Ճապոնիայի կառավարության ղեկավար Սինձո Աբեն երկուշաբթի օնլայն-կոնֆերանս է անցկացրել «Մեծ յոթնյակի» երկրների ղեկավարների հետ ու արդյունքում ստացել է նրանց աջակցությունը Օլիմպիական և Պարալիմպիկ խաղերի անցկացման վերաբերյալ, եթե կորոնավիրուսի համաճարակը հնարավոր լինի հաղթահարել:
Այս մասին հայտնում է Ճապոնիայի Արտաքին գործերի նախարարությունը:
G7-ի ղեկավարներն իրենց հավանությունն են տվել Ճապոնիայի վարչապետի գաղափարին, այն է՝ Օլիմպիական խաղերն անցկացնել նախատեսված ժամկետներում՝ հուլիսի 24-ից օգոստոսի 9-ը, և հանդիսականների ներկայությամբ՝ որպես ապացույց այն բանի, որ մարդկությունը կարողացել է հաղթահարել ԱՀԿ-ի կողմից համաշխարհային համաճարակ հայտարարված կորոնավիրուսը:
«Մենք կհաղթահարենք վիրուսի տարածումն ու Օլիմպիական խաղերը կանցկացնենք առանց որևէ խնդրի, ինչպես և նախատեսվում էր»,- Սինձո Աբեի խոսքերն է փոխանցում Inside the Games-ը:
Ճապոնիայի իշխանությունները, հիշեցնենք, ի սկզբանե հակված են այն դիրքորոշմանը, որ կորոնավիրուսը չի խանգարի ամառային Օլիմպիական և Պարալիմպիկ խաղերի անցկացմանը Տոկիոյում: Խաղերն առանց հանդիսականների անցկացնելու գաղափարն ի հայտ եկավ անցած շաբաթ, որը ևս կտրականապես մերժվեց Ճապոնիայի իշխանությունների կողմից:
Իսկ խաղերի հետաձգում, ըստ Սինձո Աբեի, նույնիսկ չեն էլ դիտարկել.
«Վարչապետը հայտարարել է, որ Օլիմպիական խաղերը կցանկանար անցկացնել՝ ի ապացույց այն բանի, որ մարդկությունը կարողացել է հաղթահարել նոր կորոնավիրուսը: Նա ստացել է G7-ի աջակցությունը»,- ասվում է Ճապոնիայի արտգործնախարարության՝ այսօր տարածած հայտարարության մեջ:
Իսկ Ճապոնիայի նախարարների կաբիների գլխավոր քարտուղար Յոսիխիդե Սուգան, հանդես գալով մամուլի ասուլիսի ընթացքում, ուշադրություն է հրավիրել այն հանգամանքի վրա, որ «Մեծ յոթնյակի» երկրների առաջնորդները երբեք չեն խոսել խաղերը հետաձգելու կամ չեղարկելու մասին.
«Նման հայտարարություններ չեն եղել»,- ասել է նա լրագրողներին՝ ավելացնելով, որ Միջազգային օլիմպիական կոմիտեն (ՄՕԿ), Տոկիո-2020-ի կազմկոմիտեն և Տոկիոյի ադմինիաստրացիան անում են ամեն բան, որպեսզի խաղերն անցնեն ըստ նախատեսված ծրագրի:
G7-ի երկրների ղեկավարները, տեսակոնֆերանսի արդյունքում, հանդես են եկել համատեղ հայտարարությամբ, որում խոստացել են ուժեր ներդնել համաշխարհային տնտեսությունը վերականգնելո համար: Նրանք նաև համաձայնության են եկել համատեղ գործողությունների շուրջ, որոնք կկրճատեն վիրուսի տարածման աճը: Սակայն, օրինակ Ֆրանսիայի Օլիմպիական կոմիտեի նախագահ Դենի Մեսելյան կարծում է, որ Տոկիոյի Օլիմպիական խաղերը նախատեսված ժամկետում կկայանան միայն այն դեպքում, եթե մայիսի վերջին արդեն համաճարակի պիկն անցած կլինի.
«Եթե մայիսի վերջին մենք դեռ ճգնաժամային իրավիճակում լինենք, ապա դժվար կլինի պատկերացնել, թե Խաղերն ինչպես կարող են ժամանակին տեղի ունենալ: Եթե համաճարակի պիկն անցնի և իրավիճակը բարելավվի, ապա հարց է առաջանում, թե ովքե՞ր պետք է մասնակցեն խաղերին: Բայց մենք, միանշանակ, օպտիմալ լուծում կգտնենք»,- ֆրանսիացու խոսքերն է փոխանցում Reuters-ը:
Հիշեցնենք՝ Միջազգային Օլիմպիական Կոմիտեն այսօր արտահերթ բանակցություններ կանցկացնի անդամ կազմակերպությունների հետ՝ COVID-19- ի տարածման կանխարգելման կապակցությամբ: ՄՕԿ-ի նախագահ Թոմաս Բախը հեռուստակոնֆերանս կունենա մարզական միջազգային ֆեդերացիաների հետ: Կքննարկեն Խաղերի մեկնարկից 4 ամիս առաջ ստեղծված իրավիճակը, օլիմպիական վարկանիշային մրցաշարերի կայացման համար ճիշտ ու հարմար ժամանակ ընտրելը:
Միևնույն ժամանակ, Թոմաս Բախը չի բացառում, որ Տոկիո-2020-ը կարող է չեղարկվել, սակայն առանց հանդիսականի խաղերն անմտություն են, որոնք հակասում են օլիմպիական շարժման փիլիսոփայությանը՝ միավորել մարդկանց սպորտի համաշխարհային տոնի ընթացքում:
«Օլիմպիական խաղերն ավելին է, քան պարզապես մրցում: Սա բոլորին միավորող տոն է: Փակ դռներով կամ առանց հանդիսականների Օլիմպիական խաղերի անցկացումը տարբերակ չէ»,- ՄՕԿ-ի տարբեր անդամների մեջբերումներն ամփոփում է The Guardian-ը:
Հիշեցնենք՝ ըստ միջազգային լրատվամիջոցների, ՄՕԿ-ը պատրաստվում է փոփոխություն մտցնել օլիմպիական վարկանիշային մրցաշարերում և նույն մարզաձևի մի քանի մրցաշար միացնել իրար ու հենց այդ մեկ մրցաշարում խաղարկել բոլոր ուղեգրերը։
Հնարավոր է նաև որակավորման ժամանակաշրջանները երկարացվեն մինչև հունիսի 30-ը, վերաբաշխվեն օլիմպիական քվոտաները, ինչպես նաև վերացվեն օլիմպիական մի շարք որակավորման չափանիշներ։
