«Բարսելոնայի» եզրային պաշտպան Ալեխանդրո Բալդեն հրաժարվել է տեղափոխվել Միլանի «Ինտեր»՝ թիմակիցների, մասնավորապես՝ Լամին Յամալի միջամտությունից հետո, որոնք համոզել են նրան մնալ կատալոնական ակումբում։
Ավելի վաղ գլխավոր մարզիչ Հանս-Դիտեր Ֆլիկն ու կատալոնական ակումբի ղեկավարությունը դեմ չէին ֆուտբոլիստի հեռանալուն, քանի որ նա կորցրել էր իր տեղը մեկնարկային կազմում։ Սակայն, ինչպես հաղորդում է El Nacional-ը, իրավիճակին միջամտել է ակումբի երիտասարդ առաջատարների խումբը։ Լամին Յամալը, Ֆերմին Լոպեսը և Գավին հանդերձարանում յուրօրինակ «դավադրություն» են կազմակերպել՝ համոզելով Բալդեին լինել համբերատար, հապշտապ քայլեր չձեռնարկել և շարունակել պայքարը հիմնական կազմում տեղ ունենալու համար։ Նշվում է, որ որոշիչ փաստարկ է դարձել հենց Յամալի կարծիքը, որը ֆուտբոլային դաշտից դուրս համարվում է Բալդեի ամենամտերիմ ընկերը։
«Բարսելոնան» իր հերթին պատրաստ էր բաց թողնել պաշտպանին առնվազն 50 միլիոն եվրոյի դիմաց։
Հիշեցնենք, որ Բալդեն 8 տարեկանից հանդես է գալիս «Բարսելոնայի» ակադեմիայում։ Նա իր նորամուտը «կապտանռնագույնների» գլխավոր թիմում նշել է 2021 թվականի սեպտեմբերի 14-ին՝ Չեմպիոնների լիգայի խաղարկության «Բավարիայի» դեմ խաղում (0-3)՝ փոխարինելով Ժորդի Ալբային։ Իսկ ահա Իսպանիայի առաջնությունում Ալեխանդրոն իր նորամուտը նշել է սեպտեմբերի 20-ին՝ մեկնարկային կազմում դուրս գալով «Գրանադայի» դեմ մրցավեճում (1-1)։
Բալդեի գործող պայմանագրի ժամկետը կատալոնական ակումբի հետ նախատեսված է մինչև 2028 թվականի հունիսի 30-ը, իսկ նրա տրանսֆերային արժեքը գնահատվում է 50 միլիոն եվրո։
