«Կամպ Նոու» մարզադաշտում խոտածածկի տեղադրման աշխատանքներն ավարտվել են, հայտնում է Mundo Deportivo-ն։ Աղբյուրի համաձայն՝ խոտածածկի տեղադրումը կարևոր քայլ է՝ խաղերի համար օպտիմալ պայմաններ ապահովելու ուղղությամբ, երբ ֆուտբոլը վերադառնա այս մարզադաշտ։
Ինչպես ավելի վաղ հայտարարվել էր, «Բարսելոնան» նախատեսում է վերադառնալ «Կամպ Նոու» 2025 թվականի սեպտեմբերին։ Խոտածածկի տեղադրումից հետո կսկսվեն դաշտի հիմնական համակարգերի՝ ջրահեռացման, օդափոխության և կլիմայի կարգավորման փորձարկումն ու ճշգրտումը։ Աշխատանքների վաղաժամ ավարտը հնարավորություն կտա ժամանակին բացահայտել և վերացնել հնարավոր խնդիրները մինչև պաշտոնական խաղերի վերսկսումը։
Հիշեցնենք, որ «Կամպ Նոուի» վերակառուցման աշխատանքները մեկնարկել էին 2022 թվականին։ Այդ ընթացքում «Բարսելոնան» իր տնային հանդիպումներն անցկացնում է Լուիս Կոմպանիսի անվան օլիմպիական մարզադաշտում։
