Շրջանառության մեջ է դրվել մեկ նամանակիշով գեղաթերթիկ՝ նվիրված Երևանում անցկացված ծանրամարտի Եվրոպայի առաջնությանը

Դեկտեմբերի 1-ին շրջանառության մեջ է դրվել մեկ նամականիշով գեղաթերթիկ՝ նվիրված «Սպորտ. ծանրամարտի Եվրոպայի առաջնություն» թեմային: Այս մասին հայտնում է ԿԳՄՍՆ պաշտոնական կայքը:

Նամականիշի մարման արարողությունն իրականացրել են ՀՀ վարչապետի աշխատակազմի ղեկավար Արայիկ Հարությունյանը, Կրթության, գիտության, մշակույթի և սպորտի նախարար Ժաննա Անդրեասյանը, Բարձր տեխնոլոգիական արդյունաբերության նախարար Ռոբերտ Խաչատրյանը, «ՀայՓոստ» ընկերության գլխավոր գործադիր տնօրեն Արայիկ Աբրահամյանը, ՀՀ ֆիլատելիստների հայկական ասոցիացիայի նախագահ Հովիկ Մուսայելյանը, ինչպես նաև Երևանում կայացած ծանրամարտի Եվրոպայի առաջնության ոսկե մեդալակիրներ Գոռ Սահակյանը, Դավիթ Հովհաննիսյանը, Սամվել Գասպարյանը և Գարիկ Կարապետյանը:

Ֆիլատելիստների հայկական ասոցիացիայի նախագահ Հովիկ Մուսայելյանն ընդգծել է՝ օրը պատմական է ոչ միայն մեր անվանի ծանրորդներին մեծարելու, այլև այն առումով, որ Հայաստանը վերահաստատում է լեգենդներին նաև ֆիլատելիայի միջոցով գնահատանքի արժանացնելու մոտեցումը:

«Նամականիշները ցանկացած երկրի խորհրդանիշերից են՝ գերբի, դրոշի և դրամի հետ մեկտեղ: Բազմաթիվ երկրներում ընդունված չէ կենդանի լեգենդների պատվին նամականիշ թողարկել: Ի սկզբանե մենք որդեգրել ենք մեր փառապանծ մարզիկների նվաճումները ֆիլատելիայի միջոցով արտահայտելու քաղաքականությունը: Այս նամականիշները կտարածվեն ամբողջ աշխարհում, և մենք ևս մեկ անգամ կվերահաստատենք, որ Հայաստանն իսկապես սպորտային երկիր է»,- ասել է Հովիկ Մուսայելյանն ու ընդգծել ծանրամարտի Եվրոպայի առաջնության անցկացման բարձր մակարդակը:

Երևանում Եվրոպայի առաջնության չեմպիոնի տիտղոսը նվաճած Սամվել Գասպարյանը շնորհակալություն է հայտնել նմանօրինակ նախաձեռնության համար. «Մեզ համար սա մեծ գնահատանք է, ինչի համար շնորհակալություն ենք հայտնում: Այն, որ մեզ հնարավորություն ընձեռնվեց հենց Հայաստանում բարձր պահել մեր երկրի պատիվը, շատ ոգևորիչ էր: Կարծում եմ՝ արեցինք առավելագույնը, ինչի համար շատ ուրախ ենք»:

Միջոցառման ընթացքում նաև ցուցադրվել է կարճ տեսանյութ՝ նվիրված ծանրամարտի Եվրոպայի առաջնությունում մեր մարզիկների փառահեղ ելույթներին և գրանցած հաջողություններին:

Նշենք՝ 500 ՀՀ դրամ անվանական արժեքով գեղաթերթիկի նամանականիշի վրա պատկերված է մարզիկ՝ ծանրամարտը բարձրացնելու պահին: Նամականիշի վրա նաև պատկերված է «Ծանրամարտի Եվրոպայի առաջնություն» գրությունը՝ հայերեն և անգլերեն:

Գեղաթերթիկի վրա պատկերված են 2023 թվականի ծանրամարտի Եվրոպայի առաջնության չեմպիոններ Գոռ Սահակյանը, Դավիթ Հովհաննիսյանը, Սամվել Գասպարյանը և Գարիկ Կարապետյանը: Գեղաթերթիկի վրա պատկերված է նաև ծանրամարտի Եվրոպայի առաջնության տարբերանշանը: Նամականիշը 10.000 տպաքանակով տպագրվել է Ֆրանսիայում:

Հիշեցնենք՝ Երևանում ապրիլին անցկացված ծանրամարտի Եվրոպայի առաջնությունում հայ ծանրորդները պոկում, հրում վարժություններում և երկամարտում ընդհանուր առմամբ նվաճել են 36 մեդալ, որից 12-ը՝ ոսկե, 11-ը՝ արծաթե և 13-ը՝ բրոնզե:

Տղամարդկանց հավաքականի կազմում ընդգրկված բոլոր 10-ը ծանրորդներն էլ մեդալների էին արժանացել Եվրոպայի առաջնությունում: Փաշիկ Ալավերդյանի գլխավորությամբ Հայաստանի հավաքականի կազմում Եվրոպայի չեմպիոն էին հռչակվել 67 կգ քաշային Գոռ Սահակյանը, 96 կգ քաշային Դավիթ Հովհաննիսյանը, 102 կգ քաշային Գարիկ Կարապետյանը և 109 կգ քաշային Սամվել Գասպարյանը:

89 կգ քաշային կարգում Եվրոպայի փոխչեմպիոն էր դարձել Անդրանիկ Կարապետյանը, 96 կգ քաշային կարգում՝ Արա Աղանյանը, իսկ գերծանր քաշայինների պայքարում՝ Վարազդատ Լալայանը: ԵԱ-ի բրոնզե մեդալներին արժանացել էինն 81 կգ քաշային Ռաֆիկ Հարությունյանը, 109 կգ քաշային Պետրոս Պետրոսյանը և գերծանր քաշային Սիմոն Մարտիրոսյանը:

Ծանրամարտի Եվրոպայի առաջնությունը լավագույնս կազմակերպելու համար ՀՀ վարչապետի աշխատակազմի ղեկավար Արայիկ Հարությունյանը և ԿԳՄՍ նախարարի տեղակալ Կարեն Գիլոյանը Եվրոպայի ֆեդերացիայի ղեկավարների կողմից արժանացել էին հուշանվերների:

GALLERY