1945 թվականից ի վեր առաջին անգամ թենիսի գլխավոր մրցաշարը՝ Ուիմբլդոնը չեղարկվեց։ Թագավորական դիտակետի ավանդույթներով հարուստ մրցաշարի 134-րդ սերիան կկայանա միայն 2021-ին։ Ինչու՞․ դե իհարկե, կորոնավիրուսի պատճառով։
Համաճարակը «պայթեցնում» է աշխարհը։ Երկրները պարզապես պարալիզացվել են, արվում է ամեն բան համավարակի տարածումը կանխարգելելու համար։ Այս ամենի ֆոնին ապրիլի 2-ի երեկոյան աշխարհում նոր տիպի կորոնավիրուսով վարակվածների ընդհանուր թիվը անցավ 1 միլիոնը։ Ցավալի օրեր են ու նաև պատմական, բայց վատ իմաստով։
Այո՛, կորոնավիրուսը պարալիզացրել է ու շարունակում է պարալիզացված պահել մարզական աշխարհը։ Սպորտային միջոցառումները մեկը մյուսի հետևից դադարեցվեցին, չեղարկվեցին տարվա գլխավոր երկու միջոցառումները՝ Տոկիո-2020-ն ու Եվրոպայի առաջնությունը։ Հերթը հասավ Ուիմբլդոնին։
Ուիմբլդոնը նախատեսված էր ամռանը։ Այն չեղարկվեց ապրիլի 1-ին։ Նույնիսկ լավագույն սցենարի դեպքում դժվար է պատկերացնելը, որ մրցաշարը կարող էր անցկացվել։ Եթե անգամ դրա հնարավորությունը լիներ, մրցաշարը անցկացվելու էր առանց հանդիսականների։ Իսկ All England Lawn Tennis and Croquet Club-ը, որը պատասխանատու է մրցաշարի անցկացման համար, հայտարարել էր, որ մրցաշարը առանց հանդիսականների չի անցկացվի։
Սա չափազանց մեծ կորուստ է թենիսի համար։ Ուիմբլդոնը ավանդույնթների մի ամբողջ պաշար է, բայց փաստը մնում է փաստ․ այն այս տարի չի կայանա։
Թենիսի երկրպագուներին այսքանից հետո հուզում է մեկ հարց․ իսկ ի՞նչ է լինելու Մեծ սաղավարտի մյուս երկու մրցաշարերի հետ։ Նրանցից մեկը՝ Ֆրանսիայի բաց առաջնությունը մայիսից տեղափոխվեց աշուն՝ սեպտեմբերի 20-ից հոկտեմբերի 4-ը, իսկ US Open-ը նախատեսված է Օգոստոսի 24-ից սեպտեմբերի 13-ը։
Այսպես, եկեք գանք հերթով։ Թենիսում բոլորն էլ գիտեն, որ կազմակերպչական առումով Մեծ սաղավարտի մրցաշարերից լավագույնը Ավտրալիայի բաց առաջնությունն է ու Ուիմբլդոնը։ Երբ Ուիմբլդոնի պես կարևորագույն մրցաշարը արդեն ապրիլի 1-ին անկարողություն է հայտնում մրցաշարի անցկացման, ապա ի՞նչ են անելու Միացյալ Նահանգների թենիսի ֆեդերացիան ու Ֆրանսիայի թենիսի ֆեդերացիան։
Նախ եկեք հասկանանք, թե ինչպիսին է համաճարակային իրավիճակը այս երկրներում։ Միացյալ Նահանգները խորը ճգնաժամի մեջ է։ Վարակակիրների թիվը անցնում է 240 հազարը։ Այստեղ կա ևս մեկ կարևոր փաստ․ վարակի գլխավոր օջախը Միացյալ Նահանգներում Նյու Յորքն է, որտեղ էլ հենց անցկացվում է US Open-ը։ Միացյալ Նահանգների նախագահը հայտարարում է, որ գալիք շաբաթները ամենաբարդն են լինելու ԱՄՆ-ի համար։
Ուիմբլդոնի չեղարկումից անմիջապես հետո US Open-ը հանդես եկավ հայտարարությամբ՝ նշելով, որ ԴԵՌ նախատեսում է անցկացնել մրցաշարը նշված ժամկետներում։ Բայց հաշվի առնելով իրավիճակը Միացյալ Նահանգներում՝ առավել հավանական է թվում, որ US Open-ը ևս կչեղարկվի ու պարզապես չի կայանա այս տարի։ Այստեղ ևս պետք է հաշվի առնենք այն հանգամանքը, որ համավարակի նահանջման դեպքում անգամ կազմակերպիչները ռիսկի չեն դիմի նման մեծ մասշտաբի միջոցառում անցկացնել։ Բայց եթե անգամ անցկացնել մրցաշարը, ապա ինչպե՞ս վարվել երկրպագուների հետ։ Հավատացե՛ք, դժվար է պատկերացնելը, որ օգոստոսին «Արտուր Էշի» անվան կորտում 20 հազար մարդ է հավաքվելու։ Վարակի կրկնման վտանգը չափազանց մեծ է։
Ռոլան Գարոսը սկանդալային կերպով հետաձգեց մրցաշարը։ Այդ մասին մենք մանրամասն խոսել ենք։ Սեպտեմբերի վերջ, Փարիզ․․․Չգիտեմ։ Միգուցե Ֆրանսիայի բաց առաջնությունը կայանա, բայց վերը նշված պատճառները կարող են խանգարել նաև այս մրցաշարի անցկացմանը։ Ֆրանսիայում ներկա պահին վարակակիրների թիվը անցնում է 59 հազարը։ Սա ևս մեծ թիվ է։ Ճիշտ է, համեմատելի չէ ԱՄՆ-ի հետ, բայց իրավիճակը լավ չէ նաև Ֆրանսիայում։
Ուիմբլդոնի չեղարկումը կարող է նախադեպ լինել մյուս երկու Grand Slam-երի համար։ Մյուս կողմից մրցաշարերը կարող են պարզապես սոլիդարության քայլ կատարել ու չեղարկել մյուս մրցաշարերը ի նշան համավարակի դեմ պայքարի և միասնության։ Իհարկե, թենիսի երկրպագուների, այդ թվում և իմ համար ցավալի է Մեծ սաղավարտի մրցաշարերի հնարավոր չեղարկումները։ Թենիսի երկրպագուները սպասում են դրանց, ինչպես ֆուտբոլասերը կսպասի Չեմպիոնների լիգային։ Բայց սա հատուկ իրավիճակ է։
Ուիմբլդոնի չեղարկմանը զուգահեռ ATP-ն ու WTA-ը համատեղ որոշմամբ չեղարկեցին բոլոր մրցաշարերը արդեն մինչև հուլիս։ Սա տրամաբանական է։ Այսինքն խոտածածկ կորտերում ոչ մի մրցաշար այս տարի չի կայանա։
Մրցաշրջանը չափազանց մեծ քանակությամբ հարցեր է առաջացնում, որի պատասխանները չգիտեն անգամ ATP-ում, WTA-ում, ITF-ում ու ազդեցիկ ֆեդերացիաներում։ Ի՞նչ է լինելու ամփոփիչ մրցաշարի հետ, ի՞նչ է լինելու վարկանիշի հետ ու այսպես շարունակ։
Մեկ բան ակնհայտ է․ 2020 թվականի Մեծ սաղավարտի մրցաշարերը կամ չեղարկվում են կամ անցկացվում տվյալ երկրում որևէ սարսափելի իրավիճակի պայմաններում։ Այսպես.
- Ավստրալիայի բաց առաջնությունն անցավ երկրում անտառային սարսափելի հրդեհների առկայության ու օդի ծանրության պայմաններում,
- Ռոլան Գարոսը առայժմ հետաձգվել է,
- Ուիմբլդոնը չեղարկվել է,
- US Open-ի անցկացումը մեծ հարցականի տակ է։
Եվ վերջում․ Չեղարկումից ժամեր անց Ուիմբլդոնի Facebook-յան էջը տեղադրեց վերևում հրապարակված լուսանկարը (նաև հոդվածի գլխավոր լուսանկարն է) հետևյալ գրառմամբ․ «Լուսավոր օրեր գալու են․․․»
Արամ Սահակյան
