Ժոան Լապորտան «Բարսելոնան» համեմատել է Ֆորմուլա 1-ի մեքենայի հետ։
«Մենք շատ նուրբ ֆինանսական վիճակում ենք։ «Բարսան» Ֆորմուլա 1-ի մեքենա է, և մենք այն գտել ենք առանց բենզինի և չաշխատող շարժիչով։ Ցանկացած այլ ընկերություն արդեն լուծարված կլիներ, բայց մենք սկսեցինք աշխատել՝ կրճատելով պարտքերը, կրճատելով աշխատավարձերը, ավելի շատ եկամուտ ստանալով հովանավորներից, այդ թվում՝ Spotify-ի նման համաշխարհային ապրանքանիշերի հետ գործարքների միջոցով։
Մեզ հաջողվեց գործի դնել մեքենան, բայց այն չգործարկվեց, և մենք մտածեցինք մեխանիզմներն ակտիվացնելու մասին՝ մեր ունեցած ակտիվներով ակումբի տնտեսությունը վերականգնելու համար։ Նպատակն այն է, որ «Բարսան» միշտ պատկանի ակումբի անդամներին։
Մենք նորից կունենանք մեր սեփական միջոցները, կկարողանանք խելամիտ կերպով մարել պարտքը, կկարողանանք ներդրումներ կատարել մեր թիմերում։ Մենք մեքենան տանում ենք փիթ-ստոպ՝ որոշ ճշգրտումներ կատարելու համար, այնուհետև գնում մրցավազքի՝ այն հաղթելու համար:
Մենք ցանկանում ենք, որ «Բարսան» կարողանա մրցակցել միլիոնատերերին պատկանող ակումբ-պետությունների հետ: Եթե մենք շարունակենք կորուստներ կրել, մեր մրցակիցները և տարբեր կազմակերպություններում իշխանության ղեկին կանգնած մարդիկ շատ խոչընդոտներ կդնեն մեր ճանապարհին»,- ասել է «Բարսելոնայի» նախագահը ակումբի անդամների համագումարում, հայտնում է Mundo Deportivo-ն:
