Կիպրական «Օմոնիայի» գլխավոր մարզիչ Հենինգ Բերգն ու ֆուտբոլիստ Ջորդի Գոմեսը Չեմպիոնների լիգայի որակավորման առաջին փուլի՝ «Արարատ-Արմենիայի» հետ վաղը կայանալիք խաղից առաջ հեռավար եղանակով պատասխանել են լրագրողների հարցերին ու կիսվել սպասելիքներով.
«Անհամբերությամբ ենք սպասում վաղվա խաղին: Սա մեզ համար լավ մարտահրավեր է: Կփորձենք մեր ուժերի ներածին չափով անել ամեն ինչ»,- ասել է գլխավոր մարզիչը:
Ջորդի Գոմեսի խոսքով ևս իրենք ներդնելու են ողջ ուժերը՝ վաղվա խաղում ցանկալի արդյունքի հասնելու համար.
«Շատ ենք սպասում վաղվա խաղին: Նախորդ մրցաշրջանի արդյունքներով կարծում եմ՝ արժանի ենք այստեղ լինելուն: Ամեն ինչ կանենք վաղը հաջողության հասնելու համար»:
Հարց է հնչել այն մասին՝ ի՞նչ նշանակություն ունի թիմի համար այն փաստը, որ «Օմոնիան» 3 տարի անց դարձյալ եվրագավաթներին մասնակցելու հնարավորություն է ստացել, ինչին ի պատասխան, գլխավոր մարզիչ Հենին Բերգը նշել է.
«Ուրախ ենք, որ այստեղ ենք: Ամեն ինչ պետք է անենք առաջ գնալու ու մեր դիրքերը բարելավելու համար: Հնարավորություն ենք ստացել խաղալու եվրոպական ֆուտբոլի գլխավոր ակումբային մրցաշարում, ինչը շատ լավ է, լավ մարտահրավեր է: Դժվար է ասել, թե որքան հեռուն կկարողանանք գնալ այս մրցաշարում, բայց ամեն դեպքում մենք ամեն ինչ կանենք դրա համար: Հիմա միայն պետք է կենտրոնանանք վաղվա խաղի վրա»,- ասել է «Օմոնիայի» գլխավոր մարզիչը:
Իսկ արդյոք գլխավոր մարզչին անհանգստացնո՞ւմ է այն փաստը, որ վաղն իր թիմը 5 ամսվա դադարից հետո առաջին պաշտոնական հանդիպումն է անցկացնում, և արդյոք սա որոշակի առավելություն տալի՞ս է «Արարատ-Արմենիային».
«Այո, երկարատև դադարից հետո առաջին պաշտոնական խաղն ենք անցկացնելու, բայց միևնույն է մի օր պետք է անցկացնենք առաջին պաշտոնական խաղը: Շատ տարօրինակ տարի էր ու մրցաշրջան, բայց մենք լավ նախապատրասական փուլ ենք անցել, ընկերական խաղեր ենք ունեցել, այնպես որ կարծում եմ՝ լավ ենք պատրաստ վաղվա խաղին:Պատրաստ ենք սկսել պայքարը ՉԼ-ում:
Ինչ վերաբերում է «Արարատ-Արմենիային», ես նրանց մասին այդքան էլ շատ չեմ մտածում: Նախընտրում եմ մտածել մեր թիմի մասին»:
Հենինգ Բերգին հարց են ուղղել նաև այն մասին՝ արդյոք ձախողո՞ւմ կլինի, եթե «Օմոնիան» չհաղթահարի առաջին փուլի արգելքը.
«Իհարկե մենք ուրախ չենք լինի, եթե դուրս չգանք հաջորդ փուլ: Բայց սա ֆուտբոլ է, ամեն ինչ կարող է տեղի ունենալ: Ամեն դեպքում, հիասթափություն կլինի: Մենք լավ թիմ ունենք, պատրաստ ենք խաղին ու կարծում եմ՝ ավելի լավ տեսք ունենք»:
Մանրամասները՝ «Օմոնիայի» մամուլի քարտուղարության ներկայացրած տեսանյութում.
