Հայաստանի ֆուտբոլի ֆեդերացիան օրերս աննախադեպ քայլ կատարեց՝ պայմանավորված խաղերի դեմ պայքարում: ՀՖՖ-ն դադարեցրեց Առաջին խմբի առաջնությունը, որակազրկեց 58 անձի (ի դեպ, 25-ն՝ ուկրաինացի), որոնցից 45-ին՝ ցմահ:
Որակազրկվածների ցանկում, այդուհանդերձ, ի թիվս այլ անձանց, նշանակալի է «Արագածի» փաստացի սեփականատեր Ռոստիսլավ Կոզարի և «Տորպեդոյի» ֆուտբոլիստ Եգոր Լուգովիի անունը: Ուկրաինացիները 2019 թվականի ապրիլին արդեն իսկ որակազրկվել էին երկրի ֆուտբոլային ասոցիացիայի կողմից՝ «Սումի» ակումբի հետ կապված պայմանավորված խաղերի գործով:
Անցած մի քանի տարում Ուկրաինայի իրավապահ մարմինները լայնամասշտաբ գործողություններ իրականացրին պայմանավորված խաղերի բացահայտման գործով՝ խուզարկություններ, հատուկ գործողություններ, որոնք հանգեցրեցրին մի շարք բացահայտումների: Պայքարից անմասն չէր մնում նաև Ուկրաինայի ֆուտբոլի ֆեդերացիան, որն արդյունքում մի շարք որակազրկումներ իրականացրեց:
Ավելի ուշ արդեն, Ուկրաինական «112» հեռուստաընկերությունը հրապարակել էր տեսանյութ, որտեղ ոստիկանության գործողությունների արդյունքում արձանագրվել էր «Սումի» ակումբի տնօրեն Ռոստիսլավ Կոզարի և մրցավար Ալեքսանդր Սոլովիանի խոսակցությունը ու գումարի փոխանցումը:
Ուկրաինական «2+2» հեռուստաընկերությունը նույնպես անդրադարձել էր նշված ակումբին և նրան, թե ինչ մեխանիզմներով են բաշխվում գումարները: Մասնավորապես, «Про Футбол» հաղորդման մեջ նկարագրվում էր, որ ակումբի նախագահ Ռոստիսլավ Կոզարը 100.000 գրիվեն էր փոխանցել Եգոր Լուգովիին, որը պետք է գումարը բաժաներ մնացած ֆուտբոլիստներին:
Արդյունքում՝ «Սումին» զրկվեց պրոֆեսիոնալ ակումբի կարգավիճակից, իսկ ակումբի մի շարք անդամներ որակազրկվեցին տարբեր ժամկետներով: Ապրիլի 11-ին Ուկրաինայի ֆուտբոլի ֆեդերացիայի Կարգապահական կոմիտեն ցմահ որակազրկեց ակումբի նախագահին, մարզչի օգնականին և 4 ֆուտբոլիստների, որոնցից մեկը հենց Լուգովինն էր:
25-ամյա ֆուտբոլիստը 2017թվականին տեղափոխվել էր Երևանի «Արցախ» և մի քանի խաղի էր մասնակցել: Այնուհետև, նա վերադարձավ հայրենիք, և այնտեղ՝ Ուկրաինայում, պայմանավորված խաղերի համար որակազրկվելուց հետո նորից վերադարձավ Հայաստան և սկսեց հանդես գալ Երևանի «Տորպեդոյի» կազմում:
Ի դեպ, հատկանշական է, որ այս տարվա ապրիլին Լուգովին Telegram-ում ալիք էր բացել, որը մասնագիտացած էր խաղադրույքների վրա և առաջարկում էր իր հետ միասին գումար վաստակել:
Ֆուտբոլիստը հատուկ գովազդայի հոլովակում էր նկարահանվել՝ պատմելով իր ֆուտբոլային կարիերայի և այն մասին, որ ինչ-որ պահի ինքը հասկացել է՝ ցանկանում է ավելի շատ գումար վաստակել ու սկսել է զբաղվել խաղադրույքներով.
Ցմահ որակազրկվել են նաև հայտնի ուկրաինական ակումբի սաներ ու նախկին ֆուտբոլիստներ՝ Օլեգ Գումենյուկ («Չեռնոմորեց», Ուկրաինայի երիտասարդական հավաքականի նախկին ֆուտբոլիստ), Իգոր Բիկովսկի («Շախտյոր»,«Մարիուպոլ»), Սերգեյ Դյաչուկ («Դնեպր»), Իլյա Գլուշիցկի («Շախտյոր»), Տիմոֆեյ Շերմետա («Մետալուրգ», Զապորոժյե) և այլն: Մարզիչների թվում, ինչպես հայտնի է, ուկրաինացի մասնագետ Սերգեյ Լիտովչենկոն է, որը «Արսենալ-Կիևին» դուրս է բերել ուկրաինական Պրեմիեր-լիգա, իսկ Հայաստանում մարզում էր «Լոկոմոտիվը», ինչպես նաև Անատոլի Պիսկովեցը, որը նախկինում եղել է Ուկրաինայի կանանց հավաքականի մարզիչը, գլխավորել է նաև Երևանի «Լոկոմոտիվը»:
Առհասարակ, «Լոկոմոտիվ» ակումբից 9 ֆուտբոլիստի ցմահ արգելվել է զբաղվել որևէ ֆուտբոլային գործունեությամբ, ցմահ որակազրկումներ են ստացել նաև ակումբի նախագահ Հրաչիկ Քանանյանն ու ակումբի փաստացի սեփականատեր Մաքսիմ Դրոբնիյը, իսկ ակումբի գործադիր տնօրեն Արմեն Քանանյանին 1 տարով է արգելվել որևէ ֆուտբոլային գործունեությամբ զբաղվել, նա նաև տուգանվել է 500 հազար դրամով:
Ակումբի շուրջ տեղի ունեցող զարգացումների մասին «Լոկոմոտիվի» նախագահ Հրաչիկ Քանանյանը հրաժարվեց հարցազրույցից, սակայն ArmSport-ի հետ ունեցած կարճ հեռախոսազրույցում նշեց, որ ոչ մի պայմանավորված հանդիպում իրենց մասնակցությամբ չկա.
«Մենք նյութերն այսօր ստացել ենք, մեր պաշտպանները զբաղվում են դրանցով: Դրանից հետո կներկայացնենք մեր բողոքը և պաշտոնական հայտարարությամբ հանդես կգանք: Արդարությունը հաղթելու է: Մենք մեզ համարում ենք Առաջին խմբի հաղթող: Ամենաուժեղ թիմը, որը ամբողջ մրցաշրջանում ոչ մի պարտություն չի կրել: Եղել է մեկ տեխնիկական պարտություն: Չկա ոչ մի պայմանավորված հանդիպում մեր մասնակցությամբ: Եթե թիմից ինչ-որ մեկը ինչ-որ բան արել է, ինչ կապ ունի գլխավոր մարզիչը կամ նախագահը: Կամ ինչ կապ ունեն մանկապատանեկան դպրոցի սաները, որոնց զրկել են մասնակցելու բոլոր առաջնություններից»,- ասում է Հրաչիկ Քանանյանն ու ընդգծում, որ իրենց գլխավոր խնդիրն ակումբի պատիվն ու անունը պաշտպանելն է.
«Ես բացառում եմ, որ մեր ակումբից որևէ մեկը կարող է այդպիսի բան անել: Մենք միշտ խաղացել ենք մեր մրցակցի դեմ: Մենք գնալու ենք մինչև վերջ և դիմելու ենք Լոզանի արբիտրիժային դատարան»:
Նարե Հովհաննիսյան, Երվանդ Հակոբյան
Ծանուցում. ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
