«Ռեալի» կիսապաշտպան Մարտին Էդեգորը վարձակալությամբ տեղափոխվեց «Արսենալ»։ Նորվեգացի կիսապաշտպանը «արքայական» ակումբ վերադառնալուց հետո չկարողացավ տեղ գտնել թիմի կազմում ու մրցաշրջանի մյուս հատվածը կանցկացնի լոնդոնյան թիմում։
Էդեգորը չկարողացավ խաղաժամանակ ստանալ մադրիդյան թիմում, քանի որ «Ռեալի» կիսապաշտպանության հիմնական երեք դեմքերը շարունակում են դոմինանտություն պահպանել։ Կազեմիրո-Մոդրիչ-Կրոս եռյակը անկասելի է, ու նրանց ներկայությունը բարդացնում է դաշտի միջին հատվածում այլ ֆուտբոլիստի հայտնվելու հեռանկարը։
Marca-ն վերհիշել է այն բոլոր «զոհերին», որոնք այս եռյակի «պատճառով» հեռացել են մադրիդյան թիմից։
Առաջինը Ասիեր Իլյարամենդին էր։ Տաղանդավոր իսպանացին «Ռեալ» էր տեղափոխվել որպես մեկնարկային կազմի ֆուտբոլիստ։ Սակայն Կազեմիրոն, որը նոր էր վերադարձել «Պորտուից», կարողացավ հաղթել իսպանացի ֆուտբոլիստին ու վաստակել տեղը մեկնարկային կազմում՝ միանալով Կրոսին ու Մոդրիչին։
Եռյակի դոմինանտությունից տուժված մյուս ֆուտբոլիստը Մատեո Կովաչիչն է։ Խորվաթ կիսապաշտպանը գերազանց ֆուտբոլ էր ցուցադրում այն 3 տարիներին, երբ «Ռեալը» հաղթում էր Չեմպիոնների լիգայի խաղարկությունը մեկը մյուսի հետևից։ Սակայն Կովաչիչը խաղում էր միայն այն ժամանակ, երբ Կրոսից, Կազեից ու Մոդրիչից որևէ մեկը չէր կարող մասնակցել խաղին։ Ի վերջո, Կովաչիչը տեղափոխվեց «Չելսի»։
Դանի Սեբալյոսը ևս խաղաժամանակ չունեցավ մադրիդյան թիմում ու ճիշտ Էդեգորի պես վարձակալությամբ հիմա «Արսենալում» է։ Նա «Ռեալ» էր տեղափոխվել «Բետիսից»՝ որպես ամենահեռանկարային իսպանացի ֆուտբոլիստներից մեկը, սակայն դեռևս չի գտել իր տեղը մադրիդյան թիմում ու դեռ հարց է՝ կկարողա՞ անել դա, թե՞ ոչ։
Չմոռանանք նաև Մարկոս Լյորենտեին, որը կարիերան շարունակեց Մադրիդի մեկ այլ թիմում՝ «Աթլետիկոյում»։ Լյորենտեն «Ռեալում» վստահություն ստացավ Սանտիագո Սոլարիի կարճ պաշտոնավարման ընթացքում։ Արգենտինացու հեռանալուց հետո նա տեղ չուներ թիմի մեկնարկային կազմում։
Այս երկար ցուցակի վերջին «զոհը» Էդեգորն է, որը դեռևս կես տարով է տեղափոխվել «Արսենալ»։ Սակայն ակնհայտ է, որ Մոդրիչի ու Կրոսի տարիքով պայմանավորված նորվեգացին ստանալու է իր շանսը «արքայական» ակումբում առաջիկայում։
