«Մանչեսթեր Յունայթեդի» մամուլի ծառայությունը հայտնել է, որ հարձակվող Մաթեուս Կունյան թիմում հանդես կգա 10 համարի մարզաշապիկով։
Այդ համարն ավելի վաղ կրում էր թիմի մեկ այլ հարձակվող՝ Մարկուս Ռեշֆորդը, ով 2024/25 մրցաշրջանի երկրորդ կեսը վարձավճարով անցկացրել էր «Աստոն Վիլայում», իսկ այժմ վերադարձել է «Յունայթեդ»։ Նրա պայմանագիրը ակումբի հետ գործում է մինչև 2028 թվականի ամառ։
«Այս համարը մեծ նշանակություն ունի Կունյայի հայրենիքում՝ Բրազիլիայում, քանի որ այն կապվում է երկրի ֆուտբոլի մեծագույն աստղերի հետ», — նշել են «Մանչեսթեր Յունայթեդից»։
26-ամյա Կունյան «Յունայթեդ» է տեղափոխվել 2025 թվականի ամռանը՝ «Վուլվերհեմփթոնից», որտեղ 2023 թվականից ի վեր անցկացրել է 92 հանդիպում, խփել 33 գոլ և կատարել 15 գոլային փոխանցում։
