ՀՖՖ կողմից ներկայացված առաջարկներին արձագանքել են նաև Հայաստանի Առաջին խմբի մասնակից ակումբները: Այս մասին հայտնում է ՀՖՖ-ի պաշտոնական կայքը։
Ստորև «Սյունիք» ՖԱ դիրքորոշումը
««Սյունիք» ՖԱ-ն առաջարկում է Հայաստանի Պրեմիեր լիգայի մասնակից թիմերի քանակը սահմանել 12 թիմ՝ 3 շրջանով, երրորդ շրջանի դաշտի տիրոջ կարգավիճակի որոշումը՝ ըստ վիճակահանության։ Առաջնությունը կազմակերպել գարուն-աշուն ձեւաչափով, ինչը հնարավարություն կտա ավելի շատ խաղեր խաղալ ամռանը, զերծ կպահի եղանակային ֆորս-մաժորային իրավիճակներից, ինչպես նաեւ եվրագավաթներում հանդես եկող թիմերին կպահի խաղային ռիթմի մեջ որակավորման փուլերին պատրաստվելիս։
Առաջարկում ենք նաեւ մրցաշրջանի հստակ օրացույցը կազմել եւ հաստատել մրցաշրջանի սկզբում, ինչը հնարավորություն կտա ակումբներին կատարել երկարաժամկետ պլանավորում, հաշվի առնել այդ հանգամանքը ուսումնամարզական հավաքների, ստուգողական հանդիպումների եւ այլ գործունեության ծրագրման հարցերում։ Պրեմիեր լիգայում թիմի՝ խաղադաշտում օտարերկրացիների առավելագույն քանակը սահմանել 6։ Ձեւակերպել՝ խաղադաշտում յուրաքանչյուր թիմից պետք է միաժամանակ լինի Հայաստանի Հանրապետության 5 քաղաքացի, արձանագրությունում՝ 23-ից 11-ը։ Հայաստանի Հանրապետությունում մարզված համարվող ֆուտբոլիստների սահմանումից բխում է, որ 18 տարեկան օտարերկրացի ֆուտբոլիստը կարող է 3 մրցաշրջան անընդմեջ հանդես գալ Հայաստանի առաջնություններում եւ 21 տարեկանում համարվել ՀՀ մարզված։ Մենք կարծում ենք, որ օտարերկրացիների սահմանափակումը պետք է բացառապես օգնի հայ, հայաստանցի ֆուտբոլիստների քանակի եւ խաղաժամանակի աճին Պրեմիեր լիգայում։
Միանշանակ ողջունում ենք Հայաստանի առաջնության հանդիպումների՝ հանգստյան օրերին նշանակումը, քանի որ ակումբներին թույլ կտա աշխատել ավելի շատ երկրպագուներ եւ հանդիսատես ներգրավելու հարցում։ Ինչպես նաեւ ողջունում ենք հանդիպումների մեկնարկի ժամը սահմանելու վերաբերյալ ձեր գաղափարը։ Կարծում ենք, որ ԲԿՄԱ-ն պետք է հանդես գա ՀՀ ՊՆ հովանու ներքո եւ իրավունք ունենա մասնակցելու եվրագավաթների համար պայքարին»,- նշված է հայտարարության մեջ։
Լուսանկարը՝ ՀՖՖ-ի պաշտոնական կայքից
