Կորոնավիրուսի համավարակի ի հայտ գալուց հետո սպորտային դադար էր ողջ աշխարհում։ Մարզիկները զրկված էին նաև մարզվելու հնարավորությունից։ Թեև մայիս ամսից ՀՀ Պարետատունը թույլատրեց որոշակի սահմանափակումներով վերադառնալ սպորտային գործունեությանը, սակայն այդ սահմանափակումները շատ դեպքերում արգելք դարձան հատկապես կոնտակտային մարզաձևերի ներկայացուցիչների համար։
Կարանտինի հետ կապված՝ մարզումներն այսօր կղզիացած են, համատեղ պարապմունքներ այս պահին չկան։ ArmSport-ի հետ զրույցում ասում է հունահռոմեական ոճի ըմբշամարտի հավաքականի գլխավոր մարզիչ Էդուարդ Սահակյանը՝ ավելացնելով, որ մարզիչները վերահսկում են մարզումները։
«Անհատական մարզիչները հետևում են մարզումներին։ Երբեմն 7-8 հոգանոց խմբերով են մարզվում, արագաուժային վարժություններ անում։ Բայց 15-20 հոգանոց մարզումներ չկան, գորգային աշխատանքներ չեն լինում»։
Այս խնդրով ՀՀ Պարետատուն կամ այլ համապատասխան կառույցի չեն դիմել, նրանք վարակի վտանգը վերացնել չեն կարող։
«Եթե կառույցի դիմենք, ի՞նչ կարող են անել, եթե վարակի վտանգ կա։ Կարո՞ղ են վտանգը չեզոքացնել։ Ո՛չ։ Հիմա դիմելու կարիք չենք տեսնում։ Եթե օրացույցը լինի, կփորձենք Ձեր ասածն իրականացնել»,- ասում է Սահակյանը։
Սպասվում է, որ օրերս կհրապարակվի միջազգային ֆեդերացիայի օրացույցը, ինչի պատճառով էլ հետաձգել են մարզիչների ժողովը։
«Ուզում էինք երկուշաբթի մարզիչներով հավաքվել մեր հետագա պլանների համար, բայց որոշեցինք սպասել մի քանի օր մինչև միջազգային ֆեդերացիան ժամկետները հայտնի, մենք էլ մեր անելիքները պլանավորենք»,-բացատրում է հավաքականի գլխավոր մարզիչը, որին խնդրեցինք նաև անդրադառնալ ըմբշամարտի միացյալ աշխարհի (UWW) գործկոմի անդամ Նամիգ Ալիևի խոսքերին, թե հունհռոմեական ոճի ըմբշամարտը կարող է հանվել 2024-ի Օլիմպիական խաղերի ծրագրից։
«Դա, գուցե, իր կարծիքն է։ Մենք այն չենք կիսում։ Դա կարող է միայն կարծիք լինել, պաշտոնական ոչինչ չկա։ Ամենքը մի բան ասում է, բայց մենք դա հիմք չենք ընդունում։ Ես չեմ պատկերացնում, որ այս գեղեցիկ, կայացած սպորտաձևը հանվի, դրա տեղը ի՞նչ պիտի մտցնեն։ Չեմ կարծում, որ այդպիսի բան անեն»,-հույս հայտնեց Սահակյանը։
Ստելլա Բաբլոյան