«Շիրակ» ֆուտբոլային ակումբի «Սև Հովազներ» ֆան ակումբը հայտարարությամբ է հանդես եկել՝ բաց նամակով դիմելով ՀՖՖ-ի ղեկավարության, մասնավորապես ֆեդերացայի նախագահ Արմեն Մելիքբեկյանին և փոխնախագահ Արմեն Նիկողոսյանին։
Հայտարարության մեջ մասնավորապես ասվում է․
«Սև Հովազներ» ֆան ակումբը մայիսի 13-ին կայացած խաղին պատրաստվել էր աննախադեպ և մեծ տոն կազմակերպել Վազգեն Սարգսյանի անվան «Հանրապետական» մարզադաշտում։ Դուք, նախկինում երբ լրագրողներ էիք, ձեր հաղորդաշարերի ընթացքում բազմիցս եք անդրադարձել մեր ֆան ակումբի գործունեությանը և բազմիցս եք նշել, որ հաճույք եք ստացել մեր երկրպագուների թիմին ցուցաբերած աջակցությունից ու ցանկություն հայտնել, որ այն էլ ավելի զարգանա ու ավելի գեղեցիկ լինի։
«Սև Հովազները» յուրօրինակ ձևով էին պատրաստվել այս եզրափակիչ խաղին և հայկական ակումբային ֆուտբոլի համար աննախադեպ գունագեղ ծրագիր էին մշակել մարզադաշտում թիմին աջակցելու և մեր ու մյուս բոլոր «չեզոք» երկրպագուների օրը ֆուտբոլային տոնի վերածելու համար։
Խաղի համար պատրաստել էինք հազարից ավելի փոքր, մոտ հինգ տասնյակ միջին ու մեծ դրոշներ։ Միագույն հարյուրավոր մայկաներ, բանդանաներ, շարֆեր։ Բազմաթիվ գունավոր ծխեր և միանգամայն անվնաս գեղեցիկ սառը ֆեյերվերկներ։
Վստահ ենք, որ լինելով ֆուտբոլային աշխարհի մարդիկ, բոլորս ենք տեսել, թե ինչ գեղեցիկ տեսարան են ստանում երկրպագուները, այլ առաջնություններում և գավաթային եզրափակիչում՝ կիրառելով այս բավականին անվնաս (նշել ենք բավականին,որովհետև մեծ ցանկության դեպքում մարդու առողջության համար էլ ավելի վնասակար կարելի է համարել սովորական բռունցքով հարվածը) միջոցներն ու թափահարելով դրոշները։
Մեր առաջնության խաղերին ևս, թեև փոքր մասշտաբներով, բայց օգտագործվել են նման միջոցներ և ոչ մի արտառոց դեպք չի գրանցվել։ Դեռ ավելին՝ ավելի է գեղեցկացվել խաղը։ Դե իսկ դրոշները միշտ ամրացված են եղել ձողերին։ Բայց…
Չգիտես ինչի, հենց մեր երկրպագուներին եզրափակիչ խաղի օրը արգելեցին այս ամենը մտցնել մարզադաշտ։ Նշեցին, որ դրանք օրենքով չեն թույլատրվում և մենք էլ ենթարկվելով օրենքին ներս չենք մտցրել սկզբում ոչ գունավոր ծուխերը և ոչ էլ դրոշի ամենաբարակ պլաստմասե ձողերը։
Այնուհետև սկսվեց ամենատարօրինակ ստուգումը այսպես կոչված անվտանգության աշխատակիցների կողմից։ Նախ մեզ ներս էին թողնում ընդամենը մի շարքով, չնայած կողքի մի քանի շարքեր ազատ էին, իսկ այնուհետև ամեն մի մայկայով, բանդանայով, փոքր դրոշով և այլ աքսեսուարով տոպրակ ստուգում 15-20 րոպե։ Երբ դա կարելի էր անել ընդամենը մեկ-երկու րոպեում՝ չնայած որ բոլոր տոպրակները թափանցիկ, պոլիէթիլենային էին։
Սա էլ դեռ ամենը չէ, երբ պարզվեց, որ այն ինչ մեզ թույլ չեն տալիս, դրա տասնապատիկ անգամ ավելի վտանգավորը թույլատրելի է դիմացի թիմի երկրպագուների համար և մենք մեղմ ասած կողմնապահության զոհ ենք դառնում՝ փորձեցինք որոշ աքսեսուարներ այնուամենայնիվ մտցնել մարզադաշտ։
Այս ամենի հետևանքով մեր ամենաակտիվ անդամների մեծ մասը մարզադաշտ մուտք գործեց խաղից ընդամենը մեկ-երկու րոպե առաջ, իսկ մյուս մասը՝ մինչև 20 րոպե ուշացումով (թեև մարզադաշտ ենք հասել խաղի մեկնարկից մեկուկես-երկու ժամ առաջ)։
Նախատեսվածը ամբողջությամբ բնականաբար չհաջողվեց իրագործել։ Շատերի տոնը պարզապես փչացավ։ Շատերի քրտնաջան աշխատանքն ուղղակի ջուրը լցվեց։
Իսկ մեր նպատակը մեկն էր՝ ՔԱՅԼ ԱՌԱՋ ԿԱՏԱՐԵԼ ՀԱՅԿԱԿԱՆ ԱԿՈՒՄԲԱՅԻՆ ՖՈՒՏԲՈԼԻ ԵՐԿՐՊԱԳՄԱՆ ՄՇԱԿՈՒՅԹՈՒՄ։
«Սև Հովազներ» ֆան ակումբը, «Շիրակ» ֆուտբոլային ակումբի բազմահազար երկրպագուների անունից պահանջ-խնդրանքով դիմում է ՀՖՖ ղեկավար անձանց բացատրելու, թե ինչպե՞ս է ստացվում, որ առաջնության խաղերին այդ աքսեսուարները «վտանգավոր» չէին և հանկարծ այդ խաղին դարձան վտանգավոր։ Միթե՞ առաջնության խաղին ներկա գտնվող երկրպագուների առողջությունը պակաս կարևոր է, այս մեկ խաղի երկրպագուների առողջությունից, որ այս անգամ այսքան խիստ էիք ԿԱՐԳԱԴՐԵԼ հսկել։
Եվ ԱՄԵՆԱԿԱՐԵՎՈՐԸ….Ինչպե՞ս է ստացվում, որ մեկին կարելի է ծածկի տակ հրավառություն կազմակերպել, իսկ մյուսին՝ չի կարելի ուղղակի սառը ֆեյերվերկ վառել։ Խնդրում ենք տալ սպառիչ բացատրություններ, և կամ եթե բաց նամակին չեք պատասխանում՝ մամուլի պատասխանատուի միջոցով նշել, թե ինչպես դիմել Ձեզ։
Ուղղակի ընտրեցինք հրապարակայնորեն դիմելու ձևը, ելնելով Ձեր իսկ շահերից, որպեսզի Ձեր նմանատիպ պատասխանը բոլորը տեսնելով նկատեն, որ հրահանգված կողմնապահություն չի եղել։ Ինչին ինքներս ենք ուզում անկեղծորեն հավատալ։
Հարգանքներով «Սև Հովազներ» ՖԱ խորհուրդ։
