Երեկ՝ փետրվարի 26-ին, ՈւԵՖԱ Կոնֆերենցիաների լիգայի 2025/26 մրցաշրջանի անցումային փլեյ-օֆֆի պատասխան խաղում նիդերլանդական «ԱԶ Ալկմարը» սեփական հարկի տակ 4-0 հաշվով հաղթեց Հայաստանի գործող չեմպիոն և գավաթակիր «Նոային»։
Նիդերլանդական թիմի գլխավոր մարզիչ Լերոյ Էխտելդը խաղից հետո կիսվել է տպավորություններով և վերլուծել իր թիմի ցուցադրած խաղը:
«Նախորդ հանդիպման համեմատ տեմպի մեծ տարբերություն կար։ Մարզումների ժամանակ արդեն նկատվում էր, թե ինչպես է մեր գաղափարը ձևավորվում, և այս խաղում մենք տեսանք, թե ինչպես դա իրագործվեց բուն խաղի ընթացքում: Տղաները շատ լավ արձագանքեցին և կատարեցին իրենց առջև դրված խնդիրը:
Ինչ վերաբերում է երկրորդ խաղակեսում առանցքային ֆուտբոլիստների (Կես Սմիթի և դուբլի հեղինակ Սվեն Մայնանսի) վաղաժամ փոխարինմանը, մենք պարզապես ցանկանում ենք նրանց առողջ պահել: Նրանք նոր են ապաքինվել, իսկ մենք առջևում դեռ շատ կարևոր հանդիպումներ ունենք, և ես ուզում եմ, որ նրանք անպայման մասնակցեն դրանց։ Սրանք հագեցած շաբաթներ են՝ մենք խաղից խաղ ենք գնում, բայց ես դրանից չեմ անհանգստանում»,- նշել է Էխտելդը նիդերլանդական մամուլի հետ զրույցում:
Հիշեցնենք, որ Երևանում կայացած առաջին խաղում «Նոան» հաղթել էր 1-0 հաշվով, սակայն ընդհանուր 4-1 հաշվով դիմակայության արդյունքում պայքարը 1/8 եզրափակիչում կշարունակի նիդերլանդական ակումբը:
