Ձմեռային տրանսֆերային պատուհանն արդեն մի շաբաթ է, ինչ բացվել է։ Առաջարկում ենք ծանոթանալ օրերս կայացած մի շարք կարևոր տրանսֆերներին։
✅ Արգենտինական «Բելգրանոն» ձևակերպել է Հայաստանի ազգային հավաքականի կիսապաշտպան Լուկաս Սելարայանի տեղափոխությունը։ Այս տրանսֆերի մասին դեռ հայտնի էր դարձել դեկտեմբերին, սակայն հետագայում ֆուտբոլիստի տրանսֆերը «Բելգրանո» խափանվել էր։ Սելարայանի տրանսֆերի մասին գրառումները հեռացվել էին արգենտինական ակումբի բոլոր սոցիալական ցանցերից, իսկ ակումբի մարզադաշտում շնորհանդեսը չեղարկվել էր։ ԶԼՄ-ներում հաղորդվում էր, որ «Ալ Ֆատեհը» տրանսֆերի համար չի տրամադրել բոլոր անհրաժեշտ փաստաթղթերը, ինչի պատճառով ՖԻՖԱ-ն չի գրանցել տրանսֆերը։ Այժմ արդեն ամեն ինչ կարգավորվել է, այսօր ակումբը պաշտոնապես հայտարերց տրանսֆերի մասին։
✅ Ֆրանսիայի հավաքականի և «Լանսի» դարպասապահ Բրիս Սամբան տեղափոխվել է ֆրանսիական մեկ այլ ակումբ՝ «Ռեն»։ Այդ մասին հայտնում է ակումբի մամուլի ծառայությունը: Տրանսֆերի արժեքը կազմել է 14 միլիոն եվրո։ Իսկ ահա «Լանսն» արդեն վարձակալել է «Մարսելի» դարպասապահ Պաու Լոպեսին։ 30-ամյա դարպասապահն առաջիկա վեց ամիսները կանցկացնի Ֆրանսիայի հյուսիսում։ Դրանից հետո «Լանսը» կարող է ձևակերպել ամբողջական տրանսֆերը։
✅ Անգլիական «Բորնմուտը» հայտարարել է ձախ պաշտպան Խուլիո Սոլերի հետ պայմանագիր կնքելու մասին: 19-ամյա արգենտինացին անգլիական Պրեմիեր լիգայի ակումբ է տեղափոխվել «Լանուսից»։ Ակումբը չի բացահայտել գործարքի պայմանները: Միևնույն ժամանակ, Transfermarkt-ում նշվում է, որ ֆուտբոլիստի տրանսֆերի համար վճարվել է 8 միլիոն եվրո։
✅ «Կալյարիի» դարպասապահ Սիմոնե Սկուֆեն մրցաշրջանի երկրորդ հատվածը կանցկացնի իտալական թոփ ակումբում։ Իտալացի դարպասապահը վարձավճարով տեղափոխվել է «Նապոլի»։
✅ Իսկ ահա «Կալյարին» առանց դարպասապահ չի մնա․ «Նապոլիից» հակառակ ուղղությամբ, ևս վարձավճարով, կուղևորվի Իտալիայի երիտասարդական հավաքական դարպասապահ Էլիա Կապրիլեն։
✅ Իտալիայի հավաքականի պաշտպան Լուիս Ֆելիպե Ռամոսը, ով հանդես էր գալիս «Ալ Իտիհադում», վերադարձել է Եվրոպա։ 27-ամյա ֆուտբոլիստը պայմանագիր է կնքել «Մարսելի» հետ։ «Բետիսի» և «Լացիոյի» նախկին ֆուտբոլիստը նոր ակումբին միացել է ազատ գործակալի կարգավիճակով։
✅ «Կոմոն» իր համար ռեկորդային՝ 12 միլիոն եվրոյով ձեռք է բերել «Բետիսի» 19-ամյա վինգեր Ասանե Դիաոյի տրանսֆերը։ Բացի այդ, ակումբը ձևակերպել է նաև «Անտվերպենի» ֆրանսիացի դարպասապահ Ժան Բուտեի տրանսֆերը՝ 2 միլիոն եվրոյով։
✅ Անգլիայի չեմպիոն «Մանչեսթեր Սիթին» հերթական անգամ վարձավճարով այլ ակումբ է ուղարկել պաշտպան Իսա Կաբորեին։ Այս անգամ նա հանդես կգա Բունդեսլիգայում։ Բուրկինա Ֆասոյի հավաքականի ֆուտբոլիստը հեռացել է «Բենֆիկայից» և մինչև մրցաշրջանի ավարտը վարձավճարով կմիանա «Վերդերին»:
