Լոնդոնի «Չելսին» պաշտոնական առաջարկ է ներկայացրել «Բարսելոնային» թիմի իսպանացի կիսապաշտպան Ֆերմին Լոպեսի տրանսֆերի համար։ Այս մասին հայտնում է Sport.es-ը։
Աղբյուրի տեղեկություններով՝ «ազնվականները» 22-ամյա խաղացողի համար պատրաստ են վճարել 50 միլիոն եվրո։ Նշվում է, որ «Բարսելոնան» քննարկում է առաջարկը։ Կարևորն այն է, որ Լոպեսի հնարավոր տրանսֆերը կօգնի կատալոնական ակումբին լուծել կարճաժամկետ ֆինանսական խնդիրները և գրանցել մի շարք խաղացողների։
Անցած մրցաշրջանում Լոպեսը «կապտանռնագույնների» կազմում անցկացրել է 46 հանդիպում՝ խփելով 8 գոլ և կատարելով 10 գոլային փոխանցում։ Ֆուտբոլիստի գործող պայմանագրի ժամկետը նախատեսված է մինչև 2029 թվականի ամառը։ Transfermarkt-ի տվյալներով՝ իսպանացու տրանսֆերային արժեքը կազմում է 50 միլիոն եվրո։
