Հայաստանի հունահռոմեական ոճի ըմբշամարտի հավաքականի տղաներն այս օրերին անհատական մարզումներ են անցկացնում՝ փորձելով հնարավորինս պահել մարզավիճակը: Այս մասին ArmSport-ի թղթակցի հետո զրույցում նշեց հավաքականի գլխավոր մարզիչ Էդուարդ Սահակյանը:
Նրա խոսքով, երբ կունենան միջազգային ֆեդերացիայի՝ հաջորդ տարվա մրցաշարերի հետ կապված օրացույցը, ըստ դրա արդեն կհասկանան հետագա անելիքները:
Հիշեցնենք՝ երեկ հայտնի դարձավ, որ Ըմբշամարտի միջազգային ֆեդերացիան (UWW) ազատ, հունահռոմեական ոճերի և կանանց ըմբշամարտի բոլոր վարկանիշային մրցաշարերը տեղափոխել է հաջորդ տարի։
«Թիմային մարզումներ հիմա, բնականաբար, չենք անում: Իսկ անհատապես յուրաքանչյուրի հետ էլ կապ ունենք, որոշակի առաջադրանքներ ենք տվել, ու հիմնականում անհատական աշխատանքներ են կատարում, քանի որ հաշվի առնելով վարակի տարածման ռիսկերն ու պարետատան պահանջները՝ այլ կերպ հնարավոր չէ:
Ինչ վերաբերում է մյուս տարվա մրցաշարերին, ապա երբ՝ մենք կունենանք միջազգային ֆեդերացիայի օրացույցը, ըստ դրա կսկսենք պլանավորել մեր մարզումներն ու հասկանալ հետագա անելիքներն ու տեսնել՝ որտեղից ենք սկսելու»,- ասում է Էդուարդ Սահակյանն ու խոստովանում՝ այս տարվա չեղարկումների արդյունքում իրենք որոշակի թերի կողմեր էլ կունենան.
«Մենք մարզիկներին միշտ տոնուսի մեջ ենք պահում, այսինքն մոտ 10-15-օրյա ինտերվալներով հավաքներ ու մարզումներ ենք անցկացնում, բայց հիմա այդ հնարավորությունը չունենք, ու բնական է՝ կունենանք նաև որոշակի թերի կողմեր, բայց աշխատանքի ընթացքում ամեն ինչ կանենք, որպեսզի տղաներին բերենք իրենց նախկին վիճակին»:
Էդուարդ Սահակյանը մեր խնդրանքով անդրադարձավ նաև մարզիկների թոշակների հարցին:
Ինչպես հայտնի է, միջազգային մրցաշարերի մասնակցելով և մրցանակային տեղեր զբաղեցնելով՝ հայ մարզիկները պետական թոշակ ստանալու հնարավորույթյուն են ստանում, սակայն մրցաշարերի չեղարկման արդյունքում դեռևս հայտնի չէ՝ կզրկվե՞ն այդ հնարավորությունից, թե ոչ։
«Պետք է ասեմ, որ առ այսօր մեր մարզիկները ստացել են նախատեսված բոլոր թոշակները: Մինչև այսօր որևէ խնդիր չի եղել: Ավելին ասել չեմ կարող»,- ասաց Էդուարդ Սահակյանը:
Նարե Հովհաննիսյան
