Երեկ՝ օգոստոսի 10-ին կայացան մի շարք ընկերական հանդիպումներ։ Լուկա Մոդրիչն ու Դարվին Նունյեսը նշեցին նորամուտն իրենց խաղում, Մաթս Հումելսն ավարտեց կարիերան, իսկ Կրիշտիանու Ռոնալդուի դուբլը չփրկեց «Ալ-Նասրին» պարտությունից։
«Չելսի» — «Միլան»՝ 4:2
Անգլիական «Չելսին» ընկերական խաղում վստահ հաղթանակ է տարել իտալական «Միլանի» նկատմամբ։
Լոնդոնում կայացած հանդիպումն ավարտվել է 4:1 հաշվով՝ հօգուտ դաշտի տերերի։ «Չելսիի» կազմում դուբլի հեղինակ է դարձել Լիամ Դելապը, ևս մեկ գոլ է խփել Ժոաո Պեդրոն։ «Միլանի» կողմից աչքի է ընկել Յուսուֆ Ֆոֆանան, իսկ Անդրեյ Կուբիշը դարձել է ինքնագոլի հեղինակ և ստացել ուղիղ կարմիր քարտ։
Այս ամառ կիսապաշտպան Լուկա Մոդրիչը «Ռեալից» ազատ գործակալի կարգավիճակով միացել է «Միլանին»։ Այս հանդիպումը 39-ամյա ֆուտբոլիստի համար դեբյուտային էր իտալական ակումբի կազմում։
Իտալիայի առաջնությունը կմեկնարկի օգոստոսի 23-ին։
«Բորուսիա» Դ․ — «Յուվենտուս»՝ 1:2
Իտալական «Յուվենտուսը» ընկերական խաղում հաղթել է Դորտմունդի «Բորուսիային»։ Այս հանդիպումը գերմանացի պաշտպան Մաթս Հումելսի կարիերայի վերջին խաղն էր։
Դորտմունդում կայացած խաղում «Յուվենտուսը» հաղթել է 2:1 հաշվով։ Իտալական ակումբի կազմում դուբլի հեղինակ է դարձել Անդրեա Կամբիասոն, իսկ «Բորուսիայի» կողմից գոլ է խփել Մաքսիմիլիան Բայերը։
Ապրիլին Հումելսը հայտարարել էր, որ 2024/25 մրցաշրջանի ավարտից հետո կավարտի պրոֆեսիոնալ կարիերան։ 36-ամյա ֆուտբոլիստը վերջին անգամ դուրս է եկել խաղադաշտ։
Անցած մրցաշրջանում Հումելսը հանդես է եկել իտալական «Ռոմայում»։ Գերմանիայի հավաքականի կազմում նա հաղթել է 2014 թվականի աշխարհի առաջնությունը։ Նա հինգ անգամ դարձել է Գերմանիայի չեմպիոն և երկու անգամ՝ Գերմանիայի գավաթակիր։ «Բորուսիայի» կազմում Հումելսը խաղացել է 2008-2016 և 2019-2024 թվականներին։
«Արաու» — «Ալ-Հիլալ»՝ 0:6
Սաուդյան Արաբիայի «Ալ-Հիլալի» նոր հարձակվող Դարվին Նունյեսը գոլով աչքի է ընկել իր առաջին խաղում։ Սաուդական թիմը ընկերական խաղում 6:0 հաշվով ջախջախել է Շվեյցարիայի երկրորդ լիգայի «Արաու» ակումբին։ Նունյեսը խաղադաշտ է դուրս եկել ընդմիջումից հետո և կարողացել է ուրախացնել երկրպագուներին ճշգրիտ հարվածով։
«Ալ-Հիլալը» Նունյեսի՝ «Լիվերպուլից» տեղափոխման մասին պաշտոնապես հայտարարել էր շաբաթ օրը։ Գործարքի գումարը, ներառյալ բոնուսները, գնահատվում է 65 միլիոն եվրո։ Անցած մրցաշրջանում «Ալ-Հիլալը» Սաուդյան Արաբիայի առաջնությունում զբաղեցրել է երկրորդ տեղը, իսկ դրանից մեկ տարի առաջ դարձել է երկրի չեմպիոն։
«Թուլուզ» — «Սևիլիա»՝ 1:1
«Ալմերիա» — «Ալ-Նասր»՝ 3:2
Նախամրցաշրջանային ընկերական խաղում «Ալ-Նասրը» պարտվել է «Ալմերիային»։
6-րդ րոպեին Սերխիո Առիբասը առաջ է մղել դաշտի տերերին, սակայն սաուդական թիմը պատասխանել է Կրիշտիանու Ռոնալդուի դուբլով։ 17-րդ րոպեին պորտուգալացին գոլ է խփել խաղային իրավիճակից, իսկ 39-րդ րոպեին՝ իրացրել է 11-մետրանոց հաշիվը։
Առաջին խաղակեսի վերջում Ադրիան Էմբարբան հավասարեցրել է հաշիվը։ Երկրորդ խաղակեսի սկզբում Ռոնալդուն փոխարինվել է, իսկ 61-րդ րոպեին Էմբարբան խփել է հաղթական գոլը՝ ձևակերպելով դուբլ։
