29-ամյա իսպանացի ֆուտբոլիստ Տոնի Դովալեն կորոնավիրուսի համաճարակի պատճառով երկրում ստեղծված ճգնաժամային իրավիճակի պայմաններում որոշել է ժամանակավորապես կիրառել իր երկրորդ մասնագիտությունն ու աշխատել Գալիսիա քաղաքի՝ իր ընտանիքին պատկանող դեղատանը՝ փորձելով հնարավորինս օգտակար լինել իր ժողովրդին:
ArmSport-ը բացառիկ հարցազրույց է ունեցել «Սելթայի», «Լեգանեսի» և «Ռայո Վալեկանոյի» նախկին ֆուտբոլիստի հետ։
«Նախատեսում էի ուղևորվել Ասիա ու միանալ իմ նոր թիմին, բայց հանկարծ ամեն ինչ բարդացավ՝ կորոնավիրուսի համաճարակի տարածման պատճառով: Ասիայի իշխանություններն արգելեցին եվրոպացիների մուտքն իրենց երկրների տարածք, այդ իսկ պատճառով չկարողացանք իրականացնել գործարքն ու պայմանագիր կնքել: Մի քանի օր անց ծայրահեղ իրավիճակ հասունացավ Իսպանիայում ու մինչև հիմա էլ այն շարունակվում է. մարդիկ տանից դուրս են գալիս միայն խիստ անհրաժեշտության դեպքում՝ մթերային խանութ կամ դեղատուն գնալու համար: Օրական հարյուրավոր մարդիկ են մահանում Իսպանիայում, հիվանդանոցներն ամբողջովին կաթվածահար են եղել, ստեղծվել է մի իրավիճակ, երբ դեղորայքի և ալկոգելի խիստ պակաս կա: Մարդիկ տառապում են: Ես նաև դեղագետի որակավորում ունեմ, որոշեցի այս կերպ օգտակար լինել իմ ժողովորդին, հատկապես մի իրավիճակում, երբ բոլոր առաջնությունները դադարեցված են, ֆուտբոլ խաղալ հնարավոր չէ: Մարդկանց օգնելը հիմա ամենակարևորն է»,- մեզ հետ զրույցում ասում է Տոնի Դովալեն:
Դովալեի խոսքով իր նպատակը շարունակում է մնալ ֆուտբոլ խաղալը, բայց միայն այն ժամանակ, երբ կորոնավիրուսով պայմանավորված ճգնաժամային իրավիճակը կավարտվի.
«Հիմա մարդկանց օգնելու ու միասին այս իրավիճակը հաղթահարելու ժամանակն է»:
Իսպանացի ֆուտբոլիստի խոսքով, իրենց քաղաքում այնքան շատ մարդիկ չեն մահանում, որքան՝ մայրաքաղաք Մադրիդում.
«Բարդ ժամանակներ են: Բայց, բարեբախտաբար, մեր քաղաքում իրավիճակն այնքան վատ չէ, որքան Մադրիդում. Մադրիդը կաթվածահար է:
Մեզ մոտ էլ հիվանդանոցներում ազատ տեղ չկա, մարդիկ մահանում են, բայց ոչ այնքան շատ, որքան՝ Մադրիդում: Շատերը մահանում են, իսկ նրանց ընտանիքները նույնիսկ հրաժեշտ տալու հնարավորություն չունեն: Շատ ցավալի իրավիճակ է, այդ իսկ պատճառով որոշեցի օգնել:
Չեմ կարծում՝ այս իրավիճակը 2-3 ամսից ավելի շուտ կավարտվի, քանի որ վարակումների ու մահացածությունների թիվն ամեն օր դեռ աճում է: Բայց բոլորս լիահույս ենք ու անհամբերությամբ ենք սպասում, թե երբ ենք վերադառնալու մեր սովորական կյանքին, արդեն կարոտել եմ ֆուտբոլն ու խաղադաշտը: Ամեն առավոտյան տանը մարզումներ եմ անցկացնում, փորձում եմ պահել մարզավիճակս, բայց դա հեշտ չէ»,- խոստովանում է Տոնի Դովալեն:
29-ամյա ֆուտբոլիստի խոսքով, Իսպանիայի իշխանությունները հիմա ամեն բան անում են, բայց ՝ շատ ուշ են սկսել այս ամենով զբաղվել.
«Հիմա ամեն ինչ արվում է, բայց շատ ուշ: Մենք շատ ավելի շուտ պետք է անհանգստանայինք այս իրավիճակով, ու վստահ եմ՝ շատ մարդիկ հիմա ողջ կլինեին: Սա ինձ մեծ ցավ է պատճառում: Տեսնել, թե ինչպես են քո երկրի մարդիկ մահանում, թե ինչ վիճակ է տիրում հիվանդանոցներում, թե որքան անհրաժեշտ պարագաների պակաս կա … շատ ցավալի է»:
Տոնին խոստովանում է՝ շատ հաճախորդներ զարմանում են իրեն դեղատանը տեսնելով.
«Շատերն են զարմանում, ասում եմ՝ այնտեղ եմ իրենց օգնելու համար: Նրանք դա իսկապես գնահատում են, ու ես շատ հպարտ եմ, որ կարողանում եմ ինձնից կախված ամեն բան անել: Զվարճալի է նաև այն, թե ինչպես այս թեման տարածվեց: Մի քանի օր առաջ ես դեղատանն էի ու պատահաբար սպասարկեցի մի լրագրողի, որը ճանաչեց ինձ: Ես նրան չէի ճանաչում, պարզապես օգնեցի, բայց նա երեկոյան զանգահարեց ու խնդրեց հարցազրույց տալ: Դրանից հետո աշխարհի տարբեր անկյուններից ինձ գրում են: Անսպասելի էր: Մինչ այդ ես աշխատում էի՝ առանց բացահայտելու ինքնությունս, չնայած գրեթե բոլոր հաճախորդներն ինձ ճանաչում էին, ու առանց այդ մասին որևէ գրառում անելու, բայց այդ լրագրողին հանդիպելուց հետո ամեն ինչ տարածվեց: Ամեն դեպքում ուրախ եմ, որ կարողանում եմ որևէ բանով օգնել: Հուսամ՝ մյուս հարցազրույցներս բացառապես ֆուտբոլի ու դրական երևույթների մասին կլինի»,- ասում է Դովալեն:
Դովալեն 2009-ից 2014 թվականներին է հանդես եկել «Սելթայում» և ակումբի կազմում ավելի քան 50 հանդիպում է անցկացրել:
Նարե Հովհաննիսյան
Տոնի Դովալեի հետ հարցազրույցի երկրորդ մասը կայքում կլինի շուտով
