Ծանրամարտի Հայաստանի հավաքականի գլխավոր մարզիչ Փաշիկ Ալավերդյանն, ամփոփելով Թաիլանդում կայացած աշխարհի առաջնությունը, անդրադարձել է 81 կգ քաշային կարգում հանդես եկող Անդրանիկ Կարապետյանին։
«Անդրանիկից միայն դուք չեք հիասթափված, չնայած այդ երիտասարդը շատ ծանր վիճակներով է հասել այնտեղ․ հուլիսին երկկողմանի թոքաբորբ ուներ, բայց մարզումների ժամանակ լավ արդյունքներ էր գրանցում։ Անդրանիկն էլ է հիասթափված։ Խնդրում եմ թողեք, տեսնենք այս վերքը կբուժվի թե չէ։
Արդյոք հոգեբան աշխատո՞ւմ է Անդրանիկի հետ․ մի մոռացեք, որ ֆիզկուլտուրայի ինստիտուտում սովորելիս անցնում են հոգեբանություն, մարզիչներն էլ շատ լավ տիրապետում են սպորտային հոգեբանությանը։
Անդրանիկը լավ արդյունքներ ունեցել է, իսկ հիմա այս տարիքում թևը կոտրվեց հրում վարժության ժամանակ ուղիղ տեղը, 2000 մարզիկից մեկը կկոտրեր ձեռքը այդ իրավիճակում, ու նա կոտրեց։ Եվրոպայի առաջնությունում քաշի հետ անհավանական խնդիր ունեցավ։ 1000 մարզիկից միայն մեկի հետ նման բան կլիներ։ Ձախորդ Փանոս որ ասում են, Անդրանիկի մասին է։
Ուղիղ 1 մլն դրամ ենք ծախսել, որ թոքաբորբից բուժվի ու լավ մարզավիճակ ձեռք բերի։
Ճիշտ կլիներ, եթե հրում վարժությունում քիչ կիլոգրամներ պատվիրեի՞նք․ իհարկե ճիշտ կլիներ, եթե նա ճշտախոս լիներ ու ասեր, որ ուսը ցավում է։ Բայց չասաց։ Մարզիկը պետք է օգնի մարզիչներին, ասի՝ ինչ խնդիրներ ունի, ինչ ցավեր ունի, բայց չասաց»,- ասել է Փաշիկ Ալավերդյանը։
Հիշեցնենք՝ պոկում վարժության առաջին մոտեցման ընթացքում Անդրանիկը գլխավերևում պահեց 168 կգ-անոց ծանրաձողը, այնուհետ չկարողացավ երկու մոտեցմամբ բարձրացնել 172 կգ:
Հայ ծանրորդը նվաճեց միայն փոքր բրոնզե մեդալ:
Հրում վարժությունը ցավալի ավարտ ունեցավ Անդրանիկ Կարապետյանի համար: Հայ ծանրորդը տապալեց բոլոր երեք մոտեցումներն էլ՝ չբարձրացնելով 195 կգ-ը։
