Մեզնից որևէ մեկը կարծիք չի հարցրել Արագածի վրա լեռնադահուկային կենտրոնի կառուցման նախագծերի վերաբերյալ․ Գագիկ Սարգսյան

Տարածաշրջանում խոշորագույն լեռնադահուկային հանգստյան գոտի կառուցելու նախագծերին ու դրանց ընթացքին ArmSport-ն ավելի վաղ անդրադարձել էր։

Այս անգամ կապ ենք հաստատել Հայաստանի դահուկային սպորտի ֆեդերացիայի նախագահ Գագիկ Սարգսյանի հետ՝ իմանալու նրա կարծիքը հավանություն ստացած նախագծի, այն իրականացնող կազմակերպությանը սպասվող դժվարությունների, ինչպես նաև Քաղաքաշինության կոմիտեի հետ ավելի վաղ հուշագիր ստորագրած «Արագեյթ ինվեսթմենթսի» վերաբերյալ։

-Պարո՛ն Սարգսյան, ծանո՞թ եք Արագած լեռան վրա լեռնադահուկային հանգստյան գոտի կառուցելու նախագծերին։

-Ճիշտն ասած, միայն «Արագեյթին» եմ ծանոթ, մյուսին ծանոթ չեմ և ինչպես հասկացա, մյուսը ոչ այնքան սպորտային կենտրոն է, որքան ինչ-որ ֆերմա պլյուս ճոպանուղի։ Զարմացած եմ երկրորդի հետ կապված, որովհետև աշխարհում նման բան չեմ տեսել։ Եթե վերցնենք որպես լեռնադահուկային կենտրոն, այն, բնականաբար, լրիվ ուրիշ չափորոշիչներ պետք է ունենա։

«Արագեյթին» ծանոթացել եմ համացանցից, մանրամասնորեն ուսումնասիրեցի, որովհետև այն բավականին պրոֆեսիոնալ ծրագիր է՝ նաև ներդրումների առումով, և շատ ուրախացա։ Բայց հետո իմացա, որ ինչ-որ խնդիրներ են առաջացել, այն մինչ օրս չի հաստատվել, և զարմացա, ճիշտն ասած։

-Իսկ տեղյա՞կ եք, որ Էկոնոմիկայի նախարարությունը հանձնաժողով է կազմել, որը հավանություն է տվել մյուս՝ «Ռիդ» ՍՊԸ-ի նախագծին։

-Մամուլից եմ իմացել։ Այդ կազմակերպության հետ կապված որևէ բան նույնիսկ չկարողացա գտնել համացանցում։ Զարմացել եմ, որովհետև ֆրանսիական կողմի առաջարկած ծրագիրը տեսեք՝ ինչ հետաքրքիր առավելություններ ունի․ էլ չեմ ասում ներդրումների չափը, այնպիսի կազմակերպություններ են ներգրավված՝ սկսած լեռնադահուկային կենտրոնի կառուցում, ճոպանուղիներ․․․աշխարհահռչակ
Ecole de ski francaise կազմակերպություն կա, որը լեռնադահուկային դպրոցների ցանց է, որը, պատկերացնո՞ւմ եք 217 լեռնադահուկային դպրոց ունի, 17 հազար ձմեռային մարզաձևերի հրահանգիչներ։ Եվ երբ որ նայում ենք այս կազմակերպությունների լրջությունը․․․և չմոռանանք, որ այս մարդիկ, որոնք ուզում են կյանքի կոչել այս ծրագիրը, աշխարհահռչակ Քուրշևել ֆրանսիական լեռնադահուկային կենտրոնի խումբն է։ 2023 թվականին Քուրշևելում Աշխարհի Գավաթն է անցկացվելու և «Արագեյթը» շատ մեծ հավանականություն ունի դառնալու աշխարհի այն լեռնադահուկային կենտրոններից, որտեղ հնարավորություն կունենան խոշորամասշտաբ մարզական միջոցառումներ անցկացնելու։

-Էկոնոմիկայի նախարարությունը պնդում է, որ ընտրություն կատարելուց առաջ այն քննարկվել է ոլորտի մասնագետների հետ։ Ինչպես հասկացա՝ Դուք հանձնաժողովի անդամ չեք եղել, բայց ինչ-որ մասնագետի ճանաչո՞ւմ եք, որը տեղյակ է եղել և որի հետ քննարկվել է այս ընտրությունը։

-Հայաստանում ես շատ քիչ մարդկանց եմ ճանաչում, որոնց կարելի է լեռնադահուկային ոլորտի մասնագետ կոչել։ Մասնագետ ասածը՝ մարդ, որը ոլորտի ներկայացուցիչ է, որն ունի երկար տարիների փորձ, կրթություն, գիտելիքներ և այլն։ Նման մասնագետներ կան Հայաստանի դահուկային սպորտի ֆեդերացիայում։ Մեզ որևէ պաշտոնական հարցում, որևէ աշխատանքային խմբում ընդգրկելու առաջարկ, նույնիսկ բանավոր զանգով կարծիք հարցնել չի եղել։ Եվ ընդհանրապես, աշխարհի առաջատար փորձն է այդպիսին․ ծրագիրը կարելի է ուղարկել կարծիքի․ միգուցե շատ լավ ծրագիր է, կամ միգուցե շատ վատն է ու վնաս կտա մեր պետությանը, մեր սպորտի զարգացմանը։

Պատկերացնո՞ւմ եք Արագածոտնի մարզի շատ երեխաներ կդառնային բարձրակարգ մարզիկներ, որոնք կկարողանային մրցել աշխարհի լավագույն մարզիկների հետ։ Այն կնպաստեր ձմեռային տուրիզմի զարգացմանը՝ նաև տարածաշրջանային առումով։ Ես որքանով հասկացա, այն իր մեծությամբ չի զիջելու Ռուսաստանի «Կրասնայա Պոլյանային», որտեղ Սոչիի Օլիմպիական խաղերն անցկացվեցին։ Շատ հետաքրքիր ծրագիր է։ Ես արտասահմանից գործընկերներ ունեմ, որոնք արդեն իսկ հետաքրքրված էին այդ նախագծով ու ցանկացել էին ներգրավվածություն ունենալ։ Հայաստանի համար սա կարող է դառնալ ձմեռային տուրիզմի և դահուկային սպորտի այցեքարտ։

-Դուք փորձ ունեք գրեթե զրոյական փուլից դահուկային մարզաձևերի հետ աշխատանքի, մասնավորապես Աշոցքում, որտեղ Եվրոպական Միության միջնորդությամբ դահուկային կենտրոն բացվեց։ Կարո՞ղ եք հստակ խնդիրները նշել, որոնք են նախկինում եղել խնդրահարույց թեմաները Հայաստանում ու հաշվի առնելով, թե ինչ ծավալի ծրագիր է նախատեսվում, ի՞նչ խնդիրների հետ է բախվելու այն կազմակերպությունը, որն ի վերջո կիրականացնի իր նախագիծը։

-Որքանով որ ծանոթացա կազմակերպություններին, կարծում եմ, որ շատ լուրջ, իրականություն դարձող ծրագիր է։ Խոսքը «Արագեյթի» մասին է։ Իսկ առհասարակ, կազմակերպությունը պիտի լինի այնպիսին, որը նման նախագծեր արդեն արել է աշխարհում։ Իրենք արդեն ունեն Քուրշևել։ Այսօր աշխարհում եթե կան 5 լավագույն լեռնադահուկային կենտրոններ, Քուրշևելը դրանցից մեկն է։ Այն ոչ թե լեռնադահուկային կենտրոն էր դառնալու, այլ լեռնադահուկային քաղաք։  Այն, ըստ նախագծի, բավականին լուրջ ենթակառուցվածքներ էր ունենալու։ Նրանք մոտավորապես 260 մլն եվրո գումար են ներդնում, պատկերացրեք հզորությունը։ Չեմ կարծում՝ որևէ խնդրի կբախվեն։ Մեր կառավարությունը, վստահ եմ, որ պիտի շահագրգիռ լինի Հայաստանում նման ներդրումների առումով, մենք այսօր ունենք դրա խնդիրն ու ամեն ինչ պիտի անենք այս նախագիծը կյանքի կոչելու համար։ Ես՝ որպես մասնագետ, պատրաստ եմ իմ ուժերի չափով ամեն ինչ անել, որ այս ծրագիրը կյանքի կոչվի։ Կարծում եմ՝ բոլորը պիտի օժանդակեն դրան։ Մեղմ ասած, մեծ բացթողում կլինի նման ծրագիրը Հայաստանում չանելը։ Այն նվեր է մեզ համար։

-Քանի որ հանձնաժողովն արդեն նախապատվությունը տվել է մյուս կազմակերպությանը, նրանց աշխատանքն ինչպե՞ս եք պատկերացնում։

-Շատ մեծ տեղեկատվություն չկարողացա գտնել այս մյուս կազմակերպության մասին։ Չեմ պատկերացնում ֆերմաներ և ճոպանուղի։ Միգուցե ինչ-որ նոր բա՞ն են մտածել, չեմ պատկերացնում, դրա համար չեմ կարող պատասխանել։ Ուղղակի չեմ ուսումնասիրել ծրագիրը։

-Իսկ բացի այս երկու կազմակերպություններից, Դուք ինչ-որ այլ կազմակերպության հետ նման նախագիծ քննարկելու առիթ ունեցե՞լ եք։

-Ես քննարկել եմ իմ նախաձեռնությամբ։ Եղիպատրուշ գյուղի մասին է խոսքը, էլի բավականին հետաքրքիր ծրագիր է։ Այստեղի ներդրողների հետ եմ քննարկել և կարծում եմ՝ մեկը մյուսին կօգներ։ Համատեղ լուրջ ծրագրերի իրականացման հնարավորություն կլիներ։

-Արդյոք հայ մարզիկները փորձ արե՞լ են նախկինում սահել այդ տեղանքում՝ հասկանալու համար նման պայմաններում ձյունն ու տեղանքն ինչպիսին են Արագածի վրա։

-Արագածը մեծ հնարավորությունների լեռ է։ Ջերմաստիճանը, բնակլիմայական պայմանները, այնտեղ հաստ ձյան շերտ է, այն փայլուն լեռ է դահուկային մարզաձևերի առումով։ Հատկապես այն մասը, որտեղ իրենք նախատեսում են կառուցել կենտրոնը։

-Բացի դրանից, լեռնադահուկային սպորտում կան նման շատ ձևեր, երբ մարզիկները սահում են մաքուր պայմաններում, երբ հստակ ճամփազատում չկա, էքստրիմի սիրահարներն ու տարբեր ֆեդերացիաներ կազմակերպում են նման բաներ, Հայաստանում նմանատիպ միջոցառումներ կազմակերպվո՞ւմ են։

-Հայաստանում նման փորձ կա, տղաները տուրեր անցկացնում են։ Բայց մենք ինքներս նախաձեռնելու ենք նման միջոցառում 2023 թվականին և առաջարկելու ենք հենց «Արագեյթ» ընկերությանը՝ իրենց նախատեսող վայրում անցկացնելու նման տուր։ Հայաստանում հրաշալի պայմաններ կան։

Ստելլա Բաբլոյան