2026 թվականի ձմեռային Օլիմպիական խաղերին ընդառաջ նախատեսվում է հանդիպում ձմեռային մարզաձևերի ֆեդերացիաների հետ: Այս մասին լրագրողների հետ զրույցում այսօր հայտնել է ՀՀ ԿԳՄՍ նախարար Ժաննա Անդրեասյանը:
Նա հիշեցրել է՝ Փարիզի 2024 թ. ամառային Օլիմպիական խաղերից առաջ էլ կառավարությունը աջակցության հատուկ ծրագիր էր գործարկել մարզիկների, նրանց մարզիչների, բժիշկների համար սպորտային նպաստի տրամադրման: Ծրագրի հիմնական նպատակն էր, որ մեր մարզիկները կենտրոնանան ոչ թե կենցաղային տարբեր խնդիրների լուծման, այլ իրենց մարզումների վրա:
«Ասել էինք, որ Փարիզի Օլիմպիական խաղերից հետո նախագծում դադար կլինի` ծրագրի վերլուծության համար: Հիմա այդ վերլուծությունն իրականացված է և այդ հիմքով է ներկայացվել Լոս Անջելեսի Օլիմպիական խաղերի համար նպաստային ծրագիրը: Ինչ վերաբերում է Ձմեռային խաղերի մասնակից մարզիկների համար հնարավոր սպորտային նպաստին, ապա մենք առաջիկայում հանդիպում կունենանք ձմեռային մարզաձևերի ֆեդերացիաների ներկայացուցիների հետ, որպեսզի նրանց հետ քննարկենք, թե ինչպիսի աջակցության կարիք իրենք ունեն: Ձմեռային մարզաձևերում այլ իրավիճակ է, ի տարբերություն ամառային Օլիմպիական խաղերի մարզաձևերի»,- ասել է Անդրեասյանը:
Հիշեցնենք՝ ՀՀ կրթության, գիտության, մշակույթի և սպորտի նախարարությունը հանրային քննարկման է ներկայացրել «Լոս Անջելես 2028» ամառային Оլիմպիական խաղերին նախապատրաստվող մարզիկների, հավաքականների մարզիչների, անձնական մարզիչների, բժիշկների և մերսողների համար սպորտային նպաստ տրամադրելու կարգը:
Նախագիծը մշակվել է՝ հիմնվելով «Ֆիզիկական կուլտուրայի և սպորտի մասին» օրենքի համապատասխան դրույթների վրա:
Առաջարկվում է «Լոս Անջելես 2028» ամառային Օլիմպիական խաղերին լավագույնս նախապատրաստվելու համար սպորտային նպաստը տրամադրել 2026 թվականի հունվարից մինչև Օլիմպիական խաղերի ավարտը՝ 2028 թվականի օգոստոս:
