«Ռեալի» գլխավոր մարզիչ Ալվարո Արբելոան մեկնաբանել է Չեմպիոնների լիգայի փլեյ-օֆֆի անցումային փուլի պատասխան խաղում «Բենֆիկայի» նկատմամբ տարած հաղթանակը (2:1)։
«Ոչ մի հանդիպում հեշտ չի տրվում։ Պետք է կարողանալ համբերել, քանի որ Չեմպիոնների լիգան Եվրոպայի լավագույն մրցաշարն է։ «Բենֆիկան» դիմում էր բարձր պրեսինգի, ինչի պատճառով դժվարությամբ էինք դուրս գալիս պաշտպանությունից։ Թեև ազատ գոտիներ ունեինք, սակայն սկզբում չէինք կարողանում օգտագործել դրանք։ Ամեն ինչ փոխվեց ընդմիջումից հետո, երբ շտկեցինք մեր սխալներն ու սկսեցինք շատ ավելի լավ խաղալ։
Չուամենիի գոլը չափազանց կարևոր էր։ Վերջերս մենք հաճախ ենք խոսում նրա մասին. նա հիմա ֆանտաստիկ մարզավիճակում է գտնվում։ Հուսով եմ՝ սա նրա բազմաթիվ գոլերից միայն առաջինն էր։
Վինիսիուսը նույնպես փայլուն հանդիպում անցկացրեց՝ դառնալով գոլի հեղինակ և մշտապես վտանգ ստեղծելով մրցակցի դարպասի մոտ։ Տանը նա արդեն ունի լավագույն խաղացողի (MVP) բազմաթիվ մրցանակներ, ուստի ուրախ եմ, որ այս անգամ այդ կոչմանն արժանացավ Չուամենին: Նա կատարում է սև գործ, որը հաճախ աննկատ է մնում։
Երբ Մբապեն դեռ թիմում էր, մենք արդեն զգում էինք Վինիսիուսի կարիքը, իսկ հիմա, երբ նա չկա, Վինիի դերն անհամեմատ մեծացել է։ Նա պետք է լինի մեր թիմի առաջնորդն ու գլխավոր ուղենիշը։ Մենք ևս մեկ անգամ համոզվեցինք, որ նա ունակ է բեկելու հանդիպման ընթացքը»,- Արբելոայի խոսքերն է մեջբերում Football Espana-ն:
Հիշեցնենք, որ առաջին խաղում ևս մադրիդյան ակումբը հաղթել էր 1:0 հաշվով և, ընդհանուր առմամբ տոնելով վստահ հաղթանակ, դուրս եկավ Չեմպիոնների լիգայի 1/8 եզրափակիչ։ Այդ փուլում «Ռեալի» մրցակիցը կլինի կա՛մ «Մանչեսթեր Սիթին», կա՛մ «Սպորտինգը»: Վիճակահանությունը կկայանա ուրբաթ՝ փետրվարի 27-ին:
