն անցկացրեցի ամբողջությամբ՝ բոլոր 90 րոպեները։ Ես մարզվում եմ և ցանկանում եմ ամենաբարձր մակարդակի ֆուտբոլ ցուցադրել»,- բրազիլացու խոսքերն է մեջբերում Globo-ն։
Նշենք, որ 2026 թվականին 34-ամյա հարձակվողն ակումբի կազմում անցկացրել է երեք հանդիպում, որոնցում դարձել է երկու գոլի և մեկ գոլային փոխանցման հեղինակ։
