Հայաստանի ֆուտբոլի ֆեդերացիան ունի նոր նախագահ: Արմեն Մելիքբեկյանը ՀՖՖ 19-րդ արտահերթ ժողովի ժամանակ 13 կողմ ձայնով ընտրվեց այդ պաշտոնում: ՀՖՖ փոխնախագահ ընտրվեց Արմեն Նիկողոսյանը: Կազմավորվեց նաև նոր գործկոմը:
Արտահերթ ժողովի ավարտից հետո նորընտիր նախագահը պատասխանեց լրագրողների հարցերին.
Արտահերթ ժողովի մասին.
«Սրանք առաջին նման մթնոլորտում անցած ընտրություններն էին: Ես բոլորին սիրում ու հարգում եմ՝ թե նախկին, թե ներկայիս գործկոմի անդամներին ու պատրաստ եմ նրանց հետ աշխատել: Բացարձակապես չի նշանակում, որ եթե ինչ-որ մեկը հրապարակայնորեն կամ ոչ բացեիբաց դեմ է արտահայտվել ինձ, ապա հայկական ֆուտբոլում անջրպետ լինելու է. ո՛չ, նման բան չի լինելու: Ես նրա համար եմ, որ նման բաներ չլինեն: Ես մի մարդ եմ, ով երբևէ որևի ակումբի չի սատարել, և ես օգնելու եմ բոլոր ակումբներին:
Ծրագրերի մասին.
Ես անընդմեջ խոսել եմ մարզչական ազգային ծրագրից, ռազմավարությունից: Ամենակարևորը, որ ես մշտապես խոսել եմ Պրոֆեսիոնալ ֆուտբոլային լիգայի ստեղծման մասին: Դա շատ կարևոր հարց է, որը ես պատրաստվում եմ ակումբների հետ քննարկել ու կյանքի կոչել: Մեր նպատակը ֆուտբոլ խաղացող մարդկանց քանակի ավելացումն է, ֆուտբոլի տարբեր ձևերի զարգացումն է: Շատ հեռանկարում ունենք նաև լողափնյա ֆուտբոլի ծրագիր: Եթե 2025 թ-ից շուտ հասնենք որևէ նպատակի, բնականաբար մենք մոդիֆիկացնելու ենք ռազմավարությունը:
Ո՞վ էր, ի վերջո, իշխանության թեկնածուն.
Մի քանի օր առաջ մյուս թեկնածուն մամուլին ասաց, որ իշխանության թեկնածուն ինքն է (եթե չեմ սխալվում): Ես խուսափել եմ մինչև վերջ խոսել այդ թեմայով: Իմ լայն քաղաքական գործունեության կոնտեքստից հանվել են որոշ կտորներ ու ինչ-որ կերպ դա հրամցրել են: Ես ասել եմ, որ մեկ տարի աշխատել եմ ՀՖՖ նախագահի տեղակալի պաշտոնում, ով նաև ԱԱԾ պետն էր: Եթե որևէ կերպ ես «հակահայ» գործունեություն ծավալեի, ես չէի աշխատի այդ պաշտոնում. վստահեցնում են: Դրանք դատարկ շահարկումներ են: Ես ֆուտբոլի նվիրյալ եմ, դրա մասին կփաստեն շատերը: Մեզ այսօր պետք է միասնականություն: Հայկական ֆուտբոլը պետք է վերջապես նոր մակարդակի դուրս գա. նախադրյալներ կան:
Մարինա Թաշչյանը միտք հնչեցրեց, որ այս ամենի պատճառով Մխիթարյանին կարող են չհրավիրել հավաքական:Մելիքբեկյանն արձագանքեց հետևյալ կերպ.
Նախ, հնարավոր չէ նման բան, ես չեմ կարող նման բան պատկերացնել: Հավաքականի կազմն ընտրում է մարզիչը, և ես չեմ կարող պատկերացնել մի մարզչի, ով Մխիթարյանին չի հրավիրի հավաքական: Կարծում եմ , որ դա էմոցիոնալ հայտարարություն է: Ես շատ հարգում եմ Մարինա Թաշչյանին, բայց նման բան հնարավոր չէ:
Ընտրությունների կազմակերպման ընթացքում գործունեության մասին.
Ես ընտրությունների կազմակերպմամբ չեմ զբաղվել: Միայն մեկ անգամ եմ խառնվել, երբ խնդրել եմ Սուրեն Բաղդասարյանին հավատարմագրել: Ինձ ասացին, որ բոլոր հիմքերը եղել են չհավատարմագրելու համար, բայց ես խնդրեցի, որ հավատարմագրեն:
Նոր գործկոմի հետ աշխատանքի մասին.
Պատրաստ եմ աշխատել նոր գործկոմի հետ: Իհարկե, դեռևս չենք ունեցել նիստ, որ իմանանք ինչպես ենք աշխատելու, բայց ես այս ամենը կառուցողական եմ պատկերացնում: Ունենալու ենք բաց քննարկումներ: Ամեն անգամ , գործկոմի նիստից հետո, եթե ցանկություն ունենան լրագրողները, կարող եմ հանդիպման ժամանակ պատմել այն ամենի մասին, ինչ քննարկվել է: Հետագայում կարող եք ստուգել, թե ես ճիշտ եմ խոսել, թե՝ ոչ: Քննարկում կունենամ գործկոմի և իրավաբանական ծառայության հետ՝ հասկանալու համար՝ հնարավո՞ր է նիստերը բաց անցկացնել, թե՝ ոչ, քանի որ կարող են լինել առևտրային ու ֆինանսական գաղտնիքներ:
Գլխավոր քարտուղարի մասին.
Այդ հարցին մի փոքր ուշ կանդրադառնամ: Ունեմ իմ մտքում տարբերակներ, բայց այս հարցին կանդրադառնանք ավելի ուշ:
Մարինա Թաշչյանն ասաց, որ խաղերից մեկի ժամանակ հավաքականի հետ եղել են նաև Մելիքբեկյանի ազգակիցները: Նորընտիր նախագահը տվեց հետևյալ պատասխանը.
Հայաստանի ֆուտբոլի ֆեդերացիայի հաշվին ոչ մի մարդ հավաքականի ինքնաթիռով, հավաքականի հետ չի մեկնել արտերկիր: Իմ և Արթուր Վանեցյանի երկուական բարեկամ մեկնել են մեկ անգամ Լիխտենշտեյն: Նրանք են վճարել իրենց բոլոր ծախսերի դիմաց: Բոլոր անդորագրերը պահպանված են, և ես կարող եմ ներկայացնել: Մենք ֆուտբոլիստների համար ինքնաթիռում անհարմարություններ չենք ստեղծել: Ֆուտբոլիստները միշտ ունեցել են ազատ շարժվելու ու հանգստանալու հնարավորություն: Ամենակարևորը. ամեն ինչ որոշում է հավաքականի մարզիչը: Եթե նա ասի, որ հավաքականից զատ ոչ ոք չպետք է լինի ինքնաթիռում, ապա այդպես կլինի:
Չկա՞ մտավախություն, որ այս ամենի հետևանքով կարող են սրվել ֆեդերացիա-Մխիթարյան հարաբերությունները:
Ինչ վերաբերում է Մխիթարյանին, ապա կներեք, բայց ես բացառում եմ, որ նման բան կլինի, քանի որ Հենրիխը խաղում է իր երկրի, հայաստանցիների, իր դրոշի համար և չպետք է շահարկել դա:
Դենիս Ջորկաևֆի հետ համագործակցության մասին.
Դենիս Ջորկաևֆի հետ անընդհատ կապի մեջ ենք, ճշտում ենք մեր համագործակցության ծրագիրը, առաջիկայում ասուլիս կհրավիրենք ու մանրամասն կխոսենք:
Խորեն Հովհաննիսյանի հետ հնարավոր համագործակցության մասին.
Ես հանդիպել եմ նրա հետ 2 անգամ: Պայմանավորվել ենք, որ միասին որոշ ծրագրեր իրագործենք. ձևաչափը դեռ քննարկվում է: Առաջիկա օրերին կհանդիպեմ պարոն Հովհաննիսյանի հետ՝ կոնկետ առաջարկներով»,-եզրափակեց ՀՖՖ նախագահը:
