Բուդապեշտում շարունակվում է ըմբշամարտի օլիմպիական վարկանիշային մրցաշարը, որտեղ այսօր պայքարի են դուրս եկել ազատ ոճայինները:
57 կգ քաշային ազատ ոճային ըմբիշ Արսեն Հարությունյանը դուրս է եկել Բուդապեշտում ընթացող միջազգային վարկանիշային մրցավարի կիսաեզրափակիչ: Քառորդ եզրափակում հայ ըմբիշը 10-5 հաշվով վստահ առավելության է հասել Վրաստանի ներկայացուցիչ Բեկա Բուդիաշվիլիի նկատմամբ:
Տոկիոյի օլիմպիական ուղեգիր նվաճելու համար Հարությունյանը պետք է նվազագույնն ապահովի իր տեղը եզրափակում:
Արսենը պայքարը սկսել է որակավորման փուլից, որտեղ 10-2 հաշվով հաղթանակ է տարեկ Բուլղարիայի ներկայացուցիչ Ուլադիսլաու Անդրեյեուի նկատմամբ:
Կիսաեզրափակչում Արսեն Հարությունյանը կգոտեմարտի Ուկրաինայի ներկայացուցիչ Անդրեյ Յատցենկոյի հետ:
Բուդապեշտի մրցաշարում վստահ է մեկնարկել նաև 65 կգ քաշային Վազգեն Թևանյանը, որը դուրս է եկել կիսաեզրափակիչ:
Վերջինս որակավորման փուլում 11-0 հաշվով հաղթանակ է տարել բելառուս Վլադիմիր Դուբովի նկատմամբ, իսկ 1/8 եզրափակչում 7-5 հաշվով առավելության է հասել դարձյալ Բելառուսի ներկայացուցիչ Նիուրգուն Սկրյաբինի նկատմամբ:
Քառորդ եզրափակչում Թևանյանը մրցել է վրացի անվանի ըմբիշ, աշխարհի ու Եվրոպայի, ինչպես նաև 2016 թվականի Օլիմպիական խաղերի չեմպիոն Վլադիմիր Խինչեգաշվիլիի հետ ու 6-4 հաշվով գեղեցիկ հաղթանակ տարել՝ ապահովելով իր տեղը մրցաշարի կիսաեզրափակչում:
Թևանյանը ևս Օլիմպիական ուղեգիր կապահովի, եթե դուրս գա եզրափակիչ:
Հայաստանի մյուս ներկայացուցիչ, 74 կգ քաշային ազատ ոճային Հրայր Ալիխանյանը հաղթանակով է մեկնարկել որակավորման փուլում՝ 10-0 հաշվով առավելության հասնելով Ավստրիայի ներկայացուցիչ Սիմոն Մարչլի նկատմամբ, սակայն 1/8 եզրափակչում ցավալի պարտություն է կրել վրացի Ավթանդիլ Կենչաձեի հետ գոտեմարտում՝ 2-10 հաշվով:
Ալիխանյանը զրկվել է օլիմպիական վարկանիշային ուղեգրի համար պայքարելու հնարավորությունից, սակայն եթե Կենչաձեն դուրս գա եզրափակիչ, Հայաստանի ներկայացուցիչը սփոփիչ գոտեմարտ կանցկացնի բրոնզե մեդալի համար պայքարելու հանարվորություն ստանալու համար:
Ազատ ոճայինների պայքարում Հայաստանի վերջին ներկայացուցիչը՝ 86 կգ քաշային Հովհաննես Մխիթարյանը ևս զրկվել է ուղեգիր նվաճելու հնարավորությունից: Նա պայքարը սկսել է 1/8 եզրափակչից և պարտվել Թուրքիայի ներկայացուցիչ Օսման Գոջենին՝ 0-6 հաշվով:
Նշենք՝ հունահռոմեական ոճի ըմբիշները պայքարի դուրս կգան մարտի 20-ին:
