ՀՖՖ նախագահի թեկնածու Թովմաս Գրիգորյանը, որը ֆուտբոլի ֆեդերացիայի նախագահի ընտրությունները պարտվեց Արմեն Մելիքբեկյանին, լրագրողների հետ ճեպազրույցում ամփոփեց արդյունքները․
-Ինչպե՞ս կմեկնաբանեք ՀՖՖ նախագահի ընտրությունների արդյունքները։
-Այս պահին շատ էմոցիոնալ եմ, չեմ ցանկանա գնահատական տալ ընտրությունների արդյունքների վերաբերյալ։ Արդյունքների մասին կցանկանամ խոսել սառը գլխով՝ ավելի ուշ։
Ինչո՞ւ չընտրվեցի․ ինձնից լավ գիտեք։ Սա աննախադեպ էր հայկական ֆուտբոլի համար, քանի որ մրցապայքար էր երկու թեկնածուի միջև, բայց այդ մրցապայքարն անհավասար էր։ Ինչո՞ւ էր անհավասար․ օրինակ, հենց այս շենքից օգտվում էր իմ մրցակիցը, չէի ասի, թե ամբողջովին քաղաքական աջակցություն էր, բայց կար նաև քաղաքական աջակցություն։ Դահլիճում ով կար քաղաքական ներկայացուցիչ, աջակցում էր Մելիքբեկյանին։
-Արդյոք այս ընտրությունների արդյունքները կազդե՞ն Ձեր հետագա ֆուտբոլային գործունեության վրա՝ կապված Լոռի ակումբի հետ։
-Ընտրությունները կարող էին ճակատագրական լինել իմ մրցակցի համար, բայց ես հենց վաղն էլ զբաղվելու եմ Հայաստանի Հանրապետության, ինչու ոչ նաև Լոռու մարզի ֆուտբոլի զարգացմամբ։Իհարկե, ընտրությունների արդյունքներն ինձ այդ հարցով չեն կարող խանգարել։ Ես ֆուտբոլում լինելու եմ։ Միայն դա կարող եմ ասել։
-Պրոֆեսիոնալ լիգայի ստեղծմանը համաձա՞յն եք։
-Բազմիցս անդրադարձել եմ այս թեմային։ Եթե լինի կոնցեպտ, եթե ակումբները դրանից կարողանան իրենց եկամուտները ավելացնել, ինչո՞ւ ոչ, կգնամ և կաջակցեմ այդ գաղափարին։
-Շնորհավորե՞լ եք Արմեն Մելիքբեկյանին։
-Այո, քանի որ պայմանավորվածություն ունեինք։
-9 ՀԿ-ների մասին ի՞նչ կարող եք ասել, որոնց անդամությունը ՀՖՖ-ին կասեցվեց։
-Երկու ՀԿ-ների ՝ Արնարի և Հայկական ֆուտբոլի զարգացման հիմնադրամի կասեցումը խայտառակություն էր։ Արդյոք դրանք ի՞մ ձայներն էին․ 9-ից 7-ը իմ ձայներն էր։ Մյուս ՀԿ-ների դեպքում չեմ կարող ասել, բայց այդ երկու ՀԿ-ների կասեցումը ապօրինի էր։
