Քիշնևի «Զիմբրուի» գլխավոր մարզիչ Ալեքսանդր Պոկլոնսկին մեկնաբանել է Կոնֆերենցիաների լիգայի որակավորման երկրորդ փուլի՝ «Նոայի» դեմ կայացած առաջին հանդիպման (1:1) արդյունքը։
«Շատ բարդ մրցակից էր։ Կարծում եմ՝ դիտարժան խաղ ստացվեց, որը հետաքրքիր էր հանդիսատեսի համար՝ գոլային բազմաթիվ պահերով։ Հաշիվն արտացոլում է խաղի պատկերը։ Մրցակիցը շատ լավ էր նախապատրաստվել»,- Պոկլոնսկիի խոսքերն է փոխանցում Moldfootball.com-ը։
– Չե՞ք կարծում, որ փոխարինումները թուլացրին խաղը:
– Նման խաղի ռիթմի մեջ միանգամից մտնելը բարդ է։ Չեմ կարծում, թե փոխարինումները թուլացրին մեր խաղը։ Պարզապես այդ պահին «Նոան» ավելացրեց տեմպը։
– Կարո՞ղ էիք խուսափել փոխարինումներից:
– Կարող էինք, բայց որոշ խաղացողներ իրենք խնդրեցին փոխարինել իրենց։ Վնասվածքներ կային, և մենք ստիպված էինք փոփոխություններ կատարել։
– Կարո՞ղ էիք կրկնապատկել հաշվի առավելությունը։
– Իհարկե, կարող էինք։ Բայց դրա համար պետք էր գոլ խփել։ Եթե աչքի ընկնեինք ևս մեկ անգամ, անշուշտ, կկարողանայինք թելադրել մեր պայմանները։
– Ինչպե՞ս եք տեսնում պատասխան խաղը։
– Մենք այնտեղ հաստատ մեկնելու ենք արդյունքի ետևից։
– «Նոան» Ձեզ ինչ-որ բանով զարմացրե՞ց: Նրանք արդարացրի՞ն Ձեր սպասելիքները, թե՞ ավելին էին դրանցից։
– Նրանք ինձ առանձնապես ոչնչով չզարմացրին։ Բայց այս թիմն ինձ դուր եկավ։ Երևում է, որ ֆիզիկապես նրանք դեռ օպտիմալ մարզավիճակում չեն, քանի որ նրանց առաջնությունը դեռ չի սկսվել։ Բայց, ընդհանուր առմամբ, շատ լավ թիմ է։
Հիշեցնենք, որ մրցող թիմերի միջև պատասխան հանդիպումը կկայանա հուլիսի 30-ին։
