Վճար` լեգիոներներին խաղացնելու համար. Ռաֆայել Նազարյանի առաջարկը

ԲԿՄԱ-ի գլխավոր մարզիչ Ռաֆայել Նազարյանն ArmSport-ի հետ զրույցում խոսել է Հայաստանի առաջնություններով լեգիոներների սահմանափակում մտցնելու անհրաժեշտության մասին.

«Առաջին խմբում այսքան մեծ թվով լեգիոներների առկայությունն ինձ համար ընդունելի չէ: Ի՞նչ գործ ունի 30-35 տարեկան արտասահմանցին Հայաստանի Առաջին խմբում: Ի՞նչ նպատակ են հետապնդում այդ թիմերը … որ զարգացնեն, հետո վերավաճառե՞ն, տրանսֆերնե՞ր անեն: Ինչի՞ մասին է խոսքը:

Յուրաքանչյուր ֆուտբոլիստ պետք է խաղա, որ առաջընթաց գրանցի: Բարձրագույն խմբում մարդիկ ասում են, որ լեգիոներների առկայությունը անհրաժեշտ է, քանի որ իրենք ցանկանում են Եվրոպա լիգայի կամ Չեմպիոնների լիգայի խմբային փուլ մտնել, բայց դա էլ չեմ հասկանում, քանի որ 28 տարի է` ոչ մի թիմի չի հաջողվում խմբային փուլ դուրս գալ: Բայց հատկապես Առաջին խմբում սա անթույլատրելի է: Հուսով եմ` առաջիկայում այս հարցը շատ կտրուկ կդրվի: Աշխարհի ոչ մի երկրում այսպիսի բան չկա»,- ասում է Ռաֆայել Նազարյանն ու նոր առաջարկով հանդես գալիս.

«Ինչ վերաբերում է Բարձրագույն խմբում լեգիորներների սահմանափակման հարցին, իմ առաջարկն այն է, որ լինի վճարովի … եթե թիմեր կան, որ ցանկանում են ԵԼ-ի կամ ՉԼ-ի խմբային փուլ մտնեն, թող մտնեն, մենք միայն ուրախ կլինենք, բայց դա թող անեն առանց ազգային շահերը վնասելու:

Այս պահին 16+7 սահմանափակումն է գործում, բայց ես առաջարկում եմ` 0-ից կամ 7-ից հետո ակումբները լեգիոներների համար վճարեն: Այսինքն 16-ից 7-ի դեպքում լինի անվճար սկզբունքով, իսկ մնացած 9-ի համար ակումբները վճարեն ու նոր միայն խաղացնեն: Կսպասենք 3 տարի, կտեսնենք`դուք վճարեցիք, մտա՞ք խմբային փուլ: Եթե չմտաք, նշանակում է`վնասեցիք մեր ազգային շահերը, հարգելի ակումբներ: Եթե վճարովի համակարգ ստեղծվի, արդեն ակումբներն էլ կկշռեն`այս կամ լեգիոներին թիմ բերե՞ն, թե՞ ոչ: Ստացվում է`յուրաքանչյուր մարդ, ով գալիս է ՀՀ-ում բիզնես հիմնելու, առաջին հերթին պետք է ծանոթանա հարկային օրենսգրքին, երկրի շահերից առավել բան գոյություն չունի: Խնդրեմ, վճարեք, խաղացրեք ինչքան ուզում եք: 3 տարի հետո կտեսնենք` ինչ արդյունք կունենանք»:

Ռաֆայել Նազարյանի խոսքով, այդ վճարներից գոյացած գումարները կուղղվեն մանկապատանեկան ֆուտբոլին ու այն թիմերին, որոնք ավելի շատ հայերի են խաղացնում.

«Ըստ սանդղակների, եթե մինչև 20 տարեկան երեխաներ են խաղում ԲԽ-ում, ուրեմն այդ թիմերին գումար կտրամադրվի: Մեկից կվերցնեն կտան մյուսին: Այս առաջարկը բանավոր տեսքով եմ ներկայացրել, դեռ չեմ զարգացրել, բայց կարծում եմ` դա լավ ու կիրառելի տարբերակ է, ու կան որոշ երկրներ, որտեղ այն հաջողությամբ կիրառվում է»,- ասում է Ռաֆայել Նազարյանը:

ԲԿՄԱ-ի գլխավոր մարզիչը մեզ հետ զրույցում անդրադարձել է նաև Խինես Մելենդեսի կազմած «Ազգային մարզումային ծրագրին»: Նազարյանն առաջիններից էր, որ սկսեց կիրառել այդ ծրագիրը.

«Ես աշխատում եմ այդ ծրագրով, մենք մինչև այդ էլ ծրագիր ունեինք, ու հիմա երկու ծրագրերը միասին համատեղել ենք, ինչը մեծ արդյունք է ցույց տվել: Մելենդեսի ու իր թիմի ծրագրի հիմնական շեշտադրումը վերաբերում է տակտիկային, ինչպես նաև տեխնիկական գործողություններին: Կարծում եմ` ավելի ինտենսիվ պետք է իսպանացիներն աշխատեն մարզիչներին ծրագիրը մատուցելու համար:

Շատ է խոսվում այն մասին, թե որքանով է Մելենդեսի ծրագիրը համապատասխանեցված մեր ֆուտբոլին ու մեր մենթալիտեին. իսկ ո՞րն է մեր ֆուտբոլը: Կարծում եմ` համաշխարհային ֆուտբոլում տենդենցները շատ դինամիկ զարգանում են, մենք էլ առավելապես պետք է նայենք ֆուտբոլային առումով եվրոպական գրանդ երկրներին, որտեղ ֆուտբոլը շատ զարգացած Է: Իհարկե, ես հասկանում եմ` մեր ֆուտբոլի առանձնահատկություններ ասելով ինչ նկատի ունեք` կառուցվածքային, ֆիզիկական տվյալներ, և այլ: Բայց այնպես չէ, որ իսպանացիները կամ բրազիլացիները շատ ուժեղ ֆիզիկական տվյալներ ունեն: Եթե մարդիկ կիրառում են ու զարգացում, աճ են ունենում, ուրեմն կարող ենք մենք էլ փորձել»,- ասում է Ռաֆայել Նազարյանը:

Նազարյանն ընդգծում է, որ այդուհանդերձ յուրաքանչյուր մոդել, յուրաքանչյուր մեթոդ սահմանափակ չէ: Դու կարող ես սեփական մտահաղացումներդ ներդնել այդ ծրագրերի մեջ.

«Վաղը կգա գերմանացի, կասենք մեզ հարմար չի այս մոդելը, հետո կգա հոլանդացի, կասենք մեզ հարմար չի այս մոդելը, այդպես չի լինում: Կան հիմնարար սկզբունքներ, որոնց առկայության դեպքում արդեն դու պետք է ավելացնես քո մտքերը որպես մարզիչ: Խոսքս մարզման մեթոդների մասին է: Խոսքն այստեղ ֆուտբոլիստների կառուցվածքի մասին չէ, այլ տակտիկայի, ինչը պարզից էլ պարզ է` խնդիրների լուծումն է»,- եզրափակում է իր խոսքը Ռաֆայել Նազարյանը:

Նարե Հովհաննիսյան