«Ալ-Նասրը», որի կազմում հանդես է գալիս պորտուգալացի հարձակվող Կրիշտիանու Ռոնալդուն, առաջիկա օրերին Ասիայի Չեմպիոնների լիգայի խաղարկության 1/8-րդ եզրափակչում կմրցի իրանական «Էսթեղլալի» հետ։
Ինչպես հայտնում է Daily Mail-ը, սաուդական կողմը ցանկացել է կամ հետաձգել հանդիպումը, կամ էլ այն տեղափոխել չեզոք դաշտ։ Նշվում է, որ ակումբի նման խնդրանքի պատճառ է դարձել Կրիշտիանու Ռոնալդուի անվտանգության վերաբերյալ մտահոգությունը։
Դա կապված է 2023 թվականի սեպտեմբերին տեղի ունեցած միջադեպի հետ, երբ «Ալ-Նասրը» Թեհրանում հանդիպում էր «Պերսեպոլիսի» հետ (2-0)։ Այն ժամանակ տեղի իրավապահները ստիպված էին ցրել երկրպագուներին, որոնք փորձում էին ներխուժել հյուրանոց՝ պորտուգալացի աստղին տեսնելու համար։
Ասիայի ֆուտբոլի կոնֆեդերացիան մերժել է «Ալ-Նասրի» խնդրանքը։ Հանդիպումը կկայանա նախատեսվածի պես՝ մարտի 3-ին, «Ազադի» մարզադաշտում։
