Կարեն Բարսեղյան․ Շուտով կմեկնեմ Աֆրիկա՝ Վանի համար ֆուտբոլիստներ ընտրելու

«Վան» ակումբի փոխնախագահ և գլխավոր մարզիչ Կարեն Բարսեղյանն ArmSport-ի թղթակցի հետ զրույցում պատմել է VBet Հայաստանի Գավաթի խաղարկության քառորդ եզրափակչի՝ «Նոայի» հետ Չարենցավանում անցկացրած խաղի (0:1), թիմի երկրպագուների, ձմեռային դադարի ընթացքում սպասվելիք աշխատանքների ու այլ հարցերի մասին․

«Պարզ էր՝ խաղալու էինք Բարձրագույն խմբի թիմի հետ, որը բավականին մոբիլ ու լուրջ մրցակից էր։ Փորձեցինք անել առավելագույնը։ Ունեինք հնարավորություններ ավելի արդյունավետ լինելու համար։ Գոլ խփելու շատ լավ պահեր ունեինք, բայց «Նոան» իսկապես բարձր որակներ ուներ ու արժանիորեն հաղթեց, ինչի առթիվ շնորհավորում եմ նրանց։

Փորձեցինք խաղալ հավասարը հավասարի հետ ու կարծում եմ՝ դա մեզ մոտ ստացվեց։ Ցավոք՝ մրցակցի բարձր կարգը բերեց նրան, որ, ի տարբերություն մեզ, իրենք օգտագործեցին ունեցած գոլային հնարավորություններից մեկը։

Ամեն դեպքում շատ գոհ եմ մեր ֆուտբոլիստների աշխատանքից ու շատ շնորհակալ եմ նրանց, քանի որ մինչև վերջ տրվեցին, նվիրվեցին ․․․ այսօր արդյունքը չեղավ, բայց գլոբալ առումով մեր առջև խնդիր էինք դրել այս տարի գոնե քառորդ եզրափակիչ մտնելու ու Բարձրագույն խմբի թիմ բերելու Չարենցավան։ Դա մեզ մոտ հաջողվեց։ Այս խաղից հետո շատ լուրջ հետևություններ կանենք, կհասկանանք՝ որտեղ թերացանք ու ինչ ունենք անելու, և կշարժվենք առաջ»։

«Վանը» Առաջին լիգայում առաջինն է՝ ըստ հաճախելիության։ Կարեն Բարսեղյանի խոսքով, դա իրենց գլխավոր հպարտությունն է․

«Մեր երկրպագուների հաճախելիությունն ամենաառաջին հպարտությունն ու հաղթանակն է մեզ համար՝ որպես ակումբ։ Ասեմ, որ մեր երկրպագուները տարբեր տարիքի, տարբեր շերտի ու տարբեր բնագավառների ներկայացուցիչներ են, որոնք ամեն խաղին ներկա են լինում։ Այսօր ունենք երկրպագուների մեծ բանակ, ինչը մեզ օգնում է ավելի լավը լինել։

Բնական է՝ շրջաններում կարոտ են մնացել ֆուտբոլի, մենք էլ հենց այդ պատճառով ենք մեր ակումբը հիմնել շրջանում, որպեսզի ապահովենք այդ մարդկանց ուրախությունն ու զարգացնենք ֆուտբոլը մարզերում»,- ասում է Կարեն Բարսեղյանը։

Խոսելով թիմի խաղամակարդակի մասին՝ Կարեն Բարսեղյանն ընդգծեց, որ որոշ թերացումներ ու բացթողումներ այնուամենայնիվ կան․

«Իմ թիմի խաղն ինձ երբեք, ոչ մի պարագայում չի բավարարում։ Միշտ աճելու ու զարգանալու տեղ կա։ Մեծ հաշվով դեռ ոչնչի չենք հասել։ Փորձել ենք ձևավորել թիմ, որը կունենա ամբիցիաներ։ Հիմա գնում ենք մեր ամբիցիաների հետևից։ Ունենք շատ թերացումներ, բացթողումներ, որոնց մասին պետք է շատ լուրջ մտածենք։ Փորձում ենք այդ ամենն աստիճանաբար շտկել ու շարժվենք առաջ։

Խաղային առումով էլ մտորումներ ունենք։ Իրոք այսօր մենք մրցունակ ենք։ Բայց մեր նպատակն այն չէ, որ մրցունակ լինենք Առաջին խմբում։ Ցանկանում ենք լինել լավագույնը, ու դրա համար ջանք ու եռանդ չենք խնայում»,- ասում է Կարեն Բարսեղյանը։

Խոսելով ձմեռային դադարի ընթացքում անելիքների մասին՝ Կարեն Բարսեղյանը հայտնեց, որ մոտ օրերս մեկնելու է աֆրիկյան երկու երկրներ՝ ֆուտբոլիստներ ընտրելու․

«Մեկ հավաք կանցկացնենք Հայաստանում․ դա հաստատ։ Երկրորդ հավաքի հետ կապված դեռևս հստակություն չկա։ Ունենք առաջարկ դրսում հավաք անցկացնելու, բայց այստեղ մի խնդիր կա։ Մոտ օրերս մեկնելու եմ Կոտ-դ՛իվուար և Գանա․ այնտեղ ունենք հստակ ծրագիր ֆուտբոլիստների հետ կապված։ Պետք է ֆուտբոլիստների ընտրենք, քանի որ թիմի կազմն ուժեղացման ու թարմացման կարիք ունի։ Վրաստանում հավաք անցկացնելու տարբերակ ևս ունենք, բայց իմ մեկնելով պայմանավորված՝ Վրաստան գնալու հարցը փոքր- ինչ բարդանում է։Մոտակա օրերին կհասկանանք»,- ասում է Կարեն Բարսեղյանը;

Հայաստանի Առաջին խմբի առաջնության 14 տուրից հետո «Վանը» մրցաշարային աղյուսակի երրորդ հորիզոնականն է զբաղեցնում՝ իր ակտիվում ունենալով 34 միավոր։ Առաջատարներ «Լոկոմոտվին» ու «Վեստ Արմենիային» Չարենցավանը ներկայացնող թիմը, որը մեկ խաղ պակաս է անցկացրել, զիջում է 6 միավորով։

Հաջորդ հանդիպումը «Վանը» կանցկացնի վաղը՝ նոյեմբերի 30-ին, Երևանում հյուրընկալվելով «Փյունիկ-2»-ին։

Նարե Հովհաննիսյան