Մյունխենի «Բավարիայի» կիսապաշտպան Լեոն Գորեցկան որոշել է ուժերը փորձել Անգլիայի Պրեմիեր լիգայում։ Ինչպես հաղորդում է -ը, 31-ամյա գերմանացի ֆուտբոլիստը պատրաստվում է համալրել Լոնդոնի «Արսենալի» կազմը։
Ավելի վաղ «զինագործները» ևս հաստատել էին իրենց հետաքրքրությունը փորձառու կիսապաշտպանի նկատմամբ։ Գորեցկայի գործող պայմանագիրը մյունխենյան ակումբի հետ ավարտվում է ընթացիկ տարվա հունիսի վերջին, ինչը նրան հնարավորություն է տալիս դիտարկել կարիերայի զարգացման նոր տարբերակներ։
Հիշեցնենք, որ ավելի վաղ նաև «Բավարիայի» մարզական տնօրեն Քրիստոֆ Ֆրոյնդը հաստատել էր տեղեկությունն այն մասին, որ Գորեցկան ընթացիկ մրցաշրջանի ավարտից հետո կհեռանա ակումբից։
Այս մրցաշրջանում գերմանացի կիսապաշտպանը Բունդեսլիգայի շրջանակներում մասնակցել է 18 հանդիպման և դարձել 1 գոլի հեղինակ։ Հիշեցնենք, որ Գորեցկան «Բավարիայի» գույները պաշտպանում է 2018 թվականի ամառվանից։ Նրա տրանսֆերային արժեքը գնահատվում է 15 միլիոն եվրո։
