Չեմպիոնների լիգան վերադառնում է: Ակումբային լավագույն մրցաշարը մեզ խոստանում է աննկարագրելի զգացողություններ: Միասին կպարզենք՝ արդյոք Էրլինգ Հոլանդը կշարունակի՞ իր գոլային հրավառությունը: Միգուցե ականատես կլինենք Լիոնել Մեսսիի հերթական ֆուտբոլային ներկայացմա՞նը: Չմոռանանք նաև Անտոնիո Կոնտեին, որի գլխավորած «Ինտերը» լավ մարզավիճակ է հավաքել: Միլանյան ակումբին ծանր հանդիպում է սպասվում «Սիգնալ Իդունա Պարկ» մարզադաշտում, որտեղ ատամները սրած նրանց է դիմավորելու Դորտմունդի «Բորուսիան»:
Այսօր կկայանա խմբային փուլի չորրորդ տուրի 8 հանդիպում: Կստանանք մի քանի կարևորագույն հարցերի պատասխաններ, միգուցե կիմանանք փլեյ-օֆֆ-ի առաջին մասնակիցներին:
G Խումբ
Գլխավոր հանդիպում. «Զենիթ» (Ռուսաստան) — «Լայպցիգ» (Գերմանիա)
Ամենաինտրիգային խմբերից մեկն է: Բոլոր թիմերը խմբից դուրս գալու հավասար հնարավորություններ ունեն: Եթե առաջատար «Լայպցիգը» (6 միավոր), կարողանա հաղթել ռուսական ակումբի դաշտում, գրեթե կապահովի իր տեղը 1/8 եզրափակչում: Ավելի բարդ իրավիճակում է «Զենիթը» (4 միավոր). որն անպայման պետք է հաղթի գերմանացիներին, եթե չի ցանկանում կորցնել խմբային փուլը հաղթահարելու հնարավորությունը:
Գերմանիայում կայացած առաջին հանդիպումը, որն ավարտվեց «Լայպցիգի» հաղթանակով՝ 2-1 հաշվով, հուշում է, որ պետերբուրգցիները հեշտ հաղթանակի հույս չեն կարող ունենալ: Երկու թիմերն էլ այս խաղին մոտենում են առանց լուրջ կորուստների:
«Լիոն» (Ֆրանսիա)-«Բենֆիկա» (Պորտուգալիա)
Ֆրանսիական ակումբը լավ սկսեց խմբային փուլը՝ հաղթելով «Լայպցիգին» և ոչ- ոքի խաղալով «Զենիթի» հետ, բայց հետո եղավ «Բենֆիկայից» կրած անակնկալ պարտությունը:
Եթե «Լիոնին» բավարարում է ոչ-ոքի արդյունքը, քանի որ ֆրանսիական ակումբը ունի 4 միավոր, ապա պորտուգալական ակումբը կրած 2 անընդմեջ պարտություններից հետո, ստիպված է խաղալ միայն հաղթանակի համար: Միգուցե, մենք կդիտենք երրորդ տեղի հավակնորդների հանդիպումը:
E Խումբ
Կենտրոնական հանդիպում. «Նապոլի» (Իտալիա)- «Զալցբուրգ» (Ավստրիա)
«Նապոլին» հաջող սկսեց խմբային փուլը՝ հաղթելով «Լիվերպուլին», բայց հետագայում ոչ- ոքի խաղաց «Գենկի» հետ և դժվարությամբ հաղթահարեց «Զալցբուրգի» արգելքը: Այդուհանդերձ, իտալացիները 7 միավորով գլխավորում են մրցաշարային աղյուսակը և բելգիական ակումբի նկատմամբ տարած հաղթանակը հնարավորություն կտա ամրապնդելու առաջին հորիզոնականը:
Իսկ Էրլինգ Հոլանդը կփորձի խանգարել նրանց՝ խփելով իր հերթական գնդակը այս մրցաշարում: Հիշեցնենք, որ Հոլանդի ակտիվում կա 6 գոլ:
«Լիվերպուլ» (Անգլիա)- «Գենկ» (Բելգիա)
«Էնֆիլդում» կայանալիք հանդիպման բացահայտ ֆավորիտը լիվերպուլյան ակումբն է: «Նապոլիից» կրած պարտությունից հետո, անգլիական թիմը երկու անընդմեջ հաղթանակ տարավ և վաստակեց 6 միավոր: Նրանց ընդամենը մեկ միավոր է բաժանում խմբի առաջատարից «Նապոլիից»:
«Լիվերպուլը» բելգիացիներին հաղթելու դեպքում կարող է կենտրոնանալ առաջին տեղի համար պայքարի վրա: «Գենկը» վաստակել է ընդամենը մեկ միավոր և համակերպվել է հետնապահի իր դերի հետ:
H Խումբ
Կենտրոնական հանդիպում. «Չելսի» (Անգլիա) — «Այաքս» (Հոլանդիա)
Այս խաղում հանդիպում են խմբի առաջատարները (երկուսն էլ վաստակել են 6 միավոր)։
Ֆրենկ Լեմպարդին հաջողվեց մրցաշրջանի ծանր մեկնարկից հետո կարգավորել «Չելսիի» խաղը: «Ազնվականները» «Վալենսիային» պարտվելուց հետո 2 հաղթանակ տարան, այդ թվում ՝ «Այաքսի» հետ առաջին խաղում: Հոլանդացիներն էլ լավ անցկացրին մեկնարկային հանդիպումները, բայց հետագայում պարտվեցին «Չելսիին» :
Այս դիմակայության հաղթողը կհեռանա հետապնդողներից և զգալիորեն կբարելավի Չեմպիոնների լիգայի 1/8 եզրափակիչ փուլ դուրս գալու իր հնարավորությունները:
«Վալենսիա» (Իսպանիա)-«Լիլ» (ֆրանսիա)
Իսպանացիները մրցաշրջանի սկզբում վատ մարզավիճակում էին: Մարսելինոյի հեռացումից հետո Չեմպիոնների լիգայի երկու խաղերում նրանք վաստակեցին մեկ միավոր: «Չղջիկները» չորս միավորով երրորդ տեղում են և պայքարը շարունակելու համար պարտավոր են հաղթել խմբի հետնապահ «Լիլին» (1 միավոր) :
Նկատվում է, որ ֆրանսիական ակումբը դեռ չի կարողանում հավասար պայքար մղել եվրոպական գրանդ ակումբների հետ:
F Խումբ
Կենտրոնական հանդիպում. «Բորուսիա» (Գերմանիա)- «Ինտեր» (Իտալիա)
«Բորուսիան» և «Ինտերը» պայքարում են իրենց խմբում երկրորդ տեղը զբաղեցնելու համար: Գերմանացիները պարտվեցին «Ինտերին» առաջին խաղում, բայց կարողացան միավորներ կորզել «Բարսելոնայից», իսկ իտալացիները առաջին տուրում ոչ-ոքի խաղացին «Սլավիայի» հետ: Այսպիսով՝ երկու թիմերն էլ վաստակել են 4 միավոր:
Այս հանդիպումը վճռորոշ կլինի երկու ակումբների համար: Հաղթողը կմեծացնի իր հնարավորությունները խմբից դուրս գալու համար, իսկ պարտվողը կբարդացնի սեփական գործերը: Ոչ-ոքին ձեռնտու է «Ինտերին», քանի որ այս դեպքում իտալացիները անձնական հանդիպումներով առավելություն կունենան «Բորուսիայի» նկատմամբ:
«Բարսելոնա» (Իսպանիա) — «Սլավիա» (Չեխիա)
«Բարսելոնան» այս խմբի առաջատարն է՝ չնայած «Բորուսիայի» հետ առաջին տուրում գրանցված ոչ-ոքիին: Գերմանիայում ցուցադրած խաղը չէր համապատասխանում այս թիմի չափանիշներին: «Բարսելոնան» ընդամենը 4 գոլ է խփել խմբային փուլում, բայց իրավիճակը կարող է փոխվել, քանի որ վնասվածքից ապաքինվել է «հրաշագործը»՝ Լիոնել Մեսսին:
Արգենտինացին հրաշալի մարզավիճակում է և պատրաստ է կրկին փայլել Չեմպիոնների լիգայում: «Սլավիայի» դեմ հաղթանակը գրեթե կերաշխավորի «Բարսելոնայի» 1/8 եզրափակիչ դուրս գալը:
«Սլավիան» այս Չեմպիոնների լիգայի հայտնագործություններից է: Մեկ միավոր վաստակելը կարելի է բացատրել այն հանգամանքով, որ չեխերը հայտնվել են «մահվան խմբում»: Բայց պետք է նշել, որ «Սլավիան» խաղում է հարձակողական ֆուտբոլ և «ավտոբուս չի կանգնեցնում» անվանի մրցակիցների դեմ, որի համար էլ արդեն հասցրել է վաստակել չեզոք երկրպագուների հարգանքը:
Հավելենք, որ հանդիպումները կմեկնարկեն Երևանի ժամանակով 21:55-ին և 23։45-ին։
Նարեկ Գրիգորյան
