Խորհրդային ֆուտբոլիստ, «Արարատ-73»-ի լեգենդար մարզիչ, «Սպարտակի» բոլոր ժամանակների լավագույն ռմբարկու Նիկիտա Սիմոնյանն ArmSport-ին տված բացառիկ հարցազրույցում անդրադարձել է նաև Հայաստանի ազգային հավաքականին:
-Մեզ մոտ հիմա գլխավոր մարզչի հեռանալու թեման ակտուալ է։ Հետաքրքիր է` երբ կան հաղթանակներ, մեծարում են մարզչին, երբ պարտություն է գրանցվում, այնպիսի քննադատությունների տեղատարափ է սկսվում, որ կարծես հաղթանակներ երբևիցե չէին էլ եղել։ Ինչպե՞ս է հաջողվում վերականգնվել ճնշումների այդպիսի մեծ ալիքից հետո։
-Վերականգնվելն իսկապես հեշտ չէ, բայց, այնուամենայնիվ, վերականգնվել պետք է, քանի որ սովորաբար ասում են՝ «հաղթում է թիմը, պարտվում է մարզիչը»։ Շատ ծանր ու նյարդային աշխատանք է, բայց միևնույն ժամանակ դա ստեղծագործական աշխատանք է, բայց այստեղ պիտի լինի արդյունքը։ Երբ, օրինակ, ռեժիսորը ներկայացում է բեմադրում, և եթե հանդիսատեսին դուր չի գալիս, կարող են մի քիչ դժկամ դեմքերով հեռանալ։ Իսկ Ֆուտբոլում, երկրպագուները, հասկանում եք, կսկսեն և՛ վիրավորել, և՛ թույլատրելիի շրջանակներից դուրս գալ, և, իհարկե, այդ ամենը թափվում է հիմնականում մարզչի գլխին։
-Եթե Հայաստանի մասին խոսենք, ի՞նչն է Ձեզ հիմա կապում Հայաստանի հետ, բացի այն, որ դուք հայկական արմատներ ունեք։-
-Ես հայ եմ․․․ ու վերջ․․․ Հենց դա էլ ինձ կապում է Հայաստանի հետ։ Շատ վաղուց չեմ եղել Հայաստանում, առողջականիս պատճառով հիմա ավելի դժվարացել է ճամփորդելը։ Բնականաբար, ես հետևում եմ քաղաքական բոլոր իրադարձություններին, որ տեղի են ունենում Հայաստանում։
Իհարկե, ես կուզենայի, որ Հայաստանի ժողովուրդն ապրեր շատ ավելի բարեկեցիկ, քան այսօր է։ Հետևում եմ, իհարկե, հավաքականի ելույթներին։ Ցավոք, մենք ծանոթ չենք Հենրիխ Մխիթարյանի հետ, բայց հայրն ինձ մոտ էր խաղում։
-Նշեցիք, որ հետևում եք հավաքականի խաղերին, ի՞նչ դիտողություններ ունեք։
-Ոչ մի դիտողություն, միայն հաջողություն կարող եմ մաղթել։ Որևէ իրավունք չունեմ դիտողություն անելու։ Կան մարզիչներ, որոնք այդ գործն արդեն անում են։ Ես ունեմ միայն մեկ մաղթանք․ ՀԱՋՈՂՈՒԹՅՈՒՆ։ Կան մարզիչներ, որոնք թիմին պատրաստում են, և շատ լավ գիտեն բոլոր թերությունները։ Իմ կողմից էթիկապես սխալ կլինի խոսել նրանց սխալների կամ թերությունների մասին։ Հաջողություն եմ մաղթում ու վերջ․․․․
-Իսկ Հայաստանի Ազգային հավաքականի ֆուտբոլիստների շրջանում ունե՞ք ֆավորիտ, որին դուք հետևում եք, անհանգստանում եք։
-Ոչ, ոչ․․․ նոր սերունդ է, որոնց հետ ես գրեթե ծանոթ չեմ։
Նիկիտա Սիմոնյանի` ArmSport-ին տված բացառիկ հարցազրույցն ամբողջությամբ կներկայացնենք քիչ ուշ:
