Խորվաթ կիսապաշտպան Լուկա Մոդրիչը, որն օրեր առաջ անցկացրեց իր վերջին հանդիպումը Մադրիդի «Ռեալի» կազմում, ակումբից հեռացել է ոչ միայն երախտագիտությամբ, այլև քննադատությամբ՝ որոշ խաղացողների հասցեին։ Այս մասին հայտնում է Don Balon-ը։
Աղբյուրի տեղեկություններով՝ Մոդրիչը դժգոհ է եղել թիմի բրազիլացի հարձակվողներ Վինիսիուս Ժունիորի և Ռոդրիգո Գոեսի վարքից ու խաղամակարդակից։ Նշվում է, որ Լուկան ակումբի նախագահ Ֆլորենտինո Պերեսին հայտնել է, որ Վինիսիուսն ու Ռոդրիգոն այլևս դրական օրինակներ չեն թիմի համար։
Ավելին, տեղեկությունների համաձայն, Մոդրիչը 2024/25 մրցաշրջանի ընթացքում բազմիցս արտահայտել է իր դժգոհությունը բրազիլացիների վերաբերմունքի վերաբերյալ՝ ինչպես մարզումային գործընթացի, այնպես էլ թիմային կարգապահության վերաբերյալ։
Նշվում է, որ «Ռեալի» գլխավոր մարզիչ Խաբի Ալոնսոն նույնպես կիսում է խորվաթ կիսապաշտպանի տեսակետը։ Ռոդրիգոն աշխարհի ակումբային առաջնությունում խաղադաշտում անցկացրել է ընդամենը 30 րոպե, մինչդեռ թիմի հարձակման գիծն ամրապնդվում է նոր զույգով՝ Կիլիան Մբապեի և երիտասարդ Գոնսալո Գարսիա ներգրավմամբ։
Բացի այդ, ակումբին շուտով կմիանա արգենտինացի հարձակողական ոճի կիսապաշտպան Ֆրանկո Մաստանտուոնոն։
