Հիմա ու՞ր ես գնալու, Մարիո. Երբ փախչում ես սեփական Սատանաներից

«Ակնհայտ է, որ Մարիոն պետք է հեռանա ֆուտբոլից: Կարծում եմ, որ նրա գործակալ Մինո Ռայոլան պետք է իր վրա պատասխանատվություն վերցնի և զրուցի նրա հետ: Դրա փոխարեն նա Բալոտելիին ներկայացնում է որպես հռչակավոր չեմպիոն»:

Սրանք իտալացի հայտնի գործակալ Ֆուրիո Վալկարեջիի խոսքերն են, որոնց հետ դժվար է չհամաձայնվել:

Եթե փնտրում եք մի օրինակ, թե ինչպես կարելի է գետնով տալ սեփական կարիերան, ապա «Սուպեր Մարիոն» հենց ձեզ համար է ստեղծված:

«Բրեշիան» հայտարարեց, որ խզում է Բալոտելիի հետ կնքած պայմանագիրը: Որքան ծանոթ նախադասություն, այդպես չէ՞:

Ինչու՞ միշտ ես.

Ակամայից ուզում ես հարցնել. բա էլ ո՞վ, բարեկամ: Էլ ո՞վ կարող է սեփական կարիերային վերաբերվել նույնքան անպատասխանատու և փնթի կերպով:

Աստծուց պարգևած տաղանդը 30 արծաթով վաճառել Սատանային: Իսկ միգուցե վաճառելու կարիք չկա՞ր, միգուցե այն միշտ էլ Մարիոյի մե՞ջ է ապրել:

Այս դրվագից հետո Ռոբերտո Մանչինին այնքան էր զայրացել, որ հանդերձարանում մի քանի թիկնապահներ չէին կարողանում հանգստացնել նրան:

Ահա այստեղ է ողջ Մարիոն, այստեղ է տրվում «Ինչու՞ միշտ ես» հարցի պատասխանը»:

«Հույս ունեմ ՝ մի օր Մարիոն կզարթնի և կհասկանա, որ դեռ շարունակում է վատնել իր տաղանդը»,-ասել էր Մանչինին:

Նույնիսկ 2011/12 մրցաշրջանի «Քուինզ Պարկ Ռեյնջերսի» դեմ «Ոսկե խաղում» Բալոտելիի գոլային փոխանցումը Ագուերոյին, որից հետո «երկնագույնները» հռչակվեցին ԱՊԼ-ի չեմպիոն, չի կարող Մանչինիի ուղեղից ջնջել հարձակվողի այս արարքը:

Անհնար է հիշել գեթ մեկ թիմ, որտեղ այս տղան խնդիրներ չի ստեղծել իր շրջապատի համար:

«Ես շատ մարդկանց եմ ճանաչում, բայց Մարիոյի նման «ծիծեռնակ» դեռ չեմ տեսել:

Դպրոցում մեզ սովորեցնում էին մարդկային ցեղի էվոլյուցիայի մասին: Ես շատ լավ եմ հիշում այդ դասերը և կարող եմ հավաստիացնել ՝ էվոլյուցիան Բալոտելիի կողքով է անցել:

Մի օր քայլում էինք Մանչեսթերում. մեզ մոտեցավ մի վաճառական և առաջարկեց արծաթից պատրաստված զարդեր գնել:

Մարիոն թքեց դրանց վրա և ասաց, որ սևամորթները ստրուկներ չեն ՝ արծաթ կրելու համար:

«Ես ադամանդ եմ, իսկ դու ինձ արծա՞թ ես առաջարկում»,- ասաց Մարիոն:

Մի անգամ էլ նստած էինք լողափում և խոսում էինք ֆուտբոլի մասին: Հանկարծ նա ասաց. «Հիտլերը կարգին տղա էր: Եթե այստեղ լիներ, այս ապուշների գլուխները կմտցներ ավազի մեջ, իսկ դրանց մայրիկներին էլ կուղարկեր աշխատանքային գաղութներ: Նրանք կհասկանային, թե որն է իրական կարգապահությունը»:

«Ես չհասկացա, թե ում մասին էր նա խոսում: Որոշ ժամանակ անց տեսա, որ Մարիոն զզվանքով նայում էր լողափում խաղացող երեխաներին:

Բալոտելիի տեսակին պատկանող մարդիկ տախտակի են նման: Նրանց հարվածելիս ՝ դու ես վնասվում:

Չնայած, դժվար թե գտնեք նրա կրկնօրինակին»:

Սա էլ Բալոտելիի ընկեր՝ Կիրան Ռիչարդսոնի խոսքերն են:

Հավատացնում եմ, սա դեռ բավական նուրբ կարծիք էր Մարիոյի մասին: Կան շատ ավելի «հյութեղները», որոնց անդրադառնալու պարագայում իմ ամբողջ նյութը կազմված կլինի ուրիշի խոսքից:

Հարգում եմ ուրիշի խոսքը, բայց միշտ մտածում և եզրակացություններ եմ անում սեփական ուղեղով: Շատ հարմար բան է՝ ասեմ ձեզ:

Եվ այսպես, ինչու՞ վերջին շաբաթվա ընթացքում բոլորը սկսեցին խոսել Մարիո Բալոտելիի մասին:

Բանն այն է, որ իտալացի հարձակվողի ներկայիս ակումբը ՝ «Բրեշիան» այս շաբաթ հայտարարեց, որ մտադիր է վաղաժամ խզել Բալոտելիի հետ կնքած պայմանագիրը, քանի որ նրա խաղն ու մարզավիճակը հիասթափեցրել են ակումբին:

Ա Սերիայի ընթացիկ առաջնությունում նա մասնակցել է 19 հանդիպման և դարձել 5 գոլի հեղինակ: Թվում է ՝ այդքան էլ վատ չէ, սակայն Բալոտելիի մասին խոսելիս ֆուտբոլը միշտ չէ, որ առաջին տեղում է:

Բերեմ մի պարզ օրինակ. հունվարին կայացած «Կալյարիին» դեմ հանդիպումից ժամեր առաջ (2:0), Մարիոն այցելել էր գիշերային ակումբ: Մի կողմ թողնենք այն հանգամանքը, որ «Բրեշիան» թույլ չէր տվել նրան կարևոր խաղից առաջ զվարճանալ:

Մարիոյի դեպքում կանոններ խախտելը նույնքան սովորական է, որքան օրենսդիրների համար դրանք գրելը:

Գիշերային ակումբում 29-ամյա ֆուտբոլիստը վիճում է գրեթե բոլորի հետ (բացի մի վենեսուելացի բարմենից, ով այդ օրը աշխատանքի չէր եկել), նստում է իր Lamborgini-ն ու ի՞նչ է անում… ճիշտ եք, գնում է մեկ այլ գիշերային ակումբ: Ուղղակի մի հրաշք անձնավորություն:

Այդ «բարդ և խոտոր» ճանապարհին նա հանդիպում է մի շարք գիշերային և ցերեկային թիթեռնիկների, բզեզիկների ու նույնիսկ մի քանի խխունջիկների: Հիմա կասեք ՝ նյութի հեղինակը հաստատ սթափ վիճակում չէ:

Ցավոք, ես սթափ եմ, որքան երբևէ:

Բանն այն է, որ Բալոտելին այդ գիշեր ընդունել է մի շարք թմրադեղեր (հիմանականում թեթև և թույլատրված), որոնց ազդեցության տակ սկսել է չկապակցված մտքեր արտահայտել և «սավառնել երկնքում»:

Հաջորդ օրը նա մասնակցեց «Կալյարիի» դեմ հանդիպմանը, խաղադաշտում անցկացրեց ընդամենը 8 րոպե և արժանացավ կարմիր քարտի: Երևում է ակումբի բժիշկները կարծել են, որ հարձակվողը դրանից ավելի չի կարողանա խաղալ, բայց դա էլ չստացվեց:

Մի բան հստակ է, որ «Բրեշիայի» ղեկավարության համար սա դարձավ համաբերության բաժակի վերջին կաթիլը:

Եվ այստեղ սկսվեց իրական շոուն:

Բալոտելիից հրաժարվելու մասին որոշումից օրեր անց, նրա գործակալը՝ հայտնի Մինո Ռայոլան սպառնաց, որ իր հաճախորդի հետ միասին դատի են տալու իտալական ակումբին:

Ռայոլան հայտարարել էր, որ ակումբը կորոնավիրուսի թեստ չի անցկացրել Բալոտելիի համար, ինչը հետագայում հաստատել էր ինքը ՝ Բալոտելին:

Դրան ի պատասխան, «Բրեշիան» այս երկուսին մեղադրելու է կեղծ մեղադրանքների մեջ:

Հետո էլ կասեք ՝ ֆուտբոլ, ֆուտբոլ… ի՞նչ ֆուտբոլ, եթե ականատես ենք լինում մի բազմասերիանոց սերիալի, որտեղ գլխավոր հերոսները վերջում կպարզեն, որ քույր և եղբայր են:

Չնայած ՝ ոչ. սա այդ սերիալը չէ: «Բրեշիայի» և Մարիո Բալոտելիի «սիրո աշունն», ինչպես երևում է, իրոք է՛լ երբեք չի կրկնվի:

Իտալական ակումբի նախագահ Մասիմո Չելինոն վստահ էր, որ կարող է փոխել Բալոտելիի մտածելակերպը, կարող է վերակենդանացնել նրա կարիերան: Կյանքը ցույց տվեց, որ 29 տարեկան հարձակվողը դժվար թե կարողանա պայքարել «սեփական Սատանաների դեմ»:

Նա չի էլ ուզում փորձել, չի էլ փորձում ուզել: Ահա այսպիսի գլուխկոտրուկի է նման Մարիո Բալոտելի ֆուտբոլիստի կարիերան:

Այո, ժամանակին այս տղան իտալական ֆուտբոլի ապագան էր համարվում: Եվրո 2012-ի ընթացքում մեծապես նրա ջանքերի շնորհիվ Իտալիայի հավաքականը հասավ մինչև եզրափակիչ (այնտեղ պարտվեց Իսպանիային 0-4): Նա իր ներդրումն ունեցավ «Մանչեսթեր Սիթիի» չեմպիոնության մեջ, բայց այդպես էլ չկարողացավ ցուցադրել և օգտագործել իր ողջ ներուժը:

«Ինտեր», «Մանչեսթեր Սիթի», «Միլան», «Լիվերպուլ»,«Նիցցա», «Մարսել». այս բոլոր ակումբների մարզիչներն ասում են, որ կփոխեն նրա բնավորությունը, կստիպեն դառնալ ավելի պատասխանատու, բայց ինչպես ասում են ՝ ստիպողաբար Սալսա չեն պարում:

Հիմա ու՞ր ես գնալու Մարիո.

«Բրեշիա» տեղափոխվելուց առաջ էլ խոսում էին, որ Բալոտելին կարող է հայտնվել Բրազիլիայի առաջնությունում կամ MLS-ում: Վատ տարբերակներ չեն. այնտեղ էլ կան լողափներ, գիշերային ակումբներ ու կիսամերկ աղջիկներ:

Ակնհայտ է ՝ Մարիոն վաղուց ընտրել է իր ճանապարհը…

«Մենաստաններում կարող են կատարվել այնպիսի մեղքեր, որոնց չես հանդիպի շատ հասարակաց տներում: Վանականն է որոշում բացե՞լ Սատանայի առջև դռները, թե ՝ ոչ». Մորիս Դրյուոն

Նարեկ Գրիգորյան