ՈւԵՖԱ ԵՎՐՈ Մ-21 որակավորման խմբային փուլի երկրորդ մրցափուլում Հայաստան Մ-21 հավաքականն ընդունել էր Ֆարերյան կղզիների իրենց տարիքայինների ընտրանուն ու հաղթանակ տարավ։ Խաղն ավարտվեց 2-0 հաշվով։
Հաղթանակից հետո կայացած մամուլի ասուլիսի ժամանակ մեր ընտրանու գլխավոր մարզիչ Ռաֆայել Նազարյանն ասաց հետևյալը․
«Բարդ հանդիպում ստացվեց։ Շատ լավ ճանաչելով մրցակցին՝ գիտեինք, որ շատ բարդ հանդիպում է սպասվելու։ Համբերատար էինք ամբողջ խաղի ընթացքում և սպասում էինք մեր շանսին ու մեր պահերին։
Մինչ ընտրական փուլը սկսելը հայտարարել էի, որ Ֆարերները շատ լավ հավաքական ունի և դրանում ես ևս մեկ անգամ համոզվեցի։ Շատ ամուր թիմ է։
Հիմա խոսենք մեր մասին։ Հաշվի առնելով այն, թե մեր թիմն ինչ ֆուտբոլ է ցույց տալիս, չեմ ուզում շատ բարձրագոչ բառեր ասել, բայց ուզում եմ վստահեցնել, որ մենք խաղից խաղ կբարելավենք թե՛ խաղի որակը, թե՛ արդյունքները։
Այսօր դրական տեղաշարժն այն էր, որ տղաները, խաղալով Պրեմիեր լիգայում, բարձր տեմպին սովոր են, իսկ միջազգային խաղերում դա շատ կարևոր է, ինչն այսօր բացահայտ երևաց։ Հուսով եմ՝ մյուս խաղում էլ այսպես կլինի։
Ընդմիջմանը տղաներին ասացի, որ պիտի դաշտ դուրս գան՝ մտածելով, թե խաղի հաշիվը 0-0 է։ Ասացի, որ պիտի 2-րդ գոլը խփենք ու ցանկալի է՝ արագ։ Մի փոքր ուշ խփեցինք, բայց եղավ»։
