Երևանի «Փյունիկի» սան Գեղամ Կադիմյանը, որը 2019-ի ամռանը պայմանագիր էր ստորագրել «Ալաշկերտի» հետ, խոսել է երևանյան թիմում անցկացրած կարճատև ժամանակի մասին․ Կադիմյան հարցազրույց է տվել իր նոր թիմի՝ բելառուսական «Նեմանի» պաշտոնական կայքին։
-Նախքան «Նեմանի» ֆուտբոլիստ դառնալը, 2019 թվականի հուլիսին դու հայտնվեցիր Հայաստանում ու կես տարի անցկացրիր Երևանի «Ալաշկերտում»։ Ի՞նչն ազդեց կարիերադ փոփոխելու նման կտրուկ որոշման վրա։
-Ես արդեն 10 տարի խաղում էի Ուկրաինայում ու հասցրել էի կարոտել մտերիմներիս ու հարազատներիս, մեր տանը։ Այդ իսկ պատճառով հեշտությամբ նման ընտրություն կատարեցի, երբ ունեցա այդ հնարավորությունը։ Այն, որ ընտանիքս իմ կողքին էր լինելու, շատ ուժեղ ազդեց իմ որոշման վրա։ Առանձնապես երկար չեմ մտածել։
Լրացուցիչ բոնուս էր այն, որ «Ալաշկերտը» հանդես էր գալիս Եվրոպա լիգայում։ Անհամբերությամբ էի սպասում եվրագավաթային խաղերում դաշտ դուրս գալուն։ Այդ ժամանակ կատարվեց իմ մեկ այլ փոքր երազանք՝ խաղալ եվրագավաթային մակարդակում։
-Այդուհանդերձ, Հայաստանում այնքան էլ երկար ժամանակ չանցկացրիր։ Ինչո՞ւ այդքան արագ նորից որոշեցիր հեռանալ տնից։
-Թող դա մնա ինձ հետ։ Չեմ վառվում այդ մասին պատմելու ցանկությունից։
-Այդ դեպքում ինչո՞ւ հենց Բելառուս և ինչո՞ւ հենց «Նեման»։
-Մի ընկեր ունեմ ֆուտբոլային շատ լավ ու մեծ շրջապատով։ Նա հնարավորություն ուներ ինձ բերելու Բելառուս, ահա նա ինձ առաջարկեց իմ ուժերը փորձել «Նեմանում»։ Երկար չմտածեցի։ Կապ հաստատեցի Դանիել Ստոյկովիչի հետ, նրա հետ հասցրել էինք որոշ ժամանակ մարզվել «Ալաշկերտում», և նա ինձ ասաց, որ Գրոդնոյում իրեն ամեն ինչ դուր է գալիս։ Ահա այդպես ես համաձայնեցի։
