ՈւԵՖԱ Կոնֆերենցիաների լիգայի 2025/2026 մրցաշրջանի լիգայի փուլի 2-րդ տուրում Հայաստանի չեմպիոն «Նոան» այսօր՝ հոկտեմբերի 23-ին, կմրցի ռումինական «Ունիվերսիտատյա Կրայովայի» հետ։
Նախախաղային ասուլիսի ընթացքում մրցակցի 33-ամյա ավագ Նիկուշոր Բանկուն հայտարարել է, որ լի է վճռականությամբ և հավակնոտ նպատակներով։
«Հաստատ դժվար խաղ է լինելու։ «Նոան» ցույց է տվել, որ շատ ուժեղ թիմ է, և զուր չէ, որ հասել է այս փուլ։ Գիտենք, որ նրանք մեծ ջանքեր կգործադրեն այստեղ հաղթելու համար, բայց մենք էլ գիտենք մեր անելիքը։ Ամեն ինչ կանենք հաղթանակի հասնելու համար։
Մեզ համար շատ կարևոր են երկրպագուները։ Նրանց աջակցությամբ ենք հասել այստեղ։ Երբ նրանք մեր կողքին են, մենք լրացուցիչ առավելություն ենք ստանում։ Մենք ապացուցել ենք, որ տանը կարող ենք հաղթել ցանկացած մրցակցի։
Եվրոպայում խաղալը եղել է իմ երազանքներից մեկը։ Ցանկանում եմ դուրս գալ խմբային փուլից, եթե դա հնարավոր է, քանի որ դա մեծ նվաճում կլինի։
«Նոան» ուժեղ թիմ է, դժվարությամբ է գոլ բաց թողնում, բայց տանը մենք միշտ կարողացել ենք գոլ խփել»,- Բանկուի խոսքերն է մեջբերում Gsp.ro-ն։
Հանդիպումը կմեկնարկի Երևանի ժամանակով 23:00-ին։
