Vbet ՀՊԼ 22-րդ տուրի «Նորավանք» — «Արարատ-Արմենիա» խաղից հետո «Նորավանքի» գլխավոր մարզիչ Վահե Գևորգյանը պատասխանել է լրագրողների հարցերին:
-Խաղը շատ ակտիվ սկսեցիք, սակայն իրար հետևից 2 գոլ ընդունեցիք: Ո՞րն էր պատճառը:
— Ճիշտ եք նկատել: Մենք ակտիվ սկսեցինք խաղը: «Արարատ-Արմենիան» միավորներ է կորցրել վերջին երկու խաղերում: Մենք գիտեինք, որ նրանք փորձելու են արագ հասնել հաջողության: Փորձեցինք ճնշել մրցակցին հենց իրենց կիսադաշտում: Ստացվեց ու առաջինը մենք ունեցանք գերազանց գոլային պահ, որը չօգտագործեցինք: Նման թիմերի դեմ այդպիսի հնարավորությունները չօգտագործելը կարող է բերել այսպիսի ելքի, ինչն էլ որ եղավ: Առաջին գոլի ժամանակ կոպիտ սխալ գործեցինք պաշտպանությունում: «Արարատ-Արմենիայի» ֆուտբոլիստներն արագ գրոհ կազմակերպեցին ու մեր տուգանային հրապարակում քանակական առավելություն ստացան: Երկրորդ գնդակը 11 մետրանոցից բաց թողեցինք, ու առաջին խաղակեսում մի փոքր անկարգապահ գործեցինք: Երկրորդ կեսում «Արարատ-Արմենիան» ավելի վստահ տեսք ուներ: Ուներ որակ, առաջնության առջատարն է, երևի այս ամենը հոգեբանորեն ազդեց ու խաղը տարան իրենց համար տրամաբանական ելքի:
-Այսօր ձեր թիմի փոխանցումների խոտանը շատ էր: Խոտածա՞ծկն էր պատճառը:
-Երկու թիմերն էլ նույն խոտածածկի վրա էին խաղում: Մի փոքր թաց էր՝ գնդակի արագությունն անսովոր էր, ամեն դեպքում, բաց թողած երկու գոլերից հետո լարվածություն ու շտապողականություն կար, երևի դա էր պատճառը:
-Հաշվի առնելով , որ «Նորավանքն» այս մրցաշրջանում չի պայքարում մրցանակային տեղերի համար, դժվար չէ՞ մոտիվացնել ֆուտբոլիստներին:
-Բացարձակ: Դուք ինձներդ ասեցիք, որ ավելի ակտիվ էինք սկսել խաղը: Սա այս տարվա 4-րդ խաղն է և եթե նույնիսկ երկրպագուի աչքով էլ նայեմ ՝մեր թիմում չեմ տեսնում մոտիվացիայի պակաս: Մենք պրոֆեսիոնալներ ենք և հասակնում ենք, որ առաջնությունը դեռ ավարտված չէ, հետևաբար չի կարող նման բան լինել:
-Հենրի Ավագյանը հրավիրվել է ազգային հավաքական: Ի՞նչ կասեք այդ մասին և Ձեր կարծիքով, թիմում կա՞ն էլի ֆուտբոլիստներ, որոնք արժանի են հավաքական հրավիրելուն:
-Նախ ես շնորհավորում եմ Հենրիին ու «Նորավանքին»: Ակումբի պատմության մեջ առաջին անգամ ֆուտբոլիստ հրավիրվեց ազգային հավաքական: Շնորհավորում եմ նրան, որ երկար ժամանակ բաց թողնելուց հետո, կրկին հրավիրվել է հավաքական, ինչը նրա համար կրկնակի պատասխանատվություն պետք է լինի: Մաղթում եմ հաջողություն նրան ու մեր ազգային հավաքականին: Իմ կարծիքով մենք ունենք ֆուտբոլիստներ, որոնցից ամենամոտը Արամ Քոչարյանն է, որը գնալով բարելավում է իր վիճակը, ու վստահ եմ, որ ոչ միայն մեր թիմն, այլ նաև հավաքականին ապագայում մեծ օգուտ կտա: Ինչևէ, դա Խոսակին Կապառոսի որոշելիքն է, բացի Քոչարյանից կարող եմ նշել նաև Արթուր Ավագյանի ու Արման Խաչատրյանի անունը:
